ہمارے مستقل قارئین جانتے ہی ہونگے کہ ہاماہا پاکستان میں پاکستان آٹوموٹو مینوفیکچررز ایسوسی ایشن (PAMA) اور پاکستان ایسوسیشن آف آٹوموٹیوپارٹس اینڈ ایسیسریز (PAAPAM) کی جانب سے درکار تمام مشکل مراحل طے کرنے کے بعد کراچی میں موٹر سائیکلوں کی تیاری شروع کرنے جا رہی ہے۔ ماضی میں داؤد گروپ اور یاماہا موٹر کمپنی کا اتحاد پاکستان میں داؤد یاماہا لمیٹڈ (DYL) کے نام سے موٹر سائیکل تیار اور فروخت کرتے تھے لیکن اب یاماہا جاپان خود پاکستان میں کاروبار کا آغاز کرے گی۔
یاماہا نے اپنی پہلی موٹرسائیکل رواں سال ستمبر میں متعارف کرانے کی منصوبہ بندی کی تھی تاہم نامعلوم وجوہات کی وجہ سے یہ منصوبہ تاخیر کا شکار ہوگیا۔ اب کہا جارہا ہے کہ یاماہا اگلے سال کی دوسری سہ ماہی (مئی کے مہینے) میں موٹرسائیکل متعارف کروانے کا آغاز کرے گی۔ ابتداء میں موٹر سائیکل مکمل طور پر جاپان سے درآمد کی جائے گی اور بعد میں پاک سوزوکی GS150 کی طرح مقامی طور پر تیار کی جائے گی۔
یاماہا سب سے پہلے پاکستان میں یاماہا YBR125 متعارف کرائے گی۔ اس میں ایک سلنڈر 4 اسٹروک 125 سی سی انجن کے ساتھ 5 اسپیڈ گیئر باکس ہوگا۔ بائیک 3 مختلف انداز میں دستیاب ہوگی۔ سب سے بہترین ماڈل کی قیمت ڈیڑھ لاکھ روپے، اوسط کی سوا لاکھ روپے جبکہ تیسرے درجے کے ماڈل کی 1 لاکھ روپے رکھے جانے کا امکان ہے۔ یہ موٹر سائیکل ان تمام خصوصیات کی حامل ہونگی جو بائیک چلانے کے شوقین کسی فرد کا دل جیت سکتی ہیں۔
موٹر سائیکل کے کاروبار سے جڑی چند شخصیات نے بتایا کہ یاماہا ڈیلرشپ کے معاملات کو دیکھنے کے علاوہ پیشہ ور مکنیک کو بائیک کی مرمت کے لیے تربیت دے رہا ہے۔ یاماہا موٹر سائیکل کی پیشگی بکنگ کرنے والے ایک فرد نے بتایا کہ یاماہا 6 مئی 2015 کو اپنی بائیکس متعارف کروائے گی تاہم یاماہا کے نمائندے نے اس کی تصدیق سے انکار کیا ہے۔ جیسے ہی ہمیں مزید معلومات ملتی ہے ہم آپ لوگوں کو اس سے آگاہ کریں گے۔ دریں اثنا ، آپ پاک ویلز فورم پر جاکر یاماہا کی آئندہ آنے والی بائیکس پر مباحثے میں حصہ لے سکتے ہیں۔
ہاماہا موٹر سائیکل کی کچھ تصاویر :
