چند روز قبل اتوار کو مسلح افراد نے کراچی میں ایک کار کیریئر ٹرک سے دو لگژری گاڑیاں چوری کیں۔ میڈیا رپورٹس کے مطابق کہ کار کیرئیر کراچی سے راولپنڈی جا رہا تھا کہ نوشہرو فیروز (سندھ) میں چند افراد نے ٹرک قبضے میں لیتے ہوئے دو لینڈ کروزر چوری کر لیے۔
رپورٹ میں بتایا گیا ہے کہ چوروں نے ڈرائیورز کو کیرئیر سے اتارتے ہوئے ان کے ہاتھ باندھ کر گنے کے کھیتوں میں پھینک دیا۔ جس کے بعد انہوں نے لینڈ کروزر کو اپنے ڈبل کیبن ٹرک میں لاد کر کنڈیارو کی طرف بھاگ گئے۔
اس کیس سے متعلق اطلاع آل پاکستان کار کیئرز ایسوسی ایشن کے صدر امداد حسین نقوی نے دی ہے۔ ان کا کہنا تھا کہ پولیس نہ تو مقدمہ درج کر رہی ہے اور نہ ہی ملزمان کی تلاش میں ان کی مدد کر رہی ہے۔ صدر نے انسپکٹر جنرل آف پولیس (آئی جی پی) سندھ اور ڈی جی رینجر سے اپیل کی ہے کہ وہ ملزمان کے خلاف کارروائی کرتے ہوئے چوری ہونے والی دو لگژری گاڑیوں کی بازیابی میں ان کی مدد کریں۔
انھوں نے کہا کہ صرف دو ماہ میں یہ اپنی نوعیت کا تیسرا واقعہ ہے۔ حکام سے درخواست ہے کہ ہمیں تحفظ فراہم کریں۔
پاکستان خصوصاً کراچی میں کار چوری بہت عام ہو چکی ہے۔ شہر میں ہر روز گاڑیوں کی چوری کے کئی واقعات رپورٹ ہوتے ہیں۔ ہم امید کرتے ہیں کہ پولیس اس معاملے کو دیکھے گی اور چوروں کو پکڑ کر انصاف کے کٹہرے میں لائے گی۔
اگرچہ پولیس کی جانب سے ابھی تک کوئی تفتیش نہیں کی گئی۔ تاہم اس سے متعلق کسی بھی اپ ڈیٹ بارے آپ کو آگاہ کیا جائے گا۔
