ایسا محسوس ہوتا ہے کہ انڈس موٹرز کمپنی (IMC) نے مقامی مارکیٹ میں انقلاب برپا کرنے کی ٹھان لی ہے۔ اس کی ایک مثال تو اس وقت ملی کہ جب ادارے نے لگ بھگ 1300 گاڑیوں کی بُکنگ یہ کہہ کر منسوخ کردی کہ انہیں خریدنے والے دراصل سرمایہ کار ہیں جو گاڑیوں کے حصول کے بعد انہیں اضافہ قیمت پر کسی دوسرے شخص کو فروخت کرنا چاہتے ہیں۔ پاکستان میں گاڑیاں بنانے والے ادارے عام طور پر اس معاملے سے نظریں چراتے ہیں کہ ان کی گاڑی کون اور کیوں خرید رہا ہے تاہم ٹویوٹا پاکستان نے ایک نئی مثال قائم کردی ہے۔ اس فیصلے کا ایک مقصد اصل خریداروں کو گاڑیوں کی فراہمی میں تاخیر پر قابو پانا بھی ہے۔ اور اب انڈس موٹرز نے ایک مرتبہ پھر اس فیصلے کے ساتھ اپنے مداحوں اور مقامی خریداروں کو خوش کردیا ہے کہ وہ اپنے کارخانے میں گاڑیاں تیار کرنے کے اہلیت بڑھانے کے لیے 4 کروڑ ڈالر سرمایہ کاری کرے گا۔
ٹویوٹا پاکستان نئی سرمایہ کاری کے ذریعے سالانہ 10 ہزار زائد گاڑیاں تیار کرنے کی امید رکھتا ہے۔ یاد رہے کہ فی الوقت انڈس موٹرز کے کارخانوں میں ہر سال 54800 گاڑیاں تیار کی جارہی ہیں۔ ادارے کی جانب سے اس اقدام کو بھی بہت حوصلہ افزا قرار دیا جارہا ہے۔ اس سے نہ صرف گاڑیوں کی بُکنگ اور فراہمی کے درمیان وقت کو کم کیا جاسکے گا بلکہ پہلے سے زیادہ خریداروں کی مانگ بھی پوری کی جاسکے گی۔
علاوہ ازیں ادارہ ان امور پر بھی غور و خوص کرنے کا خواہاں ہے جس کے باعث گاڑیوں کی فراہمی میں غیر ضروری تاخیر ہورہے ہیں۔ انگریزی میں اس جائزہ کو debottlenecking کہا جاتا ہے۔ اس کے ذریعے مصنوعات کی تیاری میں آنے والے نامعلوم مسائل کی نشاندہی میں مدد ملے گی جنہیں حل کر کے ادارہ اپنے کارخانے کی اہلیت کو بہتر بنا سکتا ہے۔
انڈس موٹرز پاکستان بہت جلد پاکستان میں ٹویوٹا فورچیونر 2018ء پیش کرنے کا ارادہ رکھتا ہے۔ نیز مستقبل قریب میں کرولا GLi اور Xli ماڈل کی تیاری بند کیے جانے کی بھی توقع ہے۔ ماہرین کے مطابق ٹویوٹا پاکستان مذکورہ دو ماڈلز کی جگہ 1300cc وائیوس 2018 یا پھر 1000cc یارس 2018 لے سکتی ہے جسے پاکستان میں وٹز کے نام سے جانا جاتا ہے۔
فورچیونر کے ڈیزل ماڈل کے علاوہ ٹویوٹا پاکستان پاکستان میں پہلی مرتبہ نئی ہائبرڈ ٹویوٹا کیمری بھی متعارف کروائے گی۔
گاڑیاں بنانے والے ادارے کی جانب سے یہ پیش رفت نہ صرف ادارے کو مزید پھلنے پھولنے اور ترقی کے مواقع فراہم کرے گی بلکہ مقامی مارکیٹ میں بھی مسابقت کی فضا مزید بڑھے گی جس سے دیگر کار ساز اداروں کو بھی سرمایہ کاری اور کارخانوں کو بہتر بنانے کی تحریک ملے گی۔
آپ نئی سرمایہ کاری کو کس نظر سے دیکھتے ہیں؟ ہمیں اپنے تبصروں کے ذریعے اپنی رائے سے آگاہ کیجیے۔
