اٹلس ہونڈا نے ایک مرتبہ پھر اپنی موٹر سائیکلوں کی قیمتیں بڑھا دی ہیں، اور بظاہر اس کی کوئی وجہ نظر نہیں آتی۔ نوٹیفکیشن کے مطابق قیمتوں میں 3,000 روپے تک کا اضافہ کیا گیا ہے۔ نئی قیمتیں 3 مئی 2021 سے لاگو ہو چکی ہیں۔
ہونڈا اٹلس موٹر سائیکلوں کی نئی قیمتیں:
ہونڈا CD70 کی نئی قیمت 1,600 روپے کے اضافے کے بعد 84,500 روپے ہے۔ CD70 کی پرانی قیمت 82,900 روپے تھی۔ اس کے علاوہ CG-125 کی قیمت میں 3,000 روپے کا اضافہ دیکھا گیا ہے جو اب 1,36,500 روپے کی پرانی قیمت کے بجائے 1,39,500 روپے کی پڑے گی۔ CD70-ڈریم کی نئی قیمت اب 2,600 روپے کے اضافے کے بعد 90,500 روپے ہے۔
CG-125/سیلف اسٹارٹر کی نئی قیمت 1,67,500 روپے، CB-125F کی 2,00,500 روپے اور CB-150F کی 2,55,500 روپے ہے، ان تمام موٹر سائیکلوں کی قیمتوں میں 3,000 روپے کا اضافہ کیا گیا ہے۔
اپریل 2021 میں ہونے والا قیمتوں میں اضافہ:
اپریل کے اوائل میں موٹر سائیکل بنانے والی کمپنی نے قیمتوں میں 1,600 روپے تک کا اضافہ کیا تھا۔ کمپنی نے ہونڈا CD-70، ہونڈا CD-70 ڈریم اور ہونڈا پرائیڈر کی قیمتوں میں 1,000 روپے کا اضافہ کیا۔ جبکہ ہونڈا CG-125، ہونڈا CB-125F، ہونڈا CG-125S اور ہونڈا CB-150 کی قیمتیں 1,600 روپے بڑھیں۔
یہ 2021 کے آغاز سے اب تک چوتھا موقع ہے کہ ہونڈا نے اپنی موٹر سائیکلوں کی قیمتوں میں اضافہ کیا ہے۔ پہلی بار کمپنی نے نئے سال کی خوشیوں پر رنگ میں بھنگ ڈالا اور یکم جنوری کو اپنی موٹر سائیکلوں کی قیمتوں میں اضافہ کر دیا۔ پھر صرف ایک مہینے بعد کمپنی نے یکم فروری کو پھر قیمتیں بڑھانے کا اعلان کیا۔
قیمتوں میں گزشتہ تین اضافوں کی بظاہر کوئی وجہ سمجھ نہیں آتی، نہ ہی حالیہ اضافے کی۔ حقیقت یہ ہے کہ گزشتہ چند ہفتوں میں امریکی ڈالر کی قیمتوں میں نمایاں کمی آئی ہے، اس لیے عوام تو گاڑیوں کی قیمتوں میں کمی کی توقع کر رہے تھے۔ لیکن ہونڈا مزید اضافہ کر کے اپنے کسٹمرز کے ساتھ اچھا نہیں کر رہا۔
اگر ہم 1 سے 10 تک نمبر دیں، (جس میں 10 انتہائی ناانصافی کو ظاہر کرتا ہو) آپ ہونڈا کے اس قدم کو کتنے نمبر دیں گے؟ آپ کے خیال میں ہونڈا اٹلس موٹر سائیکلوں کی قیمتوں میں ایک اور اضافے کے بعد صارفین کا رد عمل کیا ہوگا؟ کیا آپ سمجھتے ہیں کہ موٹر سائیکل بنانے والے اداروں کی جانب سے قیمتوں میں نامناسب اضافے پر حکومت کو نوٹس لینا چاہیے؟ کیا آٹو انڈسٹری کو قیمتوں میں اضافے کے لیے مینوفیکچررز کے لیے ایک ریگولیٹری سسٹم کی ضرورت ہے؟ اپنے خیالات نیچے کمنٹس سیکشن میں پیش کیجیے۔
