الٹی ہوگئیں سب تدبیریں: گاڑیوں کو نقصان پہنچا کر فرار ہونے والی خاتون کو اپنی ہی گاڑی نے پھنسا دیا

ممکن ہے بہت سے لوگ کو یہ واقعہ عام سا لگے لیکن مجھے یقین ہے کہ گاڑیوں سے تعلق رکھنے والے افراد اس واقعہ کا مکمل لطف ضرور اٹھائیں گے۔ اصل کہانی کی طرف جانے سے پہلے ذرا تصویر کیجیے کہ آپ کیسا محسوس کریں گے جب آپ کی اپنی ہی گاڑی کسی غیر اخلاقی حرکت پر شہری پولیس سے آپ ہی کی شکایت کردے؟ شاید آپ کو اس بات کا یقین نہ آئے لیکن فلوریڈا کی خاتون کے ساتھ بالکل ایسا ہی ہوا۔

57 سالہ کیتھی برنسٹین کا خیال تھا کہ وہ ایک ٹرک اور پھر ایک مسافر گاڑی کو ٹکر مار کر فرار ہوجائیں گی لیکن ان کی گاڑی فورڈ فوکس نے ہنگامی مدد فراہم کرنے والے ادارے 911 کو واقعے کی اطلاع کردی۔

فلوریڈا پولیس کا کہنا ہے کہ کیتھی نے پہلے ایک ٹرک کو اپنی گاڑی سے نقصان پہنچایا اور پھر فرار ہونے کی کوشش میں ان کی گاڑی کا پچھلا حصہ ایک اور وین سے جا ٹکرایا۔ گو کہ خاتون جائے وقوعہ سے فرار ہونے میں کامیاب ہوگئیں تاہم ان کی گاڑی میں لگے ہوئے جدید فورڈ 911 مددگار نظام نے پولیس کو اطلاع دی کہ گاڑی کسی حادثے کا شکار ہوئی ہے۔

911 پر اطلاع موصول ہونے کے بعد معلقہ ادارے کے ایک نمائندے نے واقعہ کی تصدیق کے لیے کیتھی کو فون کیا اور پوچھا کہ آیا وہ واقعے کے بعد فرار ہوگئیں تھیں؟ تو انہوں نے حیرت کا اظہار کرتے ہوئے ایسے عمل سے متعلق سوچنے کا بھی انکار کردیا۔ جواب میں فون کرنے والے نے ضرور کچھ ایسی ہی شکل بنائی ہوگی:

ایسے جدید نظام گاڑی میں مسافروں کی حفاظت اور سہولت کے لیے لگائے جاتے ہیں۔ اگر گاڑی اور اس کے مسافر کسی قسم کے حادثے کا شکار ہوجائیں اور انہیں فون تک رسائی ممکن نہ رہے تو یہ خود کار نظام قریب موجود فون سے بذریعہ بلوٹوتھ منسلک ہو کر متعلقہ ادارے کو اطلاع دیتے ہیں۔ البتہ کیتھی کے ساتھ پیش آنے والی صورتحال میں تو یہ تدابیر الٹی ہو کر خود ڈرائیور ہی کو پھنسانے کا باعث بن گئیں۔ اس لیے ہمارا مشورہ ہے کہ ایسے کارناموں سے پہلے یا تو ایسے نظام کو بند کردیں یا پھر اپنے پاس پرانے زمانے کا فون رکھیں جس میں بلوٹوتھ بھی نہ ہو۔