جنت نظیر سوئٹزرلینڈ میں جاری بین الاقوامی جنیوا موٹر شو 2016 اب اپنے اختتام کی جانب گامزن ہے۔پاکستان میں ہونے والے پروگرامات میں جس طرح ہفتہ وار تعطیلات کے دنوں میں زیادہ لوگ شرکت کرتے ہیں اسی طرح ہفتے اور اتوار کے روز گاڑیوں کے شوقین افراد کی بڑی تعداد جنیوا موٹر شو کا رخ کرتی ہے۔ اس شو کو دنیا میں گاڑیوں کا سب سے بڑا میلا اور اہم ترین میلہ سمجھا جاتا ہے۔ نہ صرف یورپی کار ساز ادارے بلکہ دنیا کے دیگر بڑے اور نامور ادارے بھی اپنی گاڑیوں کے ہمراہ اس موٹر شو میں شرکت کے لیے چلے آتے ہیں۔
اس سال جنیوا موٹر شو میں 1500 بریک ہارس پاور کی حامل شیرون نے سب سے زیادہ پذیرائی سمیٹی۔ چند ماہ قبل جب اس برق رفتار ہائپر کار کی خفیہ تصاویر منظر عام پر آئیں تو کوئی یقین کرنے کے لیے تیار نہ تھا کہ اسے جنیوا موٹر شو میں پیش کیا جاسکے گا۔ لیکن شیرون نے اسے پیش کر کے تمام ہی شائقین کو حیرت زدہ کردیا۔ بوگاٹی شیرون کے اعداد و شمار دیکھ کر یقین نہیں آتا لیکن یہ حقیقت ہے کہ اس گاڑی کی زیادہ سے زیادہ رفتار 260 میل فی گھنٹہ تک پہنچ سکتی ہے۔ یہ گاڑی صرف 2.5 سیکنڈ میں 0 سے 60 کلومیٹر فی گھنٹہ کی رفتار تک پہنچ سکتی ہے۔
یہ بھی پڑھیں: جنیوا موٹر شو 2016 میں لامبورگنی نے برق رفتار سینتِ نیریو ہائپر کار پیش کردی
شیرون کے علاوہ اس موٹر شو میں پیش کی جانے والی قابل ذکر گاڑیوں میں لامبورگنی سینت نیریو بھی شامل رہی جس کی قیمت 19 لاکھ ڈالر ہے۔ اطالوی کار ساز ادارہ لابورگنی اس طرز کی صرف 40 گاڑیاں تیار کرے گا اور سب سے دلچسپ بات یہ ہے کہ تمام 40 گاڑیاں پہلے ہی فروخت ہوچکی ہیں۔ اس کے علاوہ رولز-رائس نے ریتھ کا بلیک ایڈیشن متعارف کروایا۔اس موٹر شو میں صرف مہنگی اور نادر گاڑیاں ہی نہیں پیش کی گئیں بلکہ جاپانی کار ساز ادارے ہونڈا نے اپنی مشہور و مقبول ہونڈا سِوک 2017 کا ہیچ بیک انداز بھی متعارف کروایا۔
نیچے موجود ویڈیو میں آپ جنیو موٹر شو میں عوام کے سامنے پیش کی جانے والی گاڑیوں کی جھلک ملاحظہ کرسکتے ہیں۔ ان گاڑیوں میں ہونڈا کی عظیم 1965 فارمولا ون کار کے علاوہ ٹیک رولز ٹربائن اسپورٹ کار، اسکوڈا SUV، بینٹلے، بی ایم ڈبلیو، سٹریون، ٹیسلا، متحدہ عرب امارات کی لائیکان ہائپر اسپورٹس سمیت بے شمار خوبصورت گاڑیاں شامل ہیں۔
