پاکستان میں 2 لاکھ روپے سے بھی کم میں ملنے والی 3 سستی کاریں

17 089

اب جبکہ افراطِ زر تیزی سے بڑھتا جا رہا ہے اور گاڑیوں کی قیمتیں بھی آسمان سے باتیں کر رہی ہیں، 2 لاکھ روپے کے بجٹ میں کوئی گاڑی خریدنا ایک مشکل اور تھکانے دینے والا کام لگتا ہے۔ لیکن پریشان مت ہوں کیونکہ ہم ہیں نا! ہم نے تین ایسی گاڑیوں کی فہرست تیار کی ہے جو پاکستان میں 2 لاکھ روپے میں خریدی جا سکتی ہیں۔ یہ گاڑیاں PakWheels.com پر بھی بڑی تعداد میں موجود ہیں۔ اس لیے ان میں سے اس گاڑی کا انتخاب کریں جو آپ کی ترجیحات اور ضروریات کے مطابق ہو۔

سوزوکی مہران

پاکستان میں مقامی طور پر اسمبل ہونے والی گاڑیوں میں سوزوکی مہران سب سے مشہور اور معروف گاڑیوں میں شمار ہوتی ہے۔ کیونکہ یہ ایک بنیادی قسم کی گاڑی تھی، اس لیے اس کی قیمت کو قابو میں رکھنا پاک سوزوکی کے لیے نسبتاً آسان تھا اور یہی وجہ ہے کہ پاکستان کے عوام کے لیے بھی یہ جیب پر بھاری گاڑی نہیں تھی۔ پاکستان میں موٹر سائیکل چھوڑ کر کار پر منتقل ہونے والے کسی بھی شخص کی پہلی گاڑی بھی عموماً یہی ہوتی ہے۔ سوزوکی مہران کی مرمت اور دیکھ بھال بھی کم قیمت ہے اور اس کے پرزے بھی پاکستان بھر میں باآسانی دستیاب ہیں۔ 

کیونکہ مہران 800cc کا چھوٹا انجن رکھتی ہے، اس لیے شہر کے اندر چلائیں یا ہائی وے پر، یہ ایندھن کے حوالے سے بہت بچت دیتی ہے۔ چار گیئرز کے ساتھ مینوئل ٹرانسمیشن میں آنے والی مہران کی ری-سَیل مارکیٹ بھی بہت اچھی ہے اور آپ اس کی خرید و فروخت باآسانی کر سکتے ہیں۔ آپ 1990ء کی دہائی کے اواخر یا اس سے پہلے کے سوزوکی مہران ماڈلز 2 لاکھ روپے کے بجٹ میں خرید سکتے ہیں۔ بدقسمتی سے سوزوکی مہران پاور اسٹیئرنگ، پاور وِنڈوز، پاور مِررز اور ایئر بیگز جیسے فیچرز سے محروم ہے۔ 

سوزوکی خیبر

اگر آپ نسبتاً کشادہ انٹیریئر اور بڑی ڈِگی والی گاڑی خریدنا چاہتے ہیں تو سوزوکی مہران کے بجائے آپ کا انتخاب سوزوکی خیبر ہونی چاہیے۔ سوزوکی خیبر پیچھے بیٹھے مسافروں کے لیے بہتر لیگ رُوم اور نسبتاً بڑا انجن رکھتی ہے۔ یہ 1000cc کے پٹرول انجن کی حامل ہے جو مینوئل ٹرانسمیشن رکھتا ہے۔ آپ کو 1990ء کی دہائی کے اواخر یا اُس سے پہلے کا سوزوکی خیبر ماڈل 2 لاکھ روپے میں مل سکتا ہے۔ 

بس یہ سمجھیں کہ سوزوکی خیبر سوزوکی مہران کی بڑی بہن ہے، کیونکہ اس میں بڑے انجن اور بڑے باڈی سائز کے علاوہ تقریباً وہی فیچرز ہیں۔ اس کا بڑا وِیل بَیس گاڑی کو جما کر چلاتا ہے۔ سوزوکی خیبر اپنے زمانے میں ایک مقبول ہیچ بیک گاڑی تھی۔ یہ اب بھی اپنی بھروسہ مندی اور مرمت و دیکھ بھال کی کم لاگت کی وجہ سے اچھی ری سَیل رکھتی ہے۔ اس کے فاضل پرزے ویسے ہی مارکیٹ میں آسانی سے مل جاتے ہیں۔ 

سوزوکی ایف ایکس 

سوزوکی ایف ایکس بہت مشہور گاڑی ہے اور اب بھی اس کی ری سَیل متاثر کُن ہے حالانکہ اس کی مینوفیکچرنگ بند ہوئے زمانہ گزر چکا ہے۔ آپ کو آج بھی سوزوکی FX اچھی اور مکمل طور پر چلتی ہوئی حالت میں دو لاکھ روپے سے بھی کم میں مل جاتی ہے۔ یہ ایک 800cc پٹرول انجن گاڑی تھی جو بعد میں سوزوکی مہران کی صورت میں پیش کی گئی۔ 

سوزوکی FX ایک قابلِ بھروسہ کار ہے اور اپنے چھوٹے سائز کی وجہ سے شہر کے اندر باآسانی چلائی جا سکتی ہے۔ اس میں پاور وِنڈوز اور پاور اسٹیئرنگ جیسے فیچرز موجود نہیں ہیں۔ یہ اُن ہلکی ترین گاڑیوں میں شامل ہے جنہیں آپ مارکیٹ سے فوری طور پر حاصل کر سکتے ہیں۔ 

آپ اپنے تبصرے نیچے پیش کر سکتے ہیں اور مزید معلوماتی مواد کے لیے آتے رہیے۔

Google App Store App Store
تبصرے