صوبہ پنجاب کی وزیر خزانہ عائشہ غوث پاشا نے درآمد شدہ گاڑیوں پر فکسڈ ٹیکس عائد کرنے کی سفارش کردی ہے۔ انہوں نے یہ تجویز صوبائی اسمبلی کے اجلاس میں آئندہ مالی سال 2016-2017 کا بجٹ پیش کرتے ہوئے کی۔ صوبائی وزیر خزانہ نے مجموعی طور پر 1681 ارب 41 کروڑ روپے کا بجٹ پیش کیا جس میں صوبائی ٹیکس وصولی کا ہدف 185 ارب روپے رکھا گیا ہے۔
حکومتِ پنجاب کی جانب سے 1000cc اور زائد انجن والی گاڑیوں پر 25 ہزار روپے، 1300cc اور زائد انجن والی گاڑیوں پر 70 ہزار روپے، 1500cc اور زائد انجن والی گاڑیوں پر ڈیڑھ لاکھ روپے، 2000cc اور زائد انجن والی گاڑیوں پر 2 لاکھ روپے جبکہ 2500cc اور زائد انجن سے والی گاڑیوں پر 3 لاکھ روپے ٹیکس وصول کرنے کی تجویز پر غور کیا جارہا ہے۔ 1000cc سے کم قوت والے انجن کی حامل گاڑیوں پر یہ ٹیکس لاگو نہیں ہوگا۔
| زمرہ | مجوزہ ٹیکس |
|---|---|
| 1000cc تا 1300cc | 25,000 روپے |
| 1301cc تا 1500cc | 70,000 روپے |
| 1501cc تا 2000cc | 1,50,000 روپے |
| 2001cc تا 2500cc | 2,00,000 روپے |
| 2501cc اور زائد | 3,00,000 روپے |
یہ بھی پڑھیں: گاڑیوں کی غیر قانونی درآمد؛ حکومت نے قوانین سخت کرنے کا فیصلہ کرلیا
تجویز میں کہا گیا ہے کہ وفاقی اور صوبائی حکومتوں کے زیر استعمال گاڑیاں اس ٹیکس سے مستثنی ہوں گی۔ علاوہ ازیں صوبائی حکومت کو یہ اختیار حاصل ہوگا کہ وہ مستقبل میں گاڑیوں کے کسی بھی زمرے پر ٹیکس کو ختم کرسکتی ہے۔ اس ٹیکس کا مقصد ملک میں تیار ہونے والی گاڑیوں کو فروغ دینا اور بیرون ممالک سے گاڑیوں منگوانے کی حوصلہ شکنی کرنا ہے۔
