ہیونڈائی-نشاط موٹرز آج نشاط امپوریم مال، لاہور میں اپنے خاندان میں نئے اضافے – ہیونڈائی آیونِک – کی رونمائی کرے گا۔
یہاں یہ بات قابلِ ذکر ہے کہ متعارف کروایا گیا یونٹ مارکیٹ میں پیش نہیں کیا جائے گا، البتہ کمپنی مستقبلِ قریب میں آیونِک کا فیس لفٹ متعارف کروائے گا۔ اور یہ بھی ممکن ہے کہ ہیونڈائی مقامی مارکیٹ میں گاڑی کے مختلف ٹرِمز پیش کرے۔
ہیونڈائی کے چاہنے والے جاننا چاہیں گے کہ آیونِک ایک کومپیکٹ، ہائبرڈ ہیچ بیک ہے جو زبردست خصوصیات اور ایندھن بچت فراہم کرتی ہے۔ ایک کومپیکٹ، 5 دروازوں والی ہیچ بیک ہیونڈائی آیونک کو بسا اوقات “ہیونڈائی پریئس” بھی کہا جاتا ہے۔
آیونک ہائبرڈ کی خصوصیات
بین الاقوامی سطح پر یہ ہیچ بیک 1.6L نیچرلی ایسپائریٹڈ ایٹکنسن-سائیکل اِنلائن-4 انجن کے ساتھ آتی ہے جو 6-اسپیڈ ڈوئل کلچ ٹرانسمیشن کا حامل ہے اور 104 hp اور 265 Nm ٹارک پیدا کرتا ہے۔ ہائبرڈ ہونے کی وجہ سے الیکٹرک موٹر زیادہ hpشامل کرتی ہے اور انجن اور الیکٹرک موٹر دونوں مل کر 141 HP پیدا کرتے ہیں۔ واضح رہے کہ کمپنی دعویٰ کرتی ہے کہ اس گاڑی کی فیول اکانمی 25 کلومیٹر فی لیٹر ہے۔
آیونِک 7 عدد SRS ایئربیگز، فرنٹ اور ریئر ڈسک بریکس، بیک ویو کیمرا، پارکنگ سینسرز اور انجن امّوبیلائزر کے ساتھ آتی ہے۔
قیمت
گاڑی آئندہ چند ماہ میں لانچ کی جائے گی اور اِس وقت اس کی قیمت کا محض اندازہ ہی لگایا جا سکتا ہے۔ ہمارا سمجھنا ہےکہ ہیونڈائی آیونک کی قیمت 40 سے 50 لاکھ روپے کے درمیان ہوگی۔ بھارت میں ابھی اس گاڑی کا لانچ ہونا باقی ہے۔ اس کی متوقع لانچنگ جنوری 2020ء ہے اور متوقع قیمت 20 سے 25 لاکھ بھارتی روپے ہوگی۔
اس گاڑی کے بارے میں تمام خبریں پانے کے لیے PakWheels.com پر آتے رہیے۔
