اب سے تقریباً دو ہفتوں قبل لاہور آتے ہوئے مجھے درجنوں وولوو بسیں نظر آئیں۔ یہ بسیں لاہور میں داخل ہونے سے تھوڑا پہلےآنے والا علاقے سندر میں قائم ڈائیوو سروس سینٹر میں کھڑی ہوئی تھیں۔ اتنی زیادہ بسوں کو دیکھ کر پہلا سوال جو میرے ذہن میں آیا وہ یہ تھا کہ ڈائیوو کے دفتر میں وولوو بسیں کیا کر رہی ہیں؟ پہلے مجھے خیال آیا کہ شاید ڈائیوو اور وولوو کسی مشترکہ سروس کے منصوبے پر کام کر رہے ہیں جس کی تفصیلات ابھی منظر عام پر نہیں آئیں۔ لیکن پھر یاد آیا کہ وولوو نے تو خود Qconnect کے نام سے اپنی بس سروس شروع کرنے کا اعلان کیا تھا۔ یہ بات ذہن میں آتے ہی خیال آیا کہ ہو نا ہو ڈائیوو بھی وولوو کے مقابلے میں اپنی سروس بہتر بنانے کی کوشش کر رہا ہے اور یہ جدید بسیں اسی سلسلے میں منگوائی گئی ہیں۔
اور اب یہی بات درست ثابت ہوچکی ہے۔ ڈائیوو (Daewoo) نے اپنے قافلے میں جدید وولوو بسوں کی شمولیت کا اعلان کیا ہے۔ یہ بسیں نئی ‘گولڈ کلاس’ کا حصہ ہوں گی جو ڈائیوو ایکسپریس کی نئی اور سب سے مہنگی سروس بننے جارہی ہے۔ اس حوالے سے ڈائیوو ایکسپریس کے سربراہ شہریار چشتی نے کہا کہ ہم نئی بسوں کی شمولیت سے مزید بہتر اور پُرتعیش سفر کی خدمات فراہم کرنے کا آغاز کر رہے ہیں۔ انہوں نے مزید کہا کہ ڈائیوو پاکستان میں وسیع تر ٹرانسپورٹیشن نیٹ ورک کے 18 سالہ تجربے کا حامل ہے اور ہمیں امید ہے کہ عالمی معیار کی جدید وولوو بسوں کی شمولیت سے ڈائیوو کے صارفین بہتر اور آرامدہ سفر کا لطف اٹھا سکیں گے۔
یہ بھی پڑھیں: لاہور-اسلام آباد کے درمیان ولوو کی پرتعیش بس سروس کا آغاز
ڈائیوو ‘گولڈ کلاس’ کا آغاز کہاں سے ہوگا؟
وولوو کی نئی بسیں لاہور اور راولپنڈی کے درمیان چلنے والی پریمیم پلس بسوں کی جگہ متعارف کروائی جارہی ہیں۔ اس راستے کو منتخب کرنے کی دو بڑی وجوہات ہیں۔ اول یہ کہ یہاں ڈائیوو ایکسپریس کا مصروف ترین رستہ تصور کیا جاتا ہے۔ دوئم یہ کہ گذشتہ ماہ شروع ہونے والی پُرتعیش بس سروس Qconnect بھی انہی دو شہروں کے درمیان شروع کی گئی ہے۔ ڈائیوو کی کوشش ہوگی کہ وہ جلد از جلد گولڈ کلاس کو دیگر شہروں کے لیے بھی متعارف کروائے تاکہ صارفین کا اعتماد بحال ہوسکے۔
ڈائیوو گولڈ کلاس میں شامل بسوں کی خصوصیات
٭ ہر مسافر کے لیے علیحدہ LCD اسکرین موجود ہیں۔
٭ جدید وولوو بسوں میں ماحول دوست یورو III انجن لگائے گئے ہیں۔
٭ کھڑکیوں میں دہری تہہ لگائی گئی ہے تاکہ سفر کے دوران لرزش سے کھڑکیاں بجنے کا شور کم کیا جاسکے۔
یہاں اس بات کی وضاحت ضروری ہے کہ ڈائیوو گولڈ کلاس اور Qconnect میں شامل بسیں بالکل مختلف نوعیت کی ہیں اور اگر ان میں سے بہترین کا پوچھا جائے تو شاید اکثریت کے نزدیک Qconnect کو زیادہ خصوصیات کی وجہ سے اولیت حاصل ہوگی۔ اس کے علاوہ ایک ہی روٹ پر چلنے والی ان دو بس سروسز کے کرائے میں بھی واضح فرق ہے۔
ڈائیوو گولد کلاس کی چند تصاویر
وولوو Qconnect کی چند تصاویر
