گاڑیاں بنانے والے جرمن ادارے بی ایم ڈبلیو اور آوڈی پاکستان میں اپنے صارفین کی تعداد میں اضافے کے لیے کمربستہ ہوچکے ہیں۔ اس مقصد کو حاصل کرنے کے لیے دونوں ہی ادارے بین الاقوامی مارکیٹ میں پیش کیے جانے والے نت نئے ماڈلز کو پاکستان میں بھی جلد از جلد متعارف کروانے کی کوششوں میں مصروف نظر آتے ہیں۔ ابھی کچھ عرصہ قبل ہی بی ایم ڈبلیو پاکستان نے 2017 بی ایم ڈبلیو 5 سیریز 530i متعارف کروائی ہے۔ اور اب تازہ خبر یہ ہے کہ بی ایم ڈبلیو پاکستان میں جلد دو نئی گاڑیاں پیش کرنے جارہا ہے:
- 2017 بی ایم ڈبلیو 2 سیریز کوپے
- 2017 بی ایم ڈبلیو 2 سیریز کنورٹ ایبل
اس حوالے سے بی ایم ڈبلیو پاکستان نے بتایا کہ کوپے اور کنورٹ ایبل دونوں ہی گاڑیاں 218i ہوں گی۔ یہ پہلا موقع ہے کہ بی ایم ڈبلیو پاکستان میں 2 سیریز کی گاڑیاں باضابطہ طور پر پیش کر رہا ہے۔ فی الوقت پاکستان میں بی ایم ڈبلیو کی درج ذیل پانچ گاڑیاں فروخت کی جارہی ہیں:
- بی ایم ڈبلیو 3 سیریز
- بی ایم ڈبلیو 5 سیریز
- بی ایم ڈبلیو X1
- بی ایم ڈبلیو X4
- بی ایم ڈبلیو X5
پاکستان میں 2 سیریز کی آمد سے بی ایم ڈبلیو کی فہرست میں قابل ذکر اضافہ ہوجائے گا۔ بی ایم ڈبلیو پاکستان نے پاک ویلز سے خصوصی بات چیر کرتے ہوئے کہا کہ ابتداء میں چند گاڑیاں درآمد کی جارہی ہیں تاکہ مارکیٹ اور صارفین کے ردعمل کا اندازہ لگایا جاسکے۔ اور اگر پاکستانی صارفین نے اس گاڑی کو پسند کیا تو بی ایم ڈبلیو مزید گاڑیوں کو یہاں فروخت کرنے کے لیے منگوا سکتا ہے۔
یہ بھی پڑھیے: BMW X1 پاک وہیلز کی استعمال شدہ گاڑیوں کی لسٹ میں شامل
انجن اور کارکردگی
بی ایم ڈبلیو 218i کے دونوں ہی ماڈل 3-سلینڈر اور 12 والو والے 1499cc واٹرٓکولڈ ٹربوچارجڈ انجن کے ساتھ پیش کیے جائیں گے۔ یہ انججن 1250 آر پی ایم پر 220 نیوٹن میٹر ٹارک اور 136 بریک ہارس پاور فراہم کرنے کی سکت رکھتا ہے۔ بی ایم ڈبلیو 218i کوپے کی زیادہ سے زیادہ رفتار 210 کلومیٹر فی گھنٹہ ہے جبکہ یہ گاڑی صرف 9.6 سیکنڈ میں 0 سے 60 کلومیٹر فی گھنٹہ کی رفتار پکڑ سکتی ہے۔ ایندھن کی کفایت کے بارے میں بی ایم ڈبلیو کا کہنا ہے کہ 218i کوپے ایک لیٹر میں 17-19 کلومیٹر جبکہ کنورٹ ایبل ماڈل ایک لیٹر میں 16-18 کلومیٹر تک سفر کرسکتی ہیں۔
بی ایم ڈبلیو پاکستان نے ان گاڑیوں کو متعارف کروائے جانے کی حتمی تاریخ بتانے سے گریز کیا تاہم اندازہ لگایا جارہا ہے کہ کوہے اور کنورٹ ایبل دونوں ہی ماڈل رواں سال نومبر کے اواخر میں فروخت کے لیے پیش کردیے جائیں گے۔
