کچھ سال پہلے، جی ایس 150، سی بی 150، یا جی آر 150 جیسی نئی پریمیم بائک خریدنا ایک متوسط طبقے کے شخص کے لیے نسبتاً آسان تھا۔ تاہم، چیزیں ایک دو سال کے عرصے میں تبدیل ہوگئی ہیں، بائیکس کی قیمتوں میں تیزی سے اضافے اور افراط زر کی غیر معمولی صورتحال کی وجہ سے لوگوں کیلئے یہ مہنگی بائکس نقد خریدنا مشکل ہو گیا ہے۔
یہی وجہ ہے کہ بائکس کی سیل میں کمی واقع ہوئی جس کے بعد مقامی موٹر کمپنیز کو صارفین کو راغب کرنے کے لیے مسلسل طور پر پُرکشش آفرز متعارف کروانی پڑ رہی ہیں۔
پاک سوزوکی نے تمام کار ماڈلز پر بڑی بچت کی آفر کے بعد اب اپنے ایک ماڈل جی ایس 150 کے لیے 0% مارک اپ آفر کا اعلان بھی کیا ہے۔
جی ایس 150 پر لگائی گئی آفر
کمپنی کے سوشل میڈیا پوسٹ کے مطابق، آپ اپمنی ڈریم بائک سوزوکی جی ایس 150 اب آسان ماہانہ اقساط پر حاصل کر سکتے ہیں۔ اس آفر کے ساتھ جو اضافی اور اہم فوائد ہیں ان میں 0 فیصد مارک اپ اور 25 فیصد ڈاون پیمنٹ شامل ہیں۔ اس کے علاوہ یہ پلان 24 ماہ کی قسطوں پر محیط ہے۔
پاک سوزوکی کی تمام گاڑیوں پر آفر
اپنی سوشل میڈیا پوسٹ میں، پاکستان سوزوکی موٹر کمپنی (PSMC) نے اعلان کیا کہ یہ آفر 425000 روپے تک کی بچت کرے گی جہاں 17.7 فیصد کا فلیٹ فکسڈ ریٹ ہوگا۔ اس کے علاوہ، فوری ڈیلیوری ایک اور اضافی فائدہ ہے جو آپ کو روزمرہ زندگی کے اخراجات میں اضافے یا کسی بوجھ کے بغیر اپنے خواب کو حقیقت میں بدلنے کا موقع فراہم کرتی ہے۔
خیال رہے کہ اس ڈیل میں سوزوکی کے تمام ماڈلز شامل ہیں، جن میں آلٹو، ویگن آر، سوئفٹ اور کلٹس شامل ہیں۔
اس آفر کے بارے آپ کا کیا خیال ہے؟ کمنٹس سیکشن میں ہمیں بتائیں۔
