اگر آپ گاڑیوں کا شوق رکھتے ہیں تو پھر کین بلاک (Ken Block) کے بارے میں ضرور جانتے ہوں گے۔اس کے علاوہ آپ نے مشہور جمخانہ ویڈیوز بھی دیکھ رکھی ہوں گی۔ اگر نہیں، تو ہم آپ کو بتائے دیتے ہیں۔ کین بلاک دنیا کے مشہور ریلی کار ڈرائیور ہیں۔ یہ گاڑیوں کے شوقین افراد میں اپنی خطرناک ڈرفٹنگ کی وجہ سے جانے جاتے ہیں۔
جمخانہ سیریز کے نام سے یوٹیوب ویڈیوز نے کین کو شہرت کی بلندیوں پر پہنچایا۔ اس ویڈیو سیریز میں کین نے ریلی کارز میں چند خطرناک کرتب کا مظاہرہ کیا ہے۔ ویڈیو کے اس سلسلے نے کین کو متعدد اسپانسرشپ کے حصول میں مدد دی اور اب وہ فورڈ موٹر کمپنی کے ساتھ کام کر رہے ہیں۔ کین بلاک جمخانہ سیریز کے نام سے 7 ویڈیوز پیش کرچکے ہیں۔ انہوں نے اپنی آخری ویڈیو “جمخانہ 7” امریکی ریاست کیلی فورنیا کے سب سے بڑے شہر لاس اینجلس میں ریکارڈ کروائی۔ اس ویڈیو میں کین نے ہونی کورن AWD فورڈ موستنگ دوڑائی۔
یہ بھی پڑھیں: ٹوکیو آٹو سلون 2016 میں V8 انجن کی حامل لیکسز LFA کا دھمال
اب جمخانہ سیریز کی آٹھویں ویڈیو کے لیے کین بلاک اور ان کی ٹیم دبئی پہنچ چکی ہے۔ جمخانہ 8 کی رکارڈنگ متعدد مقامات پر کی جائے گی جن میں ہوائی جہاز کے لیے تیار کیا گیا رن وے بھی شامل ہے۔ البتہ کین بلاک نے ہونی کورن 1965 فورڈ موستنگ کی جگہ اس ویڈیو کے لیے فورڈ فیستا ST کو منتخب کیا ہے جو RX43 ریلی کراس کار کے نام سے مشہور ہے۔ اس میں 4 سلینڈر ٹربو چارجڈ انجن استعمال کیا گیا ہے جو 650 ہارس پاور فراہم کرسکتا ہے۔ خصوصی طور پر جمخانہ 8 کے لیے تیار کی گئی اس گاڑی کا رنگ روشنی اور دیکھنے والے کی نظروں کے زاویے سے تبدیل ہوتا ہے البتہ چاروں طرف لگے اسٹیکرز عام طرح ہی نظر آتے ہیں۔ کین بلاک نے جمخانہ 8 کو اپنے پسندیدہ ترین پروجیکٹس میں سے ایک قرار دیا ہے۔
ذیل میں آپ وہ ویڈیو ملاحظہ کرسکتے ہیں جو اس وقت دنیا بھر میں سب سے زیادہ دیکھی جارہی ہے۔ اس ویڈیو میں عقاب کی اڑان، چیتے کی پھرتی، برق رفتار گاڑیاں اور دیوہیکل جہاز سمیت بہت کچھ قابل دید ہے۔ آپ بھی دیکھیں اور لطف اٹھائیں!
