آج اپنے ایک مالک کی نظر سے کیا گیا ریویو BMW S1000RR کا ہے جو 2009 میں لانچ کی گئی تھی۔ جس موٹر سائیکل کا ریویو کیا جا رہا ہے، وہ 2012 ماڈل ہے اور مالک نے اسے 2019 میں خریدا تھا۔ یہ S1000RR کی دوسری جنریشن ہے جبکہ مارکیٹ میں اس وقت چوتھی جنریشن دستیاب ہے۔
BMW S1000RR کی قیمت:
مالک نے یہ موٹر سائیکل 17,50,000 روپے میں خریدی ہے۔ انہوں نے کہا کہ “یہ میری چوتھی BMW موٹر سائیکل ہے کیونکہ مجھے اس کمپنی کی موٹر سائیکلیں بہت پسند ہیں۔”
اہم فیچرز:
مالک کے مطابق لال اور کالے رنگ کی کلر اسکیم پاکستان میں صرف اور صرف ایک ہی ہے۔ انہوں نے بتایا کہ “یہ ہیٹڈ گرپس، کوئک شفٹرز، ڈفرنٹ شاکس رکھتی ہے۔” اس کے علاوہ موٹر سائیکل کی ہارس پاور اور کرینک پاور بھی اس کیٹیگری کی دوسری موٹر سائیکلوں سے زیادہ ہے۔
S1000RR میں ڈرائیونگ موڈز:
موٹر سائیکل چار ڈرائیونگ موڈز رکھتی ہیں: رین، اسپورٹس، ریس اور سلِک۔ مالک نے کہا کہ “آپ کو موٹر سائیکل میں سلِک موڈ پر سوئچ کرنا ہوگا۔”
سیفٹی فیچرز:
موٹر سائیکل ٹریکشن کنٹرول اور ABS رکھتی ہے، جو آپ اپنی خواہش کے مطابق آن یا آف کر سکتے ہیں۔ اس کے علاوہ موٹر سائیکل بریمبو کا بنا ہوا دنیا کا بہترین بریک سسٹم رکھتی ہے۔
600cc یا 1000cc؟
مالک کے مطابق اس کا انحصار ڈرائیور اور اس کے ڈرائیونگ اسٹائل پر ہے۔ “دونوں کلاسز اپنی خوبیاں خامیاں رکھتی ہیں، یعنی تمام تر انحصار مالک کی پسند پر ہے۔”
BMW S1000RR کی ہینڈلنگ اور کمفرٹ:
مالک نے ہمیں بتایا کہ وہ اس سے پہلے چار BMW موٹر سائیکلیں رکھ چکے ہیں۔ انہوں نے کہا کہ “بیمر کی ہینڈلنگ بے مثال ہے، اس کی maneuvering بہت اچھی ہے اور یہ آپ کی باڈی کے لحاظ سے پرفیکٹ انداز میں ایڈجسٹ ہو جاتی ہے۔”
BMW S1000RR میں موڈیفکیشنز:
مالک کے مطابق موٹر سائیکل باہر سے ہی موڈیفکیشنز کے ساتھ آئی ہے۔ انہوں نے بتایا کہ “اس میں آفٹر مارکیٹ ٹیلر میڈ ایگزاسٹ، ریسنگ لیورز، چیسٹ نٹس اور کریش پروٹیکٹرز ہیں۔”
BMW S1000RR کا فیول ایوریج:
موٹر سائیکل تقریباً 11 کلومیٹرز فی لیٹر کا فیول ایوریج رکھتی ہے۔
معلوم خامیاں یا مسائل:
مالک کا کہنا ہے کہ اگر آپ اس موٹر سائیکل کا اچھی طرح خیال رکھیں تو آپ کو کسی مسئلے کا سامنا نہیں ہوگا۔ “بس آئل وقت پر تبدیل کروائیں، اس کا آئل فلٹر تبدیل کروائیں اور ایئر فلٹر صاف کروائیں۔”
BMW S1000RR کی دیکھ بھال پر لاگت:
مالک کے مطابق ہر 1500 کلومیٹرز کے بعد آئل چینج پر ان کے تقریباً 10 سے 11 ہزار روپے لگتے ہیں۔
گراؤنڈ کلیئرنس:
مالک سمجھتے ہیں کہ سڑکوں کی حالت بہتر ہو گئی ہے اور اس لحاظ سے کسی مسئلے کا سامنا نہیں۔
BMW S1000RR کی مقابل:
مالک کے مطابق اس کی سب سے بڑی مقابل کاواساکی ZX-10R ہے۔
0-100:
موٹر سائیکل 4.09 سیکنڈز میں 0-100 کلومیٹرز فی گھنٹہ پر پہنچ جاتی ہے۔
وڈیو دیکھیں:
