جولائی 2017 اور گلگت بلتستان

[haroonmcs26]

ایک پولیس چیک پوسٹ پر ہنزہ داخلہ پوائنٹ پر اندراج کروایا۔ راستے میں کثرت سے سیب، خوبانی اور چیری کے باغات نظر آ رہے تھے۔ یہ باغ اور سبزہ وادی ہنزہ کی پہچان ہیں۔ مین سڑک کے کنارے پر چند بچوں کو دیکھا کہ شاپرز میں سیب بیچ رہے تھے۔ ان سے پچاس روپے کے تقریبا تین پاؤ سیب لئے جو کہ چھوٹی جسامت کی قسم کے تھے اور تازہ سیب معدہ میں اتارے ۔

[haroonmcs26]

آگے حسن آباد چیک پوسٹ پر پہنچ کر وہاں بھی اندراج کروایا۔ میٹر ریڈنگ 53584۔ پوسٹ کے قریب ہی ایف ڈبلیو اور کیمپ اور انکی مسجد بھی تھی۔ اس مسجد میں پچھلے سال کے دوران واپسی پر میں نے نماز مغرب ادا کی تھی۔

[haroonmcs26]

تقریبا تین کلومیٹر کے بعد ہم علی آباد پہنچ گئے۔ علی آباد اور کریم آباد وادی ہنزہ کے اہم قصبے ہیں دوسرے الفاظ میں وادی ہنزہ جس علاقے کو کہا جاتا ہے وہ ان ہی دو قصبوں کے آس پاس کا علاقہ ہے۔ میٹر ریڈنگ 53587۔ علی آباد شاہراہ قراقرم پر واقع ہے جبکہ کریم آباد کیلئے شاہراہ قراقرم کو چھوڑ کر چند کلومیٹر کا فاصلہ طے کرنا پڑتا ہے۔علی آباد سے کچھ پہلے سڑک کے کنارے موجود باغ سے مقامی بچے پکی ہوئی خوبانیاں توڑ رہے تھے۔ ان سے 50 روپے کی تقریبا دو کلو خوبانیاں لیں۔ یہ نعمت یہاں اتنی سستی تھی جبکہ لاہور میں اچھی خوبانی 200 روپے کلو سے کم کہاں ملتی ہے۔ جو خوبانیاں ہم نے وہاں سے خریدیں انکے ذائقے کو میں اب تک نہیں بھلا سکا۔ اتنی مٹھاس اور خوش ذائقہ کہ بیان سے باہر۔ مکمل طور پر درخت پر پکی ہوئیں۔ انکا جو مقامی نام ہمیں پتا چلا وہ تھا ہبیع۔ یہ خوبانی کی ایسی قسم ہے جو بہت زیادہ رسیلی اور نرم ہوتی ہے۔ اور یہ زیادہ دیر محفوظ بھی نہیں رہ سکتی بہت جلدی خراب ہو جاتی ہے اسلئے اس کو کم ہی دوسرے علاقوں میں بھیجا جاتا ہے۔ اب شام ہو رہی تھی اور ہمیں اپنے کھانے کا بھی بندوبست کرنا تھا اسلئے علی آباد سے350 روپے فی کلو کے حساب سے ایک کلو مرغی کا گوشت لیا اور ایک تندور سے 10 روپے فی روٹی کے حساب سے 9 روٹیاں لیں۔ ارادہ تھا کہ اپنی جائے قیام پر جا کر گوشت کو پکایا جائے۔ علی آباد کے پی ایس او پمپ سے گاڑی کی ٹنکی فل کروائی۔ میٹر ریڈنگ 53588، ریٹ 71.30 روپے فی لٹر، کل مقدار 7.02 لٹر، قیمت 500 روپے۔

[haroonmcs26]

ہمارا ارادہ تھا کہ رات کا قیام دیوکارمیں ایگل نیسٹ کے قریب کیا جائے۔ اسکے لئے شاہراہ قراقرم سے کریم آباد والے راستے پر مڑنا پڑتا ہے ۔ پھر کریم آباد سے پہلے ہی دیوکار کا راستہ علیحدہ ہو جاتا ہے ۔ جب میٹر ریڈنگ 53595 تھی تو ہم کریم آباد والے راستے کے پاس پہنچ گئے لیکن غلطی سے ہم اس پر مڑنے کی بجائے شاہراہ قراقرم پر سیدھے چلے گئے۔ جب گنیش کے قصبے میں پہنچے تو مجھے احساس ہوا کہ ہم آگے آ گئے ہیں۔ وہاں سڑک کے ساتھ ہی والی بال میچ دیکھنے کیلئے لوگ جمع تھے۔ ہم نے بھی گاڑی ایک طرف پارک کی اور وہاں پہنچے تو کمنٹیٹر نے ہمیں دیکھ کرسپیکر پر ہی کہا کہ ہم اپنے پنجاب سے آنے والے مہمانوں کو خوش آمدید کہتے ہیں۔ ہم نے انکی محبت کا دل ہی دل میں شکریہ ادا کیا۔ کچھ دیر ہم وہاں بیٹھے بھی رہے لیکن لگ رہا تھا کہ میچ کا آغاز ابھی دیر سے ہو گا اسلئے گاڑی کو موڑ کر واپس کریم آباد والے راستے کی طرف چل پڑے۔

[Chaudhry2]

Amazing Haroon bhai, The way ur describing each and every thing, it feels like i am travelling with u guys, Really appreciate that ur putting so much of ur time in writing all this, it will definitely help new tourists who are planing to visit these areas, Waiting for ur new posts.....

[nomee2004]

bohat khoob maza aa gya

[haroonmcs26]

ادنیٰ سی کاوش کو سراہنے کیلئے تہہ دل سے شکر گزار ہوں۔ مجھ سے کئی دوست کہتے ہیں کہ تیزی سے پوسٹ کروں ۔ حقیقت یہ ہے کہ اگر تھریڈ کو سر سے اتارنا ہو تو چند الفاظ لکھ کر باقی صرف تصاویر پوسٹ کر دوں اور صرف چند دن میں ہی تھریڈ مکمل ہو جائے لیکن اس صورت میں نئے جانے والوں کیلئے کوئی فائدہ نہیں۔ یہ چھوٹی چھوٹی تفصیلات ہی ہوتیں ہیں جو کہ سفر کے دوران بہت مددگار ثابت ہوتی ہیں۔ کوشش ہے کہ پڑھنے والوں کو زیادہ سے زیادہ معلومات دے سکوں۔

[haroonmcs26]

بہت شکریہ۔

[haroonmcs26]

واپس آ کر کریم آباد والے راستے پر مڑ گئے۔ تھوڑا فاصلہ طے کرنے کے بعد وہ دوراہا آ گیا جہاں سے ایک راہ کریم آباد اور دوسری دیوکار /ایگل نیسٹ کو جاتی تھی۔ وہاں ایک چھوٹا سے بورڈ بھی لگا ہوا تھا۔ ہماری منزل کریم آباد نہیں بلکہ دیوکار تھی اسلئے ہم دیوکار کی طرف جانے والے راستے پر مڑ گئے۔ یہاں سے آگے شروع ہوتا ہے آپ کی ڈرائیونگ اور آپ کی گاڑی کا امتحان۔ کچا پکا راستہ تھا۔ کہیں سڑک بنی ہوئی اور کہیں خستہ حال۔ گاڑی کا ردھم بنائے رکھنا بہت ضروری تھا کیونکہ مجھے پتا تھا کہ میں ایک 1000 سی سی گاڑی کو چلا رہا ہوں جس میں وزن بھی اسکی گنجائش سے زیادہ ہی تھا۔ اسلئے گاڑی کو کچھ سپیڈ سے چلانا ضروری تھا کیونکہ اگر کہیں زیادہ چڑھائی پر بریک لگ گئی تو دوبارہ گاڑی کو حرکت میں لانا مشکل ہو سکتا تھا۔ وہی ہوا جسکا ڈر تھا آگے جانے والی سوک کار نے ایک سپیڈ بریکر پر جہاں سڑک بھی خراب تھی بریک لگائی ۔ وہ تو اپنے جاندار انجن کی وجہ سے بریک لگانے کے بعد آگے نکل گئی لیکن ہماری چھوٹی گاڑی کیلئے مسئلہ پیدا ہو گیا ۔ سپیڈ بریکر کی وجہ سے سپیڈ بھی نہیں مار سکتے تھے اسلئے جب بریک لگائی تو گاڑی کو آگے چلنے میں مشکل درپیش آئی۔ کچھ ساتھی اترے اور اس جگہ کو کراس کیا۔ اس کے بعد دوبار ہ انکو بٹھا لیا گیا۔ آس پاس کثرت سے مختلف پھلدار درخت نظر آ رہے تھے جیسے خوبانی، چیری، شہتوت وغیرہ۔ آگے پھر ایک خراب جگہ پر چڑھائی تھی۔ گاڑی ایکسلریشن میں تھی اسلئے چڑھ رہی تھی لیکن پھر آگے سے چند بڑی کاریں جیسے سوک وغیرہ آئیں۔ پہاڑی علاقوں کا اصول تو یہ ہے کہ اگر راستہ تنگ ہے تو پہلے چڑھائی چڑھنے والی گاڑی کو راستہ دیا جائے لیکن شاید انکے ڈرائیور اس سے نا بلد تھے۔ انھوں نے اپنی گاڑیاں روکنے کی زحمت کرنا گوارا نہ کیااور نتیجے کے طور پر مجھے گاڑی کو بریک لگانا پڑا۔ اس جگہ چڑھائی زیادہ تھی۔ اسلئے گاڑی ہینڈ بریک اور پیڈل بریک لگانے پر بھی پیچھے جانے سے نہیں رک رہی تھی کیونکہ گاڑی میں چار افراد اور اچھا خاصا سامان بھی تھا۔ مجھے پریشانی ہونے لگی اور میں نے سوچ لیا تھا کہ اگر گاڑی نے سلپ ہونا نہ روکا تو گاڑی کی باڈی کو سائیڈ کی پتھروں کی دیوار کے ساتھ لگا کر گاڑی کو روکوں گا۔ ساتھیوں نے جلدی سے اتر کر سائیڈ دیوار سے ایک پتھر اکھاڑا اور گاڑی کے ٹائر کے پیچھے رکھ دیا۔ تب جا کر گاڑی رکی۔ اللہ کا شکر ادا کیا۔ سامنے سے آنے والی پہلی گاڑی کے ڈرائیور پر بہت غصہ آیا جو کہ پندرہ ماڈل سوک کو ڈرائیو کر رہا تھا۔ اسکی اس غلطی کی وجہ سے کوئی حادثہ بھی ہو سکتا تھا۔ جب وہ میرے قریب سے گزرا تو میں نے اس کو کچھ باتیں سنائی بھی لیکن شاید اس کو بھی اپنی غلطی کا احساس ہو گیا تھا اسلئے وہ بغیر کچھ کہے گزر گیا۔ مجھے وہ ڈرائیور ویسے ہی نروس لگ رہا تھا اور وہ تھا بھی پنجاب سائیڈ کا ہی۔ جب وہ گاڑیاں گزر گئیں تو میں نے ساتھیوں سے کہا کہ بیٹھ جاؤ لیکن انھوں نے کہا چڑھائی زیادہ ہے تم چلو ہم پیدل ہی آتے ہیں۔ ایک مقامی سے پوچھا کہ آگے کتنا فاصلہ رہ گیا ہے تو اس نے کہا بس آدھے گھنٹے میں پہنچ جاؤ گے۔ اسکی بات سن کر ساتھی اور پکے ہو گئے۔ یہ تو بعد میں پتا چلا کہ ابھی تقریبا آدھا فاصلہ ہوا تھا اور ابھی چند کلومیٹر کا فاصلہ رہتا تھا۔ بہر حال ساتھیوں کو پیدل آتا چھوڑ کر میں نے گاڑی کو آگے بڑھایا۔ میرے دل میں یہ بھی خدشہ تھا کہ پہلے تو ساتھی ساتھ تھے اور گاڑی کے سلپ ہونے کی صورت میں وہ ٹائر کے پیچھے پتھر لگا سکتے تھے لیکن اب میں اکیلا ہوں اگر ایسی صورتحال پیدا ہو گئی تو کیا ہو گا۔ زبان پر اللہ کا ذکر تھا اور اعصاب مکمل طور پر ایکٹو تھے ۔ میں نے گاڑی کی سپیڈ تھوڑی زیادہ ہی رکھی تھی لیکن ایسا راستہ تھا کہ کہیں کہیں ہی دوسرا گیئر لگتا تھا زیادہ تر پہلا گیئر ہی استعمال ہورہا تھا۔ تنگ راستہ ، کہیں سے پختہ سڑک اور کہیں ٹوٹ پھوٹ کا شکار اوپر سے خطرناک چڑھائی۔ دل ہی دل میں سوچ رہا تھا کہ کہیں اس طرف گاڑی لا کر میں نے کوئی غلطی تو نہیں کی۔ لیکن جب اوکھلی میں سر دیا تو موسلوں سے ڈرنا کیا ۔ اب تو جو ہونا تھا وہ ہو گیا۔ میں جتنا ممکن ہو سکتا تھا اتنا ایکسلریشن بنانے رکھنے کی کوشش کر رہا تھا ۔ کئی موڑ تو بالکل یو ٹرن قسم کے اوپر سے چڑھائی اور تنگ سڑک ۔ ایسے موڑوں کیلئے میں نے ایک ٹیکنیک استعمال کی مسلسل ہارن بجا کر گاڑی کو سپیڈ سے چلا کر بھگاتا لے گیا۔ ہر چند منٹ بعد میں کوئی مناسب جگہ دیکھ کر گاڑی کو تھوڑا ریسٹ دیتا ۔ اس سے پہلے سفر کے دوران میں نے گاڑی کے آر پی ایم میٹر کی سوئی کو 3 سے اوپر نہیں جانے دیا لیکن یہاں تو پانچ چھے تک بھی گئی۔ راستے میں کئی جگہوں پر چھوٹی موٹی آبادی بھی نظر آ رہی تھی۔ چند کلومیٹر مشکل راستے کے بعد نسبتا کچھ کم چڑھائی والا راستہ آ گیا۔ جب منزل کچھ قریب آ گئی تو میں نے اردگرد چھوٹے موٹے ہوٹل بھی دیکھے اور کیمپ سائٹس بھی دیکھیں لیکن میرا ارادہ ایگل نیسٹ کے پاس کہیں کیمپنگ کا تھا تاکہ بلندی پر واقع ایگل راک کے پاس سے غروب آفتاب اور طلوع آفتاب کا نظارہ کیا جا سکے۔ اسلئے سفر جاری رکھا۔ منزل کے قریب کئی بڑے بڑے ہوٹل نظر آئے لیکن ایگل نیسٹ کے پاس جا کر سڑک ختم ہو گئی۔ ایگل نیسٹ ہوٹل کے پاس ایک پارکنگ دیکھ کر میں گاڑی کو وہاں لے گیا۔ پارکنگ فیس تھی 100 روپے۔ پارکنگ والا لڑکا میرے پاس آیا تو میں نے کہا کہ ابھی پرچی نہ کاٹنا کیونکہ ابھی میرے ساتھی آنے والے ہیں پھر ہم سوچیں گے کہ یہاں رکنا ہے یا نہیں۔ اچھا بندہ تھا مان گیا۔

[haroonmcs26]

گاڑی کو پارکنگ میں کھڑی کرکے ساتھیوں سے فون پر رابطہ کیا ۔ ثانی آگے تھا اور عنصر اور یاسر اس سے کافی پیچھے تھے۔لیکن ابھی ان کو آنے میں کافی وقت لگنا تھا۔ کچھ دیر بعد پارکنگ والا آ گیا اور اس سے گپ شپ شروع ہو گئی۔ جب میں نے اسے بتایا کہ ہمارا ارادہ کسی جگہ کیمپنگ کا ہے تو اس نے پوچھا کہ کتنے افراد ہو میں نے کہا کہ چار تو اس نے کہا کہ چار سو روپیہ دے دو اور یہیں کیمپنگ کر لو۔ میں نے کہا یہاں واش روم اور پانی کا انتظام نہیں تو وہ مجھے ساتھ ہی پارکنگ میں موجود ایک چھوٹی بلڈنگ کی طرف لے گیا اور واش روم اور پانی کا نل بھی دکھایا۔ مجھے سودا مناسب لگا اسلئے میں نے اوکے کر دیا. اس میں پارکنگ بھی شامل تھی۔ وہاں پہنچ کر میں نے گردو پیش پر نظر دوڑائی تو مجھے مشہور زمانہ چوٹی ببلی میو تنگ المعروف لیڈی فنگر نظر آئی۔ پارکنگ سے اسکا بہترین نظارہ کیا جاسکتا تھا۔ اسکے آس پاس کی چوٹیوں پر برف بھی واضح نظر آ رہی تھی۔ اس چوٹی کو لیڈی فنگر کا نام دینے کی وجہ اسکی عورت کے ناخن سے مشابہہ شکل ہے۔ یہ چوٹی کوئی بہت زیادہ بلند بھی نہیں لیکن اسکو شہرت بہت ملی ہے۔ ویسے ہے بھی خوبصورت ایسے جیسے کسی خوبصورت خاتون نے اپنی انگلی کا ناخن اوپر آسمان کی طرف اٹھا رکھا ہو۔ میں نے لیڈی فنگر اور آس پاس کی کچھ تصاویر کیمرے کی آنکھ میں قید کیں۔

[haroonmcs26]

فیری لینڈ ہوٹل جس کے پیچھے دیکھیں تو لیڈی فنگر چوٹی نظر آتی ہے۔ پارکنگ سے لی گئی ایک تصویر۔

[haroonmcs26]

سامنے سفید کار کے پیچھے ہوٹل ایگل نیسٹ کی عمارت۔

[haroonmcs26]

وہ پہاڑی جس پر چڑھ کر وادی ہنزہ اور راکا پوشی کا بہترین نظارہ کیا جا سکتا ہے۔ یہ وہی پہاڑی ہے جس پر عقاب کی شکل کی ایگل روک بھی موجود ہے۔ مقامی افراد کے مطابق اس پہاڑی پر پہلے عقابوں کا بسیرہ تھا اور اسی مناسبت سے اسکے ساتھ موجود ہوٹل کا نام بھی ایگل نیسٹ رکھا گیا۔

[haroonmcs26]

میرا ارادہ تو یہ تھا کہ یہاں پہنچ کر بلندی پر جاؤں اور غروب آفتاب کا نظارہ کروں لیکن پھر ساتھیوں کا سوچا کہ وہ لوگ تھکے ہارے یہاں پہنچے گے اور اسکے بعد کھانا پکائیں گے اور تنگ ہوں گے اور وقت بھی زیادہ لگے گا۔ اسلئے غرو ب آفتاب کا نظارہ کرنے کی بجائے میں نے گاڑی سے کھانا پکانے کا سامان نکالا اور کام کا آغاز کر دیا۔ پیاز، ٹماٹر ، ہری مرچ وغیرہ کاٹیں اور گوشت کو دھو کر پریشر ککر میں چڑھا دیا۔ اس سارے عمل میں آدھا پونا گھنٹا گزر گیا اسی دوران میں ثانی بھی آ گیا۔ اس نے کہا کہ پریشر ککر میں کیوں چڑھایا ہے برائلر تو ویسے ہی پک جائے گا۔ میں نے اسے کہا بھی کہ بلندی پر ہیں یہاں ہوا کا دباؤ کم ہے پکنا مشکل ہو گا۔ لیکن اس کے اصرار پر کوکنگ اسکے حوالے کر دی۔ کچھ دیر بعد یاسر اور عنصر بھی پہنچ گئے ۔ یاسر کی حالت چڑھائی چڑھ کر کافی پتلی ہو رہی تھی۔ ایک تو اسکا جسم بھاری تھا دوسرا چڑھائی۔ اسکا تو سانس پھولا ہوا تھا اور پسینے سے تر بتر ۔ آتے ہی پارکنگ میں بچھے ایک کپڑے پر لیٹ گیا۔ اسکو پانی اور پیناڈول کی گولی دی۔ پھر عنصر نے راستہ کا سارا حال احوال سنایا جس کو سن کر سب کا ہنس ہنس کر برا حال ہو گیا۔ ہوا یو ں کہ راستے میں چڑھائی چڑھنے کے دوران یاسر کی بس ہو گئی ۔ راستے میں جا بجا قیام کئے گئے اور ان قیام کے دوران راستے میں آنے والی خوبانیوں ، شہتوت اور چیریوں پر خوب ہاتھ صاف کئے گئے۔ میں پہلے بھی بیان کر چکا ہوں کہ یاسر کی تین عدد بیویاں ہیں۔ وہ اپنی بیوی کو فون کرکے کہتا رہا کہ دعا کرو کہ آج زندہ سلامت پہنچ جاؤں مجھے نہیں لگتا کہ آج بچ جاؤں گا۔ اگر میں نے تمھارے ساتھ کوئی ظلم زیادتی کی ہے تو مجھے معاف کر دینا اور میرے لئے دعا کرنا۔ عنصر سناتا جا رہا تھا اور ہماری ہنسی تھی کہ رکنے کا نام نہیں لے رہی تھی۔ راستے میں وہ جس سے پوچھتے کہ کتنا فاصلہ رہ گیا ہے تو ہر کوئی کہتا بس تھوڑا سے ہے تم پہنچ گئے اور یاسر ہمت کرکے پھر آگے چل دیتا لیکن راستہ شیطان کی آنت کی طرح لمبا ہوتا چلا گیا۔ لیکن بالآخر یاسر بمشکل یہاں پہنچنے میں کامیاب ہو گیا۔ انکے پیدل سفر کی کچھ تصاویر۔

[haroonmcs26]

کھانا پکانے کی کچھ تصاویر۔

[haroonmcs26]

جب میں یہاں پہنچا اور ارادہ کر لیا کہ یہاں ہی کیمپنگ کرنی ہے۔ تو میں نے پارکنگ پر نظر دوڑائی تاکہ کیمپ کیلئے کسی بہتر جگہ کا انتخاب کیا جا سکے تو پارکنگ سے کچھ بلندی پر سبزے کے درمیان ایک جگہ نظر آئی جہاں پہلے ہی ایک چٹائی بچھی ہوئی تھی۔ وہاں پہلے بھی کوئی کیمپنگ کر چکا تھا ۔ میں نے اسی جگہ کا انتخاب کیا ۔ اور کھانا پکانے کی تیاری سے پہلے ہی وہاں کیمپ لگانے میں مصروف ہو گیا۔ اس میں پارکنگ والے لڑکے نے بھی میری مدد کی۔ لیکن جب کیمپ کی اسٹکس کو لگا رہے تھے تو پارکنگ والے لڑکے نے زور کچھ زیادہ ہی لگا دیا اور اسٹک کو پھنسانے والا جوائنٹ کیمپ سے الگ ہو کر اسکے ہاتھ میں آگیا۔ اگر یہ جوائنٹ والا حصہ کیمپ کے ساتھ نہ لگے تو اسمیں اسٹک نہیں پھنستی اور کیمپ بھی کھڑا نہیں ہوتا۔ یہاں پر جو سامان میں نے گاڑی میں ٹھونسا ہو ا تھا وہ کامیاب آ گیا۔ میں نے گاڑی میں سوئی دھاگہ بھی رکھا ہوا تھا اسلئے اس جوائنٹ والے حصے کو دوبارہ کیمپ کے ساتھ سی دیا گیا اور کیمپ کو ایستادہ کر دیا گیا۔ ہماری کیمپ کی ایک تصویر۔

[haroonmcs26]

وہی ہوا جس کا مجھے ڈر تھا گوشت تھا کہ گلنے کا نام ہی نہیں لے رہا تھا ۔ تھک ہار کر اسے دوبارہ پریشر ککر میں ڈالا گیا ۔ جب کھانا تیار ہو گیا تو گاڑی میں رکھی ہوئیں روٹیاں بھی نکال لی گئیں۔ گوشت مکمل نہیں گلا تھا اسلئے کچا پکا جیسا بھی پکا تھا صبر شکر کرکے کھا لیا۔ اسکے بعد انڈے ابالے گئے اور چائے تیار کی گئی۔ چائے زبردست بنی تھی جو کہ ڈبےکے دودھ سے تیار کی گئی تھی۔ کھانا کھانے کے بعد یاسر کی حالت بہت بہتر ہو گئی تھی۔ کچھ دیر گپ شپ مارنے کے بعد ہم سونے کیلئے کیمپ میں گھس گئے جبکہ یاسر نے کہا کہ وہ گاڑی میں سوئے گا شاید اسے ابھی تک ناران والا خوف تھا۔

[haroonmcs26]

رات کو جگمگ کرتےہوٹل فیری لینڈ کا منظر۔

[haroonmcs26]

ہوٹل ایگل نیسٹ کی پچھلی جانب سے لی گئی ایک تصویر۔

[haroonmcs26]

پانچواں دن مورخہ 20 جولائی 2017ء
**ابھی ہلکا ہلکا اندھیرا ہی تھا کہ میں بیدار ہو گیا۔ ساتھی ابھی سو رہے تھے۔ میں کیمپ سے باہر نکلا ، واش روم سے فارغ ہونے کے بعد وضو کیا اور پہاڑی کی بلندی کی طرف چل پڑا ۔ ارادہ تھا کہ ایگل راک والی پہاڑی پر ہی نماز ادا کروں گا اور پھر وہیں سے ہی طلوع آفتاب کا نظارہ کروں گا۔ لوگ اسی وجہ سے دیوکار آتے ہیں تاکہ بلندی سے پوری وادی ہنزہ کا نظارہ کریں اور طلوع یا غروب آفتاب کا نظارہ کریں۔ جب طلو ع یا غروب آفتاب کے وقت سورج کی کرنیں راکا پوشی، لیڈی فنگر اور دیگر چوٹیوں پر پڑتیں ہیں تو اس کا منظر ہی کچھ اور ہوتا ہے۔ میں بھی اپنے یہاں آنے کے مقصد کو سوکر فوت نہیں کر سکتا تھا اسلئے جب دنیا سو رہی تھی تو میں پہاڑی کی بلندی کی طرف گامزن تھا۔ ایگل نیسٹ ہوٹل کے ساتھ سے ہی جہاں پارکنگ کی انٹری تھی وہاں سے ایک پگڈنڈی نما راستہ پہاڑی کی بلندی کی طرف جا رہا تھا۔ پہاڑی کوئی اتنی بھی بلند نہیں تھی کہ بندے کی بس ہو جائے۔ وہاں پہنچ کر ایک ہموار سی چٹان منتخب کرنے کے بعد رب کائنات کے آگے سر بسجود ہو گیا۔ ایسی جگہو ں پر اللہ کے آگے جھکنے کا بھی ایک خاص ہی احساس ہوتا ہے۔ احساس ہوتا ہے کہ اردگرد بکھرے ہوئے پہاڑی سلسلے جن کو عظیم کہہ کر پکارا جاتا ہے ایک ہستی ایسی بھی ہے جو ان سے بھی بہت بلند ہے۔ جس نے اتنے اونچے پہاڑوں کو پیدا کیا اس ہستی کی عظمت کا اندازہ لگانا ہی ممکن نہیں۔ **