جولائی 2017 اور گلگت بلتستان

[haroonmcs26]

مزیدار مٹن مکھن کڑاہی۔

[haroonmcs26]

اسٹیڈیم فوڈ سٹریٹ کا ایک منظر۔

[haroonmcs26]

کھانے کے دوران ہی ہم اس موضوع پر بھی بات کرتے رہے کہ رات راولپنڈی میں گزاری جائے یا آگے روانہ ہوا جائے ۔ آخر متفقہ فیصلہ کیا گیا کہ یہاں سے روانہ ہو کر رات ہری پور میں گزاریں۔ تاکہ کچھ نہ کچھ فاصلہ تو طے ہو۔ کھانے کے بعد اپنے میزبانوں کا اتنے پر تکلف اور مزیدار کھانے پر شکریہ ادا کیا اور ان سے اجازت لیکر گاڑی کے پاس آئے تو دیکھا کہ اس کے پیچھے ایک ایف ایکس ٹیکسی پارک کی ہوئی ہے۔ وہ تو شکر ہے کہ ڈرائیور وہیں موجود تھا ورنہ اور دیر ہو جاتی ۔ دس بجے سے زیادہ کا وقت ہو گیا تھا۔ ہم جس راستے سے فوڈ سٹریٹ آئے تھے اسکی بجائے ہم سیدھے چلے گئے کہ وہاں سے گھوم کر آ جائیں گے اور یہی ہم سے غلطی ہو گئی کیونکہ آگے جاکر ہم ایک غلط موڑ مڑ گئے اور آپ کو پتا تو ہے کہ اسلام آباد راولپنڈی میں اگر آپ نے غلط موڑ لے لیا تو کئی کلومیٹر کے بعد ہی واپسی ہو گی۔ کچھ افراد سے پوچھا بھی لیکن ہر ایک کا اپنا طریقہ راستہ بتانے کا ۔ میں نے گاڑی ایک طرف روکی اور گوگل میپ آن کرلیا اور اس پر جی ٹی روڈ کو اپنی منزل کے طور پر منتخب کرلیا اسکے بعد گاڑی آگے بڑھا دی اور گوگل میپ کی وائس انسٹرکشن کے مطابق چلتے گئے۔ اس دوران مذاق کا سلسلہ بھی جاری رہا۔ ثانی مذاق میں کہتا رہا کہ یہ جو گوگل میپ پر عورت کی آواز میں ہدایات مل رہیں ہیں ان پر یقین نہ کرنا یہ امریکی ہے ہمیں کہیں اور پہنچا دے گی۔ ویسے بھی ثانی نے کبھی گوگل میپ استعمال نہیں کیا تھا اس لئے وہ اس بات پر اصرار کرتا رہا کہ کسی راہگیر سے پتا پوچھ لو لیکن ہم گوگل میپ کے مطابق ہی چلتے رہے۔ جب ہم جی ٹی روڈ پر چڑھ گئے تو ثانی کو سکون آیا اور حیران ہو کر کہنے لگا یار کمال ہے اس نے ہمیں بالکل صحیح پہنچا دیا۔ ہم نے کہا شکر ہے تمھیں بھی اس پر یقین آیا۔ جی ٹی روڈ پر پہنچ کر سوچا کہ گاڑی کی ٹینکی فل کروا لی جائے ۔ راستے میں ایک پمپ آیا جو کہ کسی نئی ہی کمپنی کا تھا کیونکہ پہلے کبھی اسکا نام بھی نہیں سنا تھا۔ ڈرتے ڈرتے صرف پانچ سو کا ہی پٹرول ڈلوایا جس کی مقدار 6.98 لٹر تھی۔ وقت ہوا تھا 11 بجکر 19 منٹ۔ سوچا کہ کسی اور پمپ سے جا کر ٹینکی فل کروالیں گے۔ کچھ آگے جا کر ایک اٹک کمپنی کا پمپ آیا تو اس سے ٹینکی فل کروا لی ۔ 1500 روپے میں 20.96 لٹر پٹرول ۔ اب ہمیں پٹرول کی طرف سے اطمینان تھا اور ارادہ تھا کہ ایک بار مانسہرہ سے پہلے ٹینکی فل کروا لیں گے تو پھر گلگت بلتستان میں داخل ہونے کے بعد ہی پٹرول ڈلوائیں گے۔ اب ہم نے دوبارہ گوگل میپ سے مدد لینا شروع کر دی۔ ایک جگہ جا کر گوگل میپ نے شش و پنج میں ڈال دیا وہ ہمیں جو ہدایات دے رہا تھا بلکہ عورت کی آواز میں تھی اسلئے دے رہی تھی کہنا زیادہ مناسب ہو گا۔ اسکے مطابق ایک چوک کے پاس ہمیں ایک رہائشی کالونی کے اندر جانا تھا۔ وہاں رک کر ایک شخص سے پوچھا تو اس نے کہا کہ آپ نے ہری پور کی طرف جانے والا روڈ پیچھے چھوڑ دیا ہے۔ واپس مڑکر جائیں۔ ایک اور شخص سے پوچھا تو اس نے کہا کہ اسی چوک سے جو روڈ بائیں طرف جا رہا ہے اس پر چلتے جاؤ یہ چھوٹا راستہ ہے۔ ہم اسکے کہنے کے مطابق اس روڈ پر چل پڑے ۔ گوگل میپ والی خاتون ہمیں بار بار واپس جانے کا کہتی رہی لیکن ہم نے اسکی ایک نہ سنی۔ یہی ہماری غلطی تھی۔ کیونکہ وہ سڑک تو مختصر تھی لیکن آگے جا کر خراب ہو گئی اور اس پر سپیڈ بریکر بے تحاشا۔ ہمیں زیادہ تر اس پر ٹرک ہی چلتے نظر آئے ۔ لیکن اب ہم اتنا فاصلہ طے کر چکے تھے کہ واپس بھی نہیں جا سکتے تھے۔ مجبورا چلتے جا رہے تھے۔ گاڑی کی رفتار کم تھی۔ دوسرا یا زیادہ سے زیادہ تیسرا گیئر تھا۔ ہمیں بعد میں پتا چلا کہ یہ راستہ خانپور ڈیم کے پاس سے گزر کر جاتا ہے۔ باتوں ہی باتوں میں گوگل والی خاتون کو یاد بھی کر رہے تھے کہ بیچاری چیخ چیخ کر ہر یو ٹرن پر کہتی رہی واپس مڑ جاؤ لیکن ہم نے ہی اس کی نہ مانی آخر اسکی بد دعا تو لگنی تھی نا۔ ویسے بھی جب کوئی خاتون بار بار کہے تو اسکی ماننی ہی پڑتی ہے لیکن ہم نے ایسا نہ کیا تھا اسلئے بھگتنا پڑ رہا تھا۔ اب اتنی سست رفتاری سے سفر کرتے ہوئے سوچ رہے تھے کہ کاش اس بیچاری کی مان لیتے لیکن اب بیچاری وہ نہیں تھی بیچارے تو ہم بن گئے تھے۔ بہر حال سست رفتاری اور ٹوٹی پھوٹی سڑک کو جو کہ زیادہ وسیع بھی نہ تھی برداشت کرتے ہوئے چلتے رہے اور بالآخر شاہراہ قراقرم پر چڑھ گئے ۔ اب سڑک کی حالت بہت اچھی تھی۔ پچھلے سال جب میں یہاں سے گزرا تھا تو اسکی حالت اتنی زیادہ اچھی نہیں تھی۔ اب سفر تیز رفتاری سے ہو رہا تھا پھر بھی رات ایک بجے ہری پور پہنچے ۔ ثانی نے اپنے ایک دوست کو پہلے ہی فون کر دیا تھا کیونکہ ہمارا ارادہ وہیں رات گزارنے کا تھا۔ ہری پور میں شیل پمپ کے سامنے ہی موجود ایک گلی سے ہم نے شاہراہ قراقرم کو الوداع کہا اور آبادی میں سے گزرتے ہوئے ایک گھنے باغ سے گزرنے والی سڑک پر پہنچ گئے۔ رات کے اس پہر دونوں طرف موجود گھنے باغ کا منظر دلفریب بالکل بھی نہیں لگ رہا تھا الٹا ویران سڑک دیکھ کر پریشانی ہی ہو رہی تھی۔ لیکن وہ فاصلہ کچھ زیادہ نہیں تھا ۔ مین سڑک سے تقریباایک کلومیٹر کا فاصلہ طے کرکے ہم ثانی کے دوست کے پاس پہنچ گئے ۔ کافی تھک چکے تھے اور نیند بھی آرہی تھی۔ سوچ یہ تھی کہ علی الصبح یہاں سے روانہ ہو کر صبح سات بجے سے پہلے ایبٹ آباد کو کراس کر لیا جائے۔ گاڑی کو ساتھ موجود گلی میں پارک کرکے لاک کیا اور مکان میں داخل ہوئے ۔ یہ عمارت جس میں کئی کمرے تھے ایک آئس کریم ڈسٹری بیوٹر سٹور کا کام کرتی تھی۔ ہر طرف آئس کریم والی موٹر سائیکلیں اور سائیکلیں کھڑی تھیں۔ کچھ کمروں میں انکی لیبر آرام کر رہی تھی۔ ثانی کا دوست جس کا نام عمران تھا وہ ہمیں ایک صاف ستھرے کمرے میں لے گیا جہاں فرشی بستر کا انتظام کیا گیا تھا۔ عنصر اور یاسر تو جاتے ہی انٹا غفیل ہو گئے ۔ میں اور ثانی جاگ رہے تھے۔ عمران ہمیں ایک اور کمرے میں لے گیا جہاں بہت سے فریج رکھے تھے جو کہ آئس کریم سے بھرے ہوئے تھے۔ اس نے ہمیں آئس کریم پیش کی اورہم دونوں نے ایک ایک کپ ٹھنڈی آئس کریم کا کھایا۔ جبکہ ہم نے اسے اپنے ساتھ رکھا ہوا بروسٹ پیش کیا اور باقی بروسٹ ایک فریج میں رکھ دیا گیا تاکہ خرا ب نہ ہو۔ اسکے بعد ہم نے بھی نیند کی وادی میں چھلانگ لگا دی جس میں عنصر اور یاسر پہلے ہی کافی فاصلہ طے کر چکے تھے۔ وہ دوست جو میرے پچھلے سال کے سفر کی روئیداد جو کہ پاک وہیل پر "تین کزنز ، ناران، ہنزہ اور خنجراب" کے نام سے ہے پڑھ چکے ہیں وہ جانتے ہوں گے کہ پچھلے سال بھی ہم نےواپسی پر اسی جگہ مختصر قیام کیا تھا ۔

[Aqeel1982]

Bhai unki website he bata do?

[haroonmcs26]

https://www.google.com.pk/url?sa=t&rct=j&q=&esrc=s&source=web&cd=1&cad=rja&uact=8&ved=0ahUKEwiA3vOC9efVAhXD1RoKHaGsBDUQFggkMAA&url=http%3A%2F%2Fwww.higher.com.pk%2Fproducts.php%3FProdCatName%3DBACK%2520PACKS%2FBAGS&usg=AFQjCNGFNwyPlOwvDJvBEHki74jIySkmgg

[Aqeel1982]

Thanks

[rehankillbill]

Haroon bhai kya khene ek dil jasb khani ki tarah apka safarnama hai parh kar dil bohat khush hogaya , mein bhe an kareeb Swat ki taraf jane wala hoon apka safar nama parh kar rah nahi ja rah muje se or

[haroonmcs26]

بہت شکریہ جناب۔ کوشش کر رہا ہوں کہ اپنے سفر نامے کو اسطرح سے آپ لوگوں کے سامنے بیان کروں کہ پڑھنے والے بھی اپنے آپ کو ہمارے ساتھ محسوس کریں۔ دوسرا ان علاقوں کا سحر ہی اتنا ہے کہ وہ لوگوں کو اپنی طرف کھینچتا ہے۔ جیسے آپ سوات کی طرف کھنچ رہے ہیں۔ اللہ آپ کو خیرو عافیت سے واپس لائے۔

[haroonmcs26]

رات ایسے بے خبر سوئے کہ صبح پونے سات بجے جا کر آنکھ کھلی۔ رات کو ایک گھنٹہ بجلی بھی گئی لیکن ہمیں پتا تک نہ چلا کیونکہ تھکاوٹ کی وجہ سے بے ہوش ہو کر سوئے تھے ۔ قضا نماز ادا کی۔ برش ، مسواک ، منہ دھونا اور نہانے دھونے میں تقریبا ایک گھنٹہ لگ گیا۔ ہم اپنے ٹارگٹ سے لیٹ ہو گئے تھے۔ جلدی جلدی تیاری کرکے وہاں سے روانہ ہوئے ۔ عمران نے بہت کہا کہ ناشتہ کرکے جاؤ لیکن اس صورت میں ہمیں مزید دیر ہو جاتی۔ دوسرا ناشتہ کا انتظام ہمارے پاس تھا ۔ ہمارے جانے کے بعد جب عمران کا بڑا بھائی آیا اور اسے پتا چلا تو اس نے فون کرکے بھی ہم سے گلہ کیا کہ ناشتہ تک نہ کیا۔ ہم نے فون پر انکا شکریہ ادا کیا اور کہا کہ اگر موقع ملا تو پھر کبھی سہی۔ روانگی کا وقت 8 بجکر 20 منٹ۔ میٹر ریڈنگ 53099۔ عمران بھائی کی رہائش سے شا ہراہ قراقرم کی طرف آتے ہوئے لی گئی ایک تصویر جس میں سڑک کے دونوں طرف باغات نظر آرہے ہیں

۔

[haroonmcs26]

ہمارے پاس آڑو ابھی بھی موجود تھے ان کے شاپر میں کولر سے پانی ڈال کرانکو دھویا اورحویلیاں سے آگے آنے والے پل کے پاس ایک ایک آڑو تناول فرمایا۔ حویلیاں کے بعد آنے والے پل کا ایک منظر۔ جس کے پیچھے نظر آنے والے سر سبز پہاڑ وں کا منظر آنکھوں کو سکون دینے والا تھا اور ہمیں خوبصورت وادیوں کی طرف بلا رہا تھا

۔

[Atif_Jawaid]

@haroonmcs26 ..... bhai ... Safar nama ki speed bohat slow hai ... :((

dil keh raha hai abi sara mil jae abi sab parh lou ..

[haroonmcs26]

آپ کی بات تو ٹھیک ہے لیکن بھائی کیا کریں دنیا میں اور بھی کام ہیں محبت کے سوا۔

[haroonmcs26]

ابھی سڑک پر اتنا رش نہیں تھا بس نارمل سی ٹریفک تھی اسلئے سفر تیزی سے جاری تھاشام کو تو اس سڑک پر کافی رش ہو جاتا ہے۔ ایبٹ آباد سے پہلے لی گئی کچھ تصاویر۔

[haroonmcs26]

ہری پور سے نکلنے کے بعد ہم کوئی ایسی دوکان ڈھونڈتے رہےجہاں سے ہمیں دہی مل سکے لیکن ہمیں کوئی بھی ایسی دوکان نہ مل سکی۔ آٹھ بجکر تنتالیس منٹ پر ہم ایبٹ آباد پہنچ گئے۔ میٹر ریڈنگ 53111۔ لاری اڈہ سے آگے بازار میں رک گئے تا کہ وہاں سے دہی کو کھوجا جا سکے۔ جوان میدان میں اتر پڑے اور لگے ڈھونڈنے کوئی دوکان جہاں سے اس گو ہر نایاب کو ڈھونڈا جا سکے ۔ ان علاقوں میں تو ہمیں قدرتی دودھ اور دہی گو ہر نایاب ہی لگ رہے تھے جن کی کمی ہم اپنے پورے سفر میں محسوس کرتے رہے۔ بالآ خر ایک جگہ سے دہی مل ہی گیا 90 روپے فی کلو کے حساب سے لیکن ہم نے پورے سو روپے کی ہی کروا لی۔ فیئر اینڈ لولی ونٹر فیئرنس کی ایک چھوٹی ٹیوب بھی لی جو کہ 70 روپے کی ملی ۔ ثانی دو رائزک کیپسول بھی لیکر آیا ۔ میں نے پوچھا کہ یہ کیا ہے ؟ کہنے لگا کہ پیٹ کی خرابی کیلئے لئے ہیں کسی کا پیٹ خراب ہو جائے تو استعمال کر لے۔ میں نے کہا بھائی پہلے مجھ سے تو پوچھ لو میں نے پیٹ خرابی کی ادویات پہلے ہی رکھی ہوئیں ہیں۔ میں نے کہا کوئی بھی چیز کی ضرورت ہو تو پہلے مجھ سے پوچھ لو تقریبا ضرورت کی ہر چیز ساتھ رکھی ہوئی ہے۔ اس پر اس نے چیک کرنے کیلئے مختلف چیزوں کے نام لینا شروع کر دیا اور ہر بار میرا جواب یہی ہوتا کہ یہ بھی موجود ہے یہ بھی موجود ہے۔ وہ سب حیران رہ گئے کہ کیا پورا گھر ہی ساتھ لیکر چل رہے ہو۔ اس بات پر کچھ دیر مذاق بھی چلتا رہا۔ ایبٹ آباد بازار کی ایک تصویر۔

[haroonmcs26]

دہی وغیرہ لینے کے بعد ہم نے دوبارہ گاڑی کو آگے بڑھا دیا ۔ ایبٹ آباد میں ٹریفک جام کا بہت خطرہ ہوتا ہے لیکن اللہ کا شکر کہ ہم بغیر کسی پریشانی کے ایبٹ آباد سے گزر گئے اور میں نے سکون کا سانس لیا کیونکہ پچھلے سال میں چار بار یہاں سے گزرا تھا جس میں تین بار یہاں ٹریفک میں پھنسا تھا۔ ایبٹ آباد سے آگے لی گئی تصاویر۔

[haroonmcs26]

ایک آڑو سے کب تک گزارا ہو سکتا تھا آخر کار پیٹ میں بھوک سے چوہوں کی دوڑ شروع ہو گئی لیکن ہم ان کو زیادہ لمبی دوڑ لگوانا نہیں چاہتے تھے کیونکہ پہاڑی علاقہ تھا بیچارے بھاگ بھاگ کر تھک جاتے اسلئے اب ہمار ا ارادہ تھا کہ کسی جگہ رک کر ناشتہ کرلیا جائے ۔ ناشتے کیلئے ہمارے پاس رات کا پیک کیا ہوا بروسٹ تھا جس کے ساتھ کیلئے دہی بھی مل گیا تھا۔ میں نے مشورہ دیا کہ کوئی بیکری دیکھ کر وہاں مائکرو ویو اوون سے بروسٹ کو گرم کروا لیا جائے۔ باقی نے کہا کہ مانسہرہ میں دیکھتے ہیں جس پر میں نے انھیں بتا یا کہ ہم مانسہرہ شہر میں داخل نہیں ہوں گے بلکہ بائی پاس سے گزر کر بالا کوٹ کی طرف نکل جائیں گے۔ یہیں راستے میں ہی نظر رکھو کہیں نہ کہیں کوئی بیکری ضرور مل جائے گی ۔ لو جی دہی کے بعد اب بیکری کی تلاش۔ بالآخر کمانڈوز نے مانسہرہ سے تقریبا 12 کلومیٹر پہلے ایک بیکری کو تاڑ لیا۔ گاڑی کو وہاں روک دیا۔ عنصر اور ثانی نے جب بروسٹ کو شاپر سے باہر نکالا تو اسمیں سے کھیر کی ایک پلیٹ اور نکل آئی جو کل رات ہماری نظروں سے بچ گئی تھی۔ عنصر اور ثانی بروسٹ کو گرم کروانے کیلئے چلے گئے اور میں اور یاسر کھیر سے گفتگو کرنے میں مصروف ہو گئے کافی میٹھی گفتگو تھی۔ کچھ دیر بعد عنصر اور ثانی بروسٹ کو گرم کروا کر واپس آئے۔ کیچپ کے آدھ پاؤ پیکٹ اور گرم کرنے کے بیکری والوں نے 100 روپے لیے تھے۔ وہاں سے کچھ آگے گئے تو شیل کا ایک پمپ نظر آیا میں ہردفعہ جب بھی یہاں سے گزرا تو میں نے پٹرول اسی پمپ سے ڈلوایا تھا ۔ اسلئے وہاں رک کر ٹنکی فل کروا لی ۔ ایک وجہ یہ بھی تھی کہ پچھلی دفعہ جب میں آیا تھا تو ناران کے پٹرول پمپ کا تجربہ اچھا نہ رہا تھا میں نے محسوس کیا تھا کہ انکی مقدار پوری نہیں تھی۔ اسلئے یہاں سے ہی ٹنکی فل کروا لی۔ وقت 9 بجکر 42 منٹ، میٹر ریڈنگ 53130، 550 روپے میں 7.54 لٹر پٹرول۔ پٹرول ڈلوا کر دوبارہ سفر شروع ہو گیا۔ اب ہم کوئی جگہ ڈھونڈ رہے تھے جہاں رک کر ناشتہ کیا جا سکے۔ یاسر نے کہا کہ کسی ہوٹل پر ہی رک کر وہیں سے تازہ روٹیاں لگوا کر اور وہی بیٹھ کر ہی ناشتہ کر لیا جائے اسلئے مانسہرہ سے پہلے ہی شاہ جی ہوٹل پر بریک لگا دی۔ ویٹر کو 8 روٹیوں کا آرڈر دیا وہ 6 لیکر آیا ۔ روٹیاں کافی بڑی تھیں اسلئے ہم نے نے 6 کو ہی کافی سمجھا ۔ ریٹ 10 روپے فی روٹی کے حساب سے تھا۔ شامی اور بروسٹ کو نکال کر میز پر رکھا ساتھ دہی کو پلیٹ میں منتقل کیا اور کیچپ بھی نکال کر شروع ہو گئے ۔ بروسٹ اور شامی ہماری ضرورت سے زیادہ تھے لیکن اب ہم انھیں مزید اپنے ساتھ نہیں رکھ سکتے تھے کیونکہ ان کے خراب ہونے کا خطرہ تھا۔ اسلئے جتنا کھا سکتے تھے کھا لیا اور باقی ویٹر کے حوالے کر دیا۔ یاسر کا چائے پینے کو دل کر رہا تھا باقی کا موڈ نہیں تھا کیونکہ باقی نے بچ جانے والا دہی پیا تھا۔ اسلئےیاسر کے لئے 30 روپےکے حساب سے چائے کا ایک کپ منگوا لیا۔ اتنی دیر میں باقی واش روم وغیرہ سے فارغ ہو گئے جو کہ ہوٹل کے باہر ہی بنا ہوا تھا۔ ناشتے کے وقت لی گئی تصاویر۔

[haroonmcs26]

ناشتے کے دوران ویگن آر ہوٹل کے پارکنگ ایریا میں سستا تی رہی اسکو ناشتہ ہم نے پہلےہی پٹرول پمپ سے کروا دیا تھا۔

[haroonmcs26]

ہوٹل مین روڈ پر ہی ایک کھلی جگہ واقع تھا جس کے اردگرد کافی جگہ تھی اور وہاں سے پہاڑ اور ان پر پھیلے ہوئے سر سبز درخت نظر آرہے تھے۔

[haroonmcs26]

دائیں طرف ثانی اور بائیں طرف یاسر۔ ناشتے کے دوران لی گئی ایک تصویر۔ یاسر باتیں کرنے کی بجائے بڑے انہماک سے کھانے پر ہاتھ صاف کرتے ہوئے۔ اسے شامی کباب بہت پسند آئے تھے اسلئے زیادہ تر اس نے ہی کھائے۔

[hasibsaied3]

Shukria Saath Sair Karaney Ka:slight_smile: