2018ء کی سب سے زیادہ ایندھن بچانے والی کاریں اور موٹر سائیکلیں – PakWheels.com آٹوموبائل انڈسٹری سروے 2018ء
گاڑی یا موٹر سائیکل خریدتے ہوئے جہاں لوگ دیگر عوامل ذہن میں رکھتے ہیں وہیں ایندھن کی بچت بھی اوّلین ترجیحات میں سے ایک ہے اور اب ملک میں بڑھتی ہوئی پٹرولیم قیمتوں اور افراطِ زر کی وجہ سے یہ مزید اہمیت اختیار کرگئی ہے۔ اس کی سادہ سی وجہ ہے کہ پاکستان میں بڑی تعداد مڈل کلاس آبادی کی ہے کہ جس کا بجٹ ایک مخصوص حد تک ہی ہے۔
PakWheels.com نے آٹو مارکیٹ کا اندازہ لگانے کے لیے آٹوموبائل انڈسٹری سروے 2018ء کیا کہ جس میں بہت سارے سوالات کے ساتھ یہ بھی پوچھا گیا تھا کہ موٹر سائیکل/گاڑی خریدتے ہوئے سب سے ضروری عنصر کون سا ہے اور جواب دینے والوں کے مطابق سب سے زیادہ ایندھن بچانے والی موٹر سائیکل/گاڑی کون سی ہے۔ سروے میں انہوں نے کچھ یہ جوابات دیے۔
جہاں تک گاڑی خریدتے ہوئے اہم عوامل کا تعلق ہے، جواب دینے والوں نے آرام اور سیفٹی کے بعد ایندھن بچت کو تیسری اہم ترین ترجیح قرار دیا جبکہ موٹر سائیکل کے معاملے میں ایندھن بچت پہلے نمبر پر رہی۔
واضح رہے کہ 2017ء میں کیے گئے پچھلے سروے کے مقابلے میں یہ ایک اہم پیشرفت ہے کہ جس میں گاڑی خریدتے ہوئے لوگوں نے ایندھن بچت کو پانچواں اہم ترین عنصر قرار دیا تھا۔ ایندھن بچت کے آگے آنے کے اہم عوامل ، جیسا کہ اوپر ذکر کیا گیا کہ تیل کی قیمتیں اوپر جا رہی ہیں اور ملک میں افراطِ زر کی شرح میں اضافے نے بھی عوام کی قوتِ خرید کو کم کردیا ہے۔ اسی طرح موٹر سائیکل مالکان نے 2017ء کے سروے میں ایندھن بچت کو موٹر سائیکل خریدتے ہوئے دوسری ترجیح قرار دیا تھا ۔
آگے بڑھتے ہوئے دیکھیں تو دوسرے سوال کا جواب دیتے ہوئے جواب دینے والے ویگن آر کے حق میں نظر آئے کہ جسے مقامی طور پر بننے والی سب سے زیادہ ایندھن بچت دینے والی گاڑی قرار دیا گیا جبکہ امپورٹڈ گاڑیوں میں 2018ء کی سب سے زیادہ ایندھن بچت دینے والی گاڑی ٹویوٹا ایکوا قرار دی گئی۔ مقامی کیٹیگری میں ویگن آر کے علاوہ عوام نے مندرجہ ذیل گاڑیوں کو ایندھن کے حوالے سے مؤثر قرار دیا:
ہونڈا سٹی
سوزوکی مہران
سوزوکی کلٹس
ٹویوٹا کرولا
ہونڈا سوِک
سوزوکی سوئفٹ
امپورٹڈ کے زمرے میں ، ایکوا کے علاوہ، عوام نے مندرجہ ذیل گاڑیوں کو ایندھن بچت کا حامل قرار دیا:
پرائیس
میرا
پاسو
وِٹز
حیران کن طور پر 2017ء میں ہونے والے پچھلے سروے میں بھی ویگن آر سب سے زیادہ ایندھن بچت کرنے والی گاڑی قرار پائی تھی اور امپورٹڈ گاڑیوں میں یہ اعزاز ٹویوٹا ایکوا کو ہی ملا تھا۔ یعنی یہ رحجان سرے سے تبدیل ہی نہیں ہوا۔ البتہ سوزوکی جون 2019ء سے پاکستان میں آلٹو 660cc لانچ کرنے جا رہا ہے؛ ایندھن بچت کے معاملے میں آلٹو اور ویگن آر کے درمیان ایک دلچسپ مقابلہ ہوگا۔ عین ممکن ہے کہ رحجان آلٹو کے حق میں چلا جائے، انتظار کرتے ہیں اور دیکھتے ہیں کہ کیا ہوتا ہے۔
موٹر سائیکلوں کی بات کریں تو جواب دینے والوں نے ہونڈا پرائیڈر کو 2018ء کی سب سے زیادہ ایندھن بچت کی حامل موٹر سائیکل قرار دیا، 2017ء میں بھی اس کیٹیگری میں یہی موٹر سائیکل جیتی تھی۔ ہونڈا پرائیڈر کے علاوہ عوام نے مندرجہ ذیل موٹر سائیکلوں کا انتخاب کیا:
YBR 125G
CD 70 ڈریم
GS150 SE
CD 70
YBR 125
GD 110S
GS150
بلاشبہ ایندھن بچت، پائیداری، لچک اور پرزوں کی دستیابی کے معاملے میں ہونڈا موٹر سائیکلیں عوام میں بہت مقبول ہیں۔ مالی سال 2017-18ء میں ہونڈا نے 11,50,346 موٹر سائیکل یونٹس فروخت کیے جو واضح طور پر ظاہر کرتا ہے کہ یہ برانڈ ملک میں کتنا مقبول ہے۔
مستقبل میں ایندھن کے حوالے سے مؤثر گاڑیوں/موٹرسائیکلوں کا انتخاب کرنے والے افراد کی تعداد میں مزید اضافہ ہوگا کیونکہ آئندہ چند مہینوں میں پٹرول کی قیمتیں مزید بڑھیں گی۔ واضح رہے کہ موٹر سائیکلوں/گاڑیوں کی مندرجہ بالا فہرستیں سب سے زیادہ ووٹ سے سب سے کم ووٹوں کی بنیاد پر ترتیب دی گئی ہیں۔
مکمل آٹوموبائل انڈسٹری سروے 2018ء یہاں دیکھیں۔
اپنے خیالات نیچے تبصروں میں پیش کیجیے۔
