تین کزنز ، ناران، ہنزہ اور خنجراب

[haroonmcs26]

راستے میں ایک جگہ کرین ٹرک میں مٹی بھرتے ہوئے۔

[haroonmcs26]

دریا پر بنے ایک پل کو پار کیا اور اپنے بائیں طرف دیکھا ۔ سبحان اللہ کیا خوبصورت نظارہ تھا۔ آنکھوں میں ٹھنڈک کی طرح اترتا ہوا سبز پانی جو پہاڑوں کے دامن تک پھیلا ہوا تھا۔ ہم زندگی میں پہلی بار سبز پانیوں کی شہزادی -جھیل لولو سر- کا نظارہ کر رہے تھے۔ پل کے پاس پارکنگ کی جگہ کم تھی ورنہ تو دل کر رہا تھا کہ یہاں ہی گاڑی روک کر اس کا درشن کریں۔ تھوڑی آگے نسبتا کھلی جگہ پر گاڑی کو روک کر باہر چھلانگیں لگا کر اتر ے۔ یہ ان نظاروں میں سے ایک نظارہ تھا جس نے مجھے اس سفر کے دوران بہت متاثر کیا۔ جن کو بیان کرنے کے لئے میرے پاس الفاظ نہیں۔ لیکن دوستوں ایک بات آپ کو بتاتا چلوں کہ ایک ایسا شخص جس کو فطرت سے دلچسپی نہ ہو شاید ان کے لئے یہ جھیل صرف پانی کا ایک ذخیرہ ہو جو پہاڑوں سے اترتی ہوئیں کئی ندیوں سے بنتی ہے اور جہاں سے دریائے کنہار کا جنم ہوتا ہے۔ لیکن ایک فطرت سے محبت کرنے والے کیلئے اس میں بہت کشش ہے۔ کچھ دیر تک اسکے سبز حسن کو دیکھتے رہے۔ کچھ دیر کے بعد ہوش سنبھالی تو کچھ تصویریں بھی لیں۔ جھیل کے پار ایک طرف کچھ برف بھی نظر آ رہی تھی۔ یہ بھی سو چ رہا تھا کہ اب جبکہ اردگرد کے پہاڑوں پر برف پگھل چکی ہے اگر اسوقت یہ جھیل اتنی حسین نظر آ رہی ہے تو جب یہ پہاڑ برف کی چاندی کا زیور پہن لیتے ہوں گے تو اس کا حسن کیا قیامت ڈھاتا ہو گا۔ دل میں خواہش جاگی کاش اسوقت بھی زیورات سے لدی پھندی اس شہزادی کا نظارہ کر سکوں لیکن ساتھ دماغ یہ بھی کہہ رہا تھا کہ بھائی جان اسوقت تو یہ راستہ ہی بند ہوتا ہے۔ اسلئے صرف تصور پر اکتفا کرو اور واپس لوٹ آؤ ابھی ہنزہ بہت دور ہے۔

[Ghauri3]

[RIGHT]بہت اعلی کمال کا لکھا ہے۔ شاندارانداز بیاں ہے۔ میں نے بھی عبدالوحید طارق صاحب کو دیکھ کر لکھنا شروع کیا مگر آپکی تحریر شاندار ہے۔

بھائی جی فونٹس کو بڑا کرنے کے لیے آپکو چاہیے کہ لکھ کر پوسٹ کرنے کے بعد ایڈیٹ پوسٹ پر کلک کریں اورگوایڈوانسڈ میں جائیں اور لکھے ہوئے کو الائن رائیٹ کریں اور فونٹ کو 5 کرلیں اورسیو چینجز کر لیں۔ شکریہ

[/RIGHT]

[haroonmcs26]

[RIGHT]بہت اعلی کمال کا لکھا ہے۔ شاندارانداز بیاں ہے۔ میں نے بھی عبدالوحید طارق صاحب کو دیکھ کر لکھنا شروع کیا مگر آپکی تحریر شاندار ہے۔

بھائی جی فونٹس کو بڑا کرنے کے لیے آپکو چاہیے کہ لکھنے کے بعد ایڈیٹ پوسٹ پر کلک کریں اورگوایڈوانسڈ میں جائیں اور لکھے ہوئے کو الائن رائیٹ کریں اور فونٹ کو 5 کرلیں اورسیو چینجز کر لیں۔ شکریہ

[/RIGHT]

حوصلہ افزائی کیلئے آپ کا ممنون ہوں۔ بے حد شکریہ۔ میں گوگل کروم ویب براؤزر استعمال کر رہا ہوں۔ آپ کی ہدایات کے مطابق کام کیا لیکن ایسی کوئی آپشن نظر نہیں۔

[haroonmcs26]

جھیل لولو سر کے ساتھ ایک یاد گار تصویر۔

[haroonmcs26]

ابھی تک فطرت کے حسن میں گم۔

[Ghauri3]

اس سے کوشش کریں پلیز۔۔۔۔۔۔۔۔

[haroonmcs26]

ویگن آر بھی حیران کہ کہاں لاہور کی گرمی اور کہاں یہ خوبصورت نظارہ۔

[haroonmcs26]

جھیل کے کنارے۔

[haroonmcs26]

وسیم ٹائی ٹینک کا سین کرتے ہوئے لیکن یہاں ٹائی ٹینک کی ہیروئن کی جگہ اصل ہیروئن لولو سر جھیل ہے۔

[haroonmcs26]

ایک ندی ۔ ایسی ہی ندیوں کے ملنے سے جھیل لولوسر وجود میں آ تی ہے۔ پہاڑوں پر تیرتے بادلوں کا خوبصورت منظر۔

[haroonmcs26]

دل کے نہ چاہنے کے باوجود لولوسر کو الوداع کہا اور آگے روانہ ہوئے۔ آگے ایک چھوٹے گلیشیر کے پاس رک گئے۔ رکنے کی وجہ تھی کہ جسم میں کچھ پریشیر محسوس ہو رہا تھا۔ ساتھ موجود لوٹے میں پانی بھرا اور سڑک کے کنارے بنی ایک دنیا سے چھپی ہوئی جگہ میں چھپ کر جسم کو پر سکون کیا۔ میرے بعد وسیم کی باری تھی ۔جب وسیم بھی اس خفیہ جگہ پر تھا تو میں نے اور احمد نے پتھر سے برف کھرچ کھرچ کر اس کو نرم کیا اور آتے ہی وسیم پر بمباری کا آغاز کر دیا۔ کچھ بم اسکی شرٹ میں بھی چلے گئے جس سے وہ کچھ دیر اچھلتا رہا۔ وسیم کا بھی ارادہ تھا کہ ابھی انتقام لیا جائے لیکن ہم نے اس کو اسکا موقع دیے بغیر جلدی سے روانگی کا اعلان کر دیا۔

[haroonmcs26]

جیسے جیسے بابو سر ٹاپ قریب آ رہا تھا۔ موسم اور پہاڑوں کے مناظر خوبصورت ہوتے جا رہے تھے۔ ناران کہیں دور رہ گیا تھا۔ پہاڑوں پر اٹکھیلیاں کرتے بادل خوبصورت نظارہ دے رہے تھے۔ بہت سی چوٹیوں پر ابھی بھی برف موجود تھی۔ راستے میں وہ چھوٹی چھوٹی ندیاں بھی نظر آ رہیں تھیں جو آگے جھیل لولوسر میں شامل ہو رہیں تھیں۔ جہاں تک نظر جاتی تھی بلندو بالا وسیع پہاڑی سلسلے نظر آ رہے تھے جن کا نظارہ مسحور کن تھا۔جیسے جیسے بابو سر ٹاپ کی طرف جا رہے تھے چڑھائی زیادہ ہوتی جا رہی تھی۔ کئی جگہ پر تو پہلا گیئر لگانا پڑا۔کئی موڑ بھی بالکل یو ٹرن تھے۔ بابو سر ٹاپ سے پہلے 1 سے 2 کلو میٹر کا روڈ زیر تعمیر تھا لیکن اس حالت میں تھا کہ آسانی سے ہر گاڑی اس سے گزر سکے۔ دو نوجوان ایک 70 سی سی موٹر سائیکل پر بابو سر ٹاپ کی طرف جا رہے تھے۔ بیچاری موٹر سائیکل کی بس بس ہو رہی تھی۔ موٹر سائیکل اتنی رفتار سے چل رہی تھی جیسے لوگ پیدل چلتے ہیں۔

[haroonmcs26]

اگر مبالغہ آرائی نہ سمجھا جائے تو حقیقت میں بابو سر ٹاپ سے پہلے پہاڑوں کے مناظر نا قابل بیان ہیں۔ انکا جادو سر چڑھ کر بول رہا تھا۔ ہر نظارہ ایسا کہ انسان کو اپنی طرف کھینچتا ہوا محسوس ہو تا ہو۔ تصویروں سے شاید آپ کچھ اندازہ لگا سکیں لیکن میرے خیال میں یہ تصویریں اس خوبصورتی کی صحیح عکاسی نہیں کرتیں اگر ان تصویروں میں تھوڑی سی ایڈیٹنگ کر دی جائے تو یہ تصویریں نکھر جائیں لیکن مجھے فطرت میں ملاوٹ پسند نہیں۔ جیسی ہیں ویسی آپ کی خدمت میں پیش ہیں۔میں تو اب بھی جب ان تصاویر کو دیکھتا ہوں تو دل وہیں پہنچ جا تا ہے۔

[haroonmcs26]

وسیم بھی ان نظاروں کا حصہ بننے کیلئے تیار۔

[haroonmcs26]

پہاڑوں کے نظاروں کو آنکھوں میں اتارتے ہوئے سفر جاری تھا۔دو بج چکے تھے لیکن ہم ابھی بھی بابو سر ٹاپ نہیں پہنچے تھے۔ وسیم اور احمد کو تو آگے کے رستے کا اندازہ نہیں تھا اسلئے وہ پر سکون تھے لیکن جو میں نے معلومات لیں تھیں انکے مطابق میں پریشان تھا کہ وقت بہت لگ چکا ہے۔ ہمیں اب تک بابو سر ٹاپ عبور کر لینا چاہیئے تھا۔ مجھے یہ بھی پتا تھا کہ یہ دیر کیوں ہوئی ہے۔ پہاڑوں اور برفپوش چوٹیاں نے ہمارے قدم سست کر دیئے تھے۔ بچپن میں بچے ایک کھیل کھیلتے ہیں جس میں ایک دوسرے کو سٹاپ یا فریز کہتے ہیں۔ اور جب تک ریلیز نہ کر دیں وہ بچہ ساکن کھڑا رہتا ہے۔ یہ پہاڑ اور نظارے ہمارے ساتھ بھی ایسا ہی کھیل کھیل رہے تھے۔ پتا تھا کہ دیر ہو رہی ہے لیکن پھر بھی ان کی آواز پر فریز ہو جاتے تھے۔ پوری وادی ناران میں پہاڑوں کا جو منظر بابو سر ٹاپ سے پہلے تھا وہ سحر انگیز تھا۔بہرحال کسی نہ کسی طرح ان کے جادو سے اپنے آپ کو آزاد کراتے کراتے سفر جاری رکھا۔ کئی جگہ پر بھاری مشینری سڑک کی تعمیر میں مصروف تھیں۔ لیکن ٹریفک بلاک نہیں تھی۔ بالآخر دور سے بلندی پر بہت سی گاڑیاں کھڑی نظر آئیں۔ یہ بابو سر ٹاپ کی آمد کی نشانیاں تھیں

[haroonmcs26]

اس سے کوشش کریں پلیز۔۔۔۔۔۔۔۔

بہت شکریہ آپ کا اتنا تفصیلی جواب دینے کیلئے۔ لیکن مجھے یہ گوگل کروم ویب براؤزر نہیں لگ رہا جبکہ میں گوگل کروم استعمال کر رہا ہوں۔

[turbo_charge]

Very Nice haroon bhai .. We are also going this week.. ap ky thread sy kafi help mili ..
Ham log Mehran py Naran tak jaingy phr babsar top tak jeep py...

[haroonmcs26]

Very Nice haroon bhai .. We are also going this week.. ap ky thread sy kafi help mili ..
Ham log Mehran py Naran tak jaingy phr babsar top tak jeep py...

بہت شکریہ جناب۔ اللہ آپ کو خیر و عافیت سے گھر واپس لائے۔ آپ مہران پر بہت آسانی سے بابو سر ٹاپ جا سکتے ہیں۔ جیپ کی کوئی ضرورت نہیں ہے۔ ہر قسم کی گاڑی کو میں نے وہاں جاتے دیکھا ہے۔ اگر آپ ناران تک ڈرائیو کر سکتے ہیں۔ تو آگے کی ڈرائیو اس سے مختلف نہیں ہیں۔ اس سے آپ اپنے پیسے بھی بچا سکتے ہیں۔ اور لطف بھی زیا دہ اٹھا سکتے ہیں۔ کیونکہ اپنی سواری کی بات ہی اور ہے جہاں چاہا رک گئے اور جب چاہا چل پڑے۔ دوسری بات جب آپ ناران سے بابو سر کیلئے نکلیں تو کوشش کریں کہ سات بجے تک نکل جائیں تاکہ راستے میں رکنے کے لئے آپ کے پاس کافی وقت ہو اگر وقت کم ہوا تو آپ وہاں کی خوبصورتی کو صحیح انداز میں انجوائے نہیں کر سکیں گے۔

[haroonmcs26]

تقریبا سوا دو بجے بابو سر ٹاپ پر پہنچ گئے ۔ میٹر ریڈنگ 30903۔ہر طرف گاڑیوں کا رش نظر آ رہا تھا۔ اور کافی لوگ وہاں پہاڑ کی بلندی سے لطف اندوز ہونے آئے ہوئے تھے۔ جن میں فیملیز اور ہر عمر کے لوگ شامل تھے۔ ماحول میں ٹھنڈ کا احساس بہت نمایا ں تھا۔ سرد ہوا چل رہی تھی۔ بابو سر ٹاپ علاقے کی بلند جگہ ہے اسلئے ہر طرف سے ہوا گھومتی ہوئی آرہی تھی۔ ٹاپ پر ایک چیک پوسٹ بنی ہوئی تھی وہاں اندراج کرایااور اپنی منزل سے آگاہ کیا۔ کیونکہ میں گاڑی ڈرائیو کر رہا تھا اسلئے میرے شناختی کارڈ کا اندراج کیا گیا ۔میں ڈرائیونگ سیٹ پر ہی رہا وسیم میرا شناختی کارڈ لیکر اندراج کروا کر آ گیا۔ ان علاقوں میں سفر کرنے کیلئے تمام لوگ اپنے پاس شناختی کارڈ ضرور رکھیں۔ اگر آپ کی منزل صرف بابو سر ٹاپ ہے تو گاڑی کو چیک پوسٹ سے پہلے ہی پارک کر لیں۔ لیکن ہم نے آگے جانا تھا اسلئے گاڑی کو چیک پوسٹ سے آگے پارک کیا۔یہاں ایک بات کا خیال رکھیں کہ اگر آپ نے بابو سر ٹاپ سے آگے جانا ہے تو 4 بجے سے پہلے پہلے چیک پوسٹ پر اندراج کروا کے اسے کراس کرلیں۔ کیونکہ اسکے بعد اجازت نہیں ہے۔ اور آگے سفر کے دوران ہمیں ان وجوہات کا بھی پتہ چل گیا کہ کیوں اسکے بعد آگے جانے نہیں دیا جاتا۔ گاڑی کو پارک کرکے اترے تو ہر طرف پہاڑوں کے نظارے تھے۔ چلاس کی طرف جانے والی سڑک کے دائیں طرف والے پہاڑ پر تو برف بھی کافی مقدار میں موجود تھی۔ لوگ وہاں چڑھ کر اس پر پھسل بھی رہے تھے۔ اس سے بھی بلندی پر ایک پہاڑ پر لوگ چڑھ رہے تھے۔ حالانکہ کافی زیادہ فاصلہ تھا۔ لیکن لوگ اس کو بھی ایڈونچر سمجھ کر وہاں جا رہے تھے۔ مخصوص قسم کے چپٹے پتھر جو کہ بابو سر ٹاپ کی خاص نشانی بھی ہیں بکھرے پڑے تھے۔ اتنی بلندی پر ہوا کم تھی ویسے تو اسکا احساس نہیں ہوتا لیکن اگر آپ تھوڑی ہل جل کریں تو سانس جلدی پھول جاتی ہے۔ احمد اس سے پریشان ہو گیا کہ پتا نہیں کیا بات ہے سانس اتنی پھول کیوں رہی ہے۔ میں نے اسکو بتایا کہ یہ ہوا کے کم دباؤ کی وجہ سے ہے تو اسکی پریشانی کم ہوئی۔ ہوا کافی تیز اور ٹھنڈی تھی۔ میں نے اور احمد نے ہاف بازو ٹی شرٹس پہنی ہوئیں تھیں سردی کا احساس بڑھا تو جیکٹس نکال کر پہن لیں۔ کچھ بھوک بھی محسوس ہو رہی تھی۔ سوچا کہ کیا کریں ۔ فیصلہ کیا گیا کہ آلو کے چپس بنا ئے جائے پھر چائے پی جائے۔ ہمیں اندازہ نہیں تھا کہ بابو سر ٹاپ پر چپس بنا نا اتنا آسان کام نہیں تھا بلکہ کچھ لوگوں نے منع بھی کیا کہ اتنی ہوا میں کہاں کوکنگ ہو گی لیکن ہم نے سوچا تجربہ ہی سہی۔ گاڑی سے سامان نکالا اور آلو کاٹنے شروع کر دیئے۔ وسیم آلو چھیل رہا تھا اور میں ان کو فنگر چپس کی شکل دے رہا تھا پھر اسمیں تھوڑا سا بیسن اور مصالحہ جات ملائے۔ اگلا مرحلہ تھا چپس کو تلنے کا ۔ ہوا کی تیزی کو دیکھتے ہوئے ہم نے گاڑی کے ساتھ ہی سلنڈر رکھا اس پر کڑاہی رکھ کر کوکنگ آئل ڈال کر چولہا جلایا۔ لیکن ہو اشعلے کو ایک جگہ پر ساکن نہیں ہونے دے رہی تھی۔ اس کا علاج یہ کیا کہ موٹی چادر لی اور اسکو سلنڈر کے اردگرد تان کر کھڑے ہو گئے۔ لیکن ہوا اتنی تیز تھی کہ گاڑی کے نیچے سے بھی آ رہی تھی۔ اسکے لئے گاڑی میں سے کپڑوں کا بیگ نکالا اور اس کو گاڑی کی نچلی سائیڈ پر رکھ دیا۔ منظر دیکھنے سے تعلق رکھتا تھا جب میں اور احمد چادر پکڑ کر کھڑے تھے اور وسیم چپس کی تلائی کر رہا تھا۔ اس تجربے کا بھی اپنا ہی مزہ تھا۔ اسی دوران ہم نے اردگرد دیکھا تو لوگو ں نے کئی جگہوں پر پتھروں کو جوڑ کر آڑ بنائیں ہوئیں تھیں اس میں کوکنگ کرنے سے ہوا سے بچت ہو جاتی تھی لیکن ہمیں ان کا تب پتا چلا جب ہمار ا کام تقریبا ہو گیا تھا۔ پہلی بار کی چپس کڑاہی سے نکالی اور دوسری بار والی کو کڑاہی میں ڈال کر گاڑی سے کیچپ نکالا اور شروع ہو گئے۔ اتنی سردی میں اور اپنے ہاتھ کی بنائی ہوئی چپس کھانے کا مزہ آ گیا۔ ابھی دوسری بار کی تلائی ہوئی نہیں تھی اور پہلے والی ہم چٹ کر چکے تھے۔ پھر انتظار کرتے رہے کہ کب چپس تلے اور ہم پھر شروع ہو جائیں ۔ جیسے ہی وہ تیار ہوئی ہم وہ بھی چٹ کر گئے۔ مزہ تو بہت آیا لیکن اتنی تیز ہوا میں چپس تیار کرنے میں ہمیں تقریبا ڈیڑھ گھنٹہ لگ گیا۔چپس کھانے کے بعد چائے تیار کی اورسردی میں کپ کیکس کے ساتھ مزے لے لے کر اسکو پیا گیا۔ویسے میں چائے کا اتنا شوقین نہیں ہوں لیکن ایسی ٹھنڈمیں چائے کا مزہ آ تاہے۔ احمد کو بہت سردی لگ رہی تھی حالانکہ جیکٹ پہنی ہوئی تھی۔ اصل میں احمد کافی دن بیمار رہا تھا اور اسکی کمزوری ابھی باقی تھی اسلئے اسے سردی اور گرمی کا احساس زیادہ ہو رہا تھا۔ ورنہ یہی احمد ہے جو میرے ساتھ مری کی سردی میں بے پرواہ گھومتا تھا۔