نیون پاکستان میں اپنی مکمل الیکٹرک M3 بائیک جاری کر چکا ہے۔ M3 کی بھرپور کامیابی کے بعد نیون پاکستانی مارکیٹ میں نئی الیکٹرک بائیک پیش کرنے کی تیاری کر رہا ہے۔ نیون ایک پاکستانی کمپنی ہے جو چین سے بائیکس درآمد کرکے انہیں پاکستان میں فروخت کرتی ہے۔
نیون الیکٹرک گاڑیوں کے حوالے سے پاکستان کی سرکاری پالیسی پر حتمی فیصلے کا انتظار کر رہا ہے۔ وفاقی کابینہ پہلے ہی الیکٹرک گاڑیوں کے حوالے سے پالیسی کی منظوری دے چکی ہے، جس کی آٹو سیکٹر مخالفت کر رہا ہے۔اس کا کہنا ہے کہ اس پالیسی کو ترتیب دینے میں آٹو سیکٹر کے اہم اسٹیک ہولڈرز کی رائے نہیں لی گئی۔ ویسے یہ دیکھنا خوش آئند ہے کہ ایک پاکستانی کمپنی ملک میں الیکٹرک گاڑیوں کے فروغ کے لیے اقدامات اٹھا رہی ہے۔
منظور شدہ EV پالیسی کے تحت حکومت کا ہدف روایتی ایندھن سے چلنے والی گاڑیوں کو بجلی پر منتقل کرنا ہے۔ اس میں دو پہیوں، تین پہیوں اور چار پہیوں والی گاڑیاں سب شامل ہیں۔ الیکٹرک گاڑیاں نہ صرف آلودگی کا خاتمہ کریں گی بلکہ پاکستان کے تیل درآمد پر آنے والے اخراجات کو بھی کم کریں گی۔ البتہ موجودہ آٹو پالیسی 2016-21ء کے ہوتے ہوئے نئی EV پالیسی آٹو سیکٹر میں پریشانی کو مزید بڑھائے گی اور نئے اداروں کو پاکستانی مارکیٹ میں قدم جمانے سے روکے گی۔
حکومت نے 2030ء تک ماحول دوست ہونے کا بڑا ہدف بھی طے کیا ہے۔ وہ بند ہو جانے والے سی این جی اسٹیشنوں کو الیکٹرک چارجنگ پوائنٹس میں تبدیل کرنے کا بھی ارادہ رکھتی ہے۔ اس سے نئی الیکٹرک گاڑیوں کو چارجنگ کے لیے زیادہ سے زیادہ مقامات بھی ملیں گے اور یوں EVs خریدنے کا حوصلہ بھی بڑھے گا۔
اندازوں کے مطابق نیون کی نئی اور بہتر الیکٹرک بائیک M3 جیسی ہی ہوگی۔ البتہ نئی موٹر سائیکل کے فیچرز پرانے ماڈلز سے جدید ہوں گے اور یہ زیادہ طاقت ور ہوگی۔ ہم M3 کے ساتھ آنے والی 2000-واٹ کی بیٹری کے مقابلے میں اس الیکٹرک موٹر سے بہتر کارکردگی کی توقع بھی رکھتے ہیں۔ M3 ایک 2000 واٹ کی موٹر کے ساتھ آئی تھی کہ جو اتنی طاقتور ہے کہ اس چھوٹی بائیک کو باآسانی 90 کلومیٹرز فی گھنٹے کی رفتار سے دوڑا سکتی ہے۔ یہ موٹر ایک آٹومیٹک گیئربکس سے جڑی ہے اور یوں یہ بائیک مکمل طور پر آٹومیٹک ہے۔ نیون M3 کے ساتھ آنے والی بیٹری کی لائف 2 سے ڈھائی سال ہے اور اس کی لاگت تقریباً 4،000 روپے ہے۔
نیون M3 کی قیمت 1,28,000 روپے ہے اور توقع ہے کہ نیا ماڈل اس سے زیادہ قیمت کا ہی ہوگا۔ M3 کی الیکٹرک رینج ایک چارج میں 50 کلومیٹرز ہے۔ نئے ماڈل میں اسے کہیں زیادہ بڑھانا ہوگا کیونکہ نئی موٹر سائیکلیں ایک چارج میں 50 کلومیٹر ز سے زیادہ کا فاصلہ طے کرتی ہے۔ زبردست بات یہ ہے کہ ان الیکٹرک بائیکس میں اسپارک پلگ یا انجن آئل نہیں ہوتا۔
نیون M3 میں LED ہیڈلائٹ اور ڈے ٹائم رننگ لائٹس (DRLs) جیسے فیچرز بھی ہیں۔ آپ موٹر سائیکل کو دور سے ہی لاک یا اَن لاک کر سکتے ہیں۔ نیون برانڈ کی اگلی الیکٹرک بائیک سے کم از کم اِن فیچرز کی امید تو رکھی جا سکتی ہے۔
اپنے خیالات نیچے تبصروں میں پیش کیجیے اور مزید معلوماتی اور خبری مواد کے لیے آتے رہیے۔
