اب سے چند روز قبل ہم نے آپ کو یہ خبر بتائی تھی کہ آوڈی پاکستان نے سرمایہ کاری بورڈ کو ایک خط ارسال کیا ہے جس میں پاکستان کے اندر گاڑیوں کی تیاری شروع کرنے میں دلچسپی ظاہر کی گئی ہے۔ اور اب ایسا محسوس ہوتا ہے کہ جرمن کار ساز ادارہ اپنے منصوبے پر عمل کرتے ہوئے پاکستان میں گاڑیوں کے خریداروں کو متوجہ کرنے کی شروعات کر چکا ہے۔ اس حوالے سے تازہ ترین پیش رفت آوڈی کی جانب سے پاکستان میں کم قیمت کراس اوور متعارف کروائے جانے کی خبر سے سامنے آئی ہے۔ آوڈی پاکستان کے فیس بک صفحے پر آئندہ سال 2017 کے اوائل میں آوڈی Q2 متعارف کروانے کا باضابطہ اعلان بھی کردیا گیا ہے۔
آوڈی پاکستان کی تیز پیش رفت سے ظاہر ہوتا ہے کہ کار ساز ادارہ آٹو پالیسی 2016-21 سے بھرپور فوائد سمیٹنا چاہتا ہے۔ اس سے قبل آوڈی کے پاکستانی شراکت دار ادارے پریمیئر سسٹمز پرائیوٹ لمیٹڈ کے سربراہ علی خان نے بتایا تھا کہ پاکستان میں سالانہ 900 سے زائد آوڈی گاڑیاں فروخت ہورہی ہیں جبکہ کم قیمت اور سستی گاڑیوں کی پیشکش کے بعد اس تعداد میں قابل ذکر اضافہ ہونے کی توقع ہے۔
یہ بھی پڑھیں: پاکستان میں دستیاب آوڈی Q3 کی قیمت میں کمی کردی گئی
آوڈی Q2 پر نظر دوڑائیں تو یہ اپنے انداز کی وجہ سے منفرد کہی جاسکتی ہے لیکن اس کا حجم/پیمائش آوڈی Q3 سے کافی کم ہے۔ بین الاقوامی مارکیٹ میں اس کے تین ماڈلز متعارف کروائے گئے ہیں جنہیں SE، S لائن اور ایڈیشن #1 کے نام سے پیش کیا گیا ہے۔ آوڈی Q2 کو 1600cc ڈیزل انجن (114 بریک ہارس پاور) اور 1400cc پیٹرول انجن (148 بریک ہارس پاور) کے علاوہ 1000cc ٹربوچارجڈ پیٹرول انجن (114 بریک ہارس پاور) کے ساتھ بھی پیش کیا جاتا ہے۔
ذرائع کے مطابق آوڈی پاکستان اس کراس اوور کو 3-سلینڈر 1000cc ٹربو چارجڈ انجن کے ساتھ پیش کرنے کا ارادہ رکھتا ہے۔ اس سے نہ صرف گاڑی درآمد کرنے بلکہ اس کی رجسٹریشن اور ٹیکس کی مد میں بھی کم اخراجات آئیں گے۔ یوں آوڈی Q2 کو کم قیمت پر فروخت کیا جاسکے گا جو کہ ایک اندازے کے مطابق 27 سے 30 لاکھ روپے تک ہوسکتی ہے۔ پاکستان میں آوڈی Q2 کو مختلف حریفوں کا سامنا کرنا پڑے گا جن میں ہونڈا وزل، HR-V اور گزشتہ ماہ متعارف کروائی جانے والی بی ایم ڈبلیو X1 بھی شامل ہیں۔
مزید پڑھیں: بی ایم ڈبلیو X1 بمقابلہ آوڈی Q3 – دو جرمن گاڑیاں کا ٹاکرا
