بالآخر ہونڈا نے تھائی لینڈ میں منعقدہ ایک تقریب کے دوران اپنی پانچویں جنریشن کی رونمائی کر دی ہے۔
یہ گاڑی آئندہ تھائی لینڈ انٹرنیشنل موٹر ایکسپو سے آغاز لے گی۔ ہونڈا سٹی کی نئی جنریشن 2020ء میں بھارت اور ملائیشیا میں لانچ ہونا بھی متوقع ہے۔
ہونڈا سٹی 1980ء کی دہائی سے مارکیٹ میں موجود ہے اور یہ ہونڈا کا سب سے لمبے عرصے تک چلنے والا ماڈل ہے۔ یہ کومپیکٹ سیڈان کیٹیگری میں آتی ہے اور ہیچ بیکس سے سیڈان کی طرف منتقل ہونے والے افراد کا مشہور انتخاب ہے۔ ہونڈا سٹی ڈیزائن اور کئی تبدیلیوں کے ذریعے نئی نسل کے لیے تیار کی گئی ہے۔ 2020ء ہونڈا سٹی کے ڈیزائن انداز میں ارتقائی تبدیلیاں نظر آتی ہے اور اس میں ہونڈا سوِک کے انداز کی کچھ جھلک بھی ہے۔ پانچویں جنریشن زیادہ اسپورٹی نظر آتی ہے اور پچھلے ماڈل کے مقابلے میں شوخ گاڑی لگتی ہے۔
ایکسٹیریئر
ہونڈا نے نئی سٹی کو بڑا بھی کیا ہے۔ پانچویں جنریشن 4.4 انچ زیادہ طویل اور 2.1 انچ زیادہ چوڑی ہے۔ گراؤنڈ کلیئرنس 0.4 انچ کم ہوئی ہے جو اس کومپیکٹ سیڈان کے اسپورٹی انداز کا حصہ ہے۔ البتہ ویل بیس 0.4 انچ کم ہوا ہے۔ نیا ماڈل polyurethane اسپرے فوم کی بدولت اچھی طرح انسولیٹ کیا گیا ہے۔ انجن کوَر بہتر انسولیٹڈ ہے اور یہ تھرتھراہٹ اور شور کو کم کرتا ہے۔ اس میں ایک فرنٹ کروم گرِل ہے جو نئی سٹی کو پریمیم بناتی ہے۔ دیگر ایکسٹیریئر فیچرز میں LED ٹیل لائٹس، LED DRLs اور پروجیکٹر ہیڈلائٹس شامل ہیں۔
اس میں ایک نیا RS ٹرِم بھی ہے جو پانچویں جنریشن کو زیادہ اسپورٹی بناتا ہے۔ نیا شوخ سرخ رنگ بھی RS ٹرِم میں دستیاب ہے۔ RS ٹرم کو عام ٹرِم سے مختلف بنانے کے لیے 16 انچ کے الائے رِمز اور چمکدار سیاہ رنگ کی فرنٹ گرِل دی گئی ہے۔ ایک اور مختلف فیچر LED ہیڈ لائٹس اور retractable سائیڈ مررز ہیں۔ ایکسٹیریئر کے رنگوں میں lunar silver metallic ، platinum white pearl ، modern steel metallic ، crystal black pearl ، ignite red metallic اور سفید رنگ شامل ہیں۔
انٹیریئر
ڈیش بورڈ ڈیزائن بہتر کیا گیا ہے بلکہ مکمل طور پر نیا ہے۔ ڈیش بورڈ کا لے آؤٹ سادہ ہے اور اس میں تمام کنٹرولز تک باآسانی پہنچا جا سکتا ہے۔ گو کہ ویل بیس اب پہلے سے چھوٹا ہے لیکن پچھلا مسافر اب زیادہ لیگ رُوم کا لطف اٹھا سکتا ہے۔ نئی سٹی نئی ہونڈا Jazz کے کچھ پہلو بھی رکھتی ہے؛ اس لیے انٹیریئرکیبن پہلے سے زیادہ کشادہ ہے۔ اسٹینڈرڈ کے طور پر انٹیریئر کالے رنگ کا ہے، جسے دو رنگ آئیوری اور بلیک میں بھی لیا جا سکتا ہے۔ چمڑے کی نشستیں اور کروم کے ڈور ہینڈلز بھی ایسے اضافی فیچرز ہیں جن کا انتخاب کیا جا سکتا ہے۔ پیانو بلیک رنگت رکھے والا ایک چمکدار ڈیش بورڈ بھی آپشنل فیچر کے طور پر آرڈر کیا جا سکتا ہے۔
جہاں تک سیفٹی کا معاملہ ہے تو نئی سٹی ABS بریکس، چھ ایئر بیگز، وہیکل stability assist اور G-force کنٹرول اسٹرکچر سے لیس ہے۔ اس میں 8 انچ کا انفوٹینمنٹ سسٹم ہے جو ایپل کار پلے اور سِری وائس کنٹرول سے لیس ہے۔ ملٹی فنکشن اسٹیئرنگ وِیل اور روشنیوں کے ساتھ MID بھی نئی سٹی میں شامل کیے گئے ہیں۔
انجن اور کارکردگی
پانچویں جنریشن کی ہونڈا سٹی ایک ٹربو چارجڈ 3-سلنڈر 1.0L پٹرول انجن سے لیس ہے۔ یہ انجن پچھلے ماڈل سے چھوٹا ہے لیکن یہ زیادہ طاقت پیدا کرتا ہے۔ یہ 120 ہارس پاور اور 173Nm ٹارک دیتا ہے۔ یہ انجن سیون-اسپیڈ CVT سے لیس ہے۔ چھوٹا انجن بہتر فیول اکانمی بھی دیتا ہے۔ سٹی کی پانچویں جنریشن میں چار ٹرِم لیولز ہیں۔ S، V، SV اور رینج میں سب سے آگے RS ٹرِم۔
واضح رہے کہ دنیا بھر میں یہ ہونڈا سٹی کی پانچویں جنریشن ہوگی جبکہ پاکستان میں، اگر کمپنی مستقبل میں یہ نئی کار لانچ کرتی ہے تو، یہ ساتویں جنریشن ہوگی۔ آئیے ذرا اس کنفیوژن کو دور کرتے ہیں، دراصل اس کار کی پہلی دو جنریشنز ہیچ بیک ماڈلز تھیں اور کئی لوگ انہیں ہونڈا سٹی کی جنریشن شمار ہی نہیں کرتے، اس لیے بنیادی طور پر سٹی کی پہلی جنریشن تب شروع ہوتی ہے جب کمپنی نے سیڈان باڈی ٹائپ بنانی شروع کی۔
جبکہ اس کے مقابلے میں پاکستان میں ہم پہلی دو جنریشنز کو بھی شمار کرتے ہیں اس لیے پاکستان میں اِس وقت موجودہ جنریشن پانچویں ہے، ہم نے چھٹی چھوڑ دی جو بین الاقوامی سطح پر چوتھی جنریشن تھی، اور آنے والی جنریشن پاکستان میں ساتویں اور بین الاقوامی سطح پرپانچویں جنریشن شمار ہوگی۔ امید ہے کنفیوژن ختم ہو گئی ہوگی۔
ہونڈا سٹی کی پانچویں جنریشن کے بارے میں اپنے خیالات نیچے پیش کیجیے اور مزید معلوماتی مواد کے لیے آتے رہیے۔
