طویل انتظار کے بعد بالآخر پاکستان میں نئی ہونڈا سوک 2016 کی باقاعدہ رونمائی ہونے جارہی ہے۔ چند روز قبل ہونڈا ایٹلس کی جانب سے ملک بھر کے تقریباً تمام ہی ڈیلرشپس پر ہونڈا سِوک 2016 بھیجے جانے کا سلسلہ شروع ہوچکا تھا۔ اس ضمن میں متعدد تصاویر اور ویڈیوز ہم اپنے قارئین کو پیش کرچکے ہیں جس میں ہونڈا سِوک کے بہترین ماڈل یعنی 1.5L ٹربو کی دلکش تصاویر اور اہم بھی معلومات شامل ہیں۔ یہ تصاویر پاک ویلز فورم کے ایک رکن کی جانب سے ہمیں موصول ہوئیں تھیں۔
یہ بھی پڑھیں: ہونڈا ایٹلس کی جانب سے سِوک 2016 کی باضابطہ رونمائی کا عندیہ
ان تصاویر کی مدد سے ہمیں سِوک 1.5 ٹربو کے ان پہلوؤں پر روشنی ڈالنے کا موقع ملا کہ جن کا ہونڈا پاکستان کی جانب سے اعلان نہیں کیا گیا تھا۔ تاہم اب تک ہونڈا سِوک 1.8 ماڈل کی خصوصیات اور سہولیات سے پردہ اٹھنا باقی ہے۔ یاد رہے کہ اب سے 40 روزن قبل شروع ہونے والی سِوک کی پیشگی بُکنگ کے وقت تمام تر معلومات محض قیاس آرائیوں اور بین الاقوامی سطح پر پیش کی جانے والی سِوک کو دیکھتے ہوئے فراہم کی جارہی تھیں۔
مزید پڑھیں: پاکستان میں تیار شدہ نئی ہونڈا سِوک 1.5 ٹربو کی خفیہ تصاویر
ہونڈا سِوک 1.8 اریئل سے متعلق چہ مگوئیوں میں اس وقت اضافہ ہوا کہ جب ہونڈا ایٹلس کے کارخانے میں کھڑی نسبتاً کم سہولیات کی حامل سِوک دیکھی گئی۔ مذکورہ سِوک کی تصاویر سوشل میڈیا پر ان سوالات کے ساتھ گردش کرتی نظر آئیں کہ آیا یہ سِوک 1.8 اوریئل ہے یا پھر کوئی نیا ماڈل بنایا گیا ہے؟
ان تصاویر میں آپ بخوبی دیکھ سکتے ہیں کہ سِوک 1.5 ٹربو ماڈل کے برعکس سِوک کے اس ماڈل میں الائے رمز اور تیز روشنی کی حامل fog lights کے علاوہ چھت پر موجود کھڑکی (sun roof) بھی موجود نہیں ہیں۔ اس حوالے سے سوشل میڈیا پر متعدد باتیں گردش کر رہی ہیں۔ کچھ لوگوں کا خیال ہے کہ یہ سِوک 1.8 ہے کہ جسے ہونڈا 25 لاکھ روپے میں فروخت کرنے میں ناکام رہا ہے اور اب منافع کمانے کے لیے اس میں فراہم کی جانے والی خصوصیات بھی کمی لا رہا ہے۔ بعض افراد کا یہ بھی کہنا تھا کہ 1.8 میں VSA کی سہولت بھی شامل نہیں کی گئی۔ کچھ لوگوں نے اس کمی کو 1.8 اور 1.5 ماڈل میں بنیادی تفریق لانے کی ایک کوشش قرار دیا تاکہ سِوک 1.5 ٹربو ماڈل کی اضافی قیمت کا جواز پیش کیا جاسکے۔ گویا جتنے منہ اتنی باتیں لیکن حقیقت کچھ اور ہی ہے۔
یہ بھی پڑھیں: پاکستان میں ہونڈا سِوک 2016 بُک کروانے کا طریقہ
پاکستان میں تیار شدہ ہونڈا سِوک 1.8 اوریئل کی تصاویر اور ویڈیو دیکھنے کے بعد یہ بات صاف ظاہر ہے کہ ہونڈا پاکستان کسی بھی ماڈل میں شامل خصوصیات یا سہولیات میں کوئی کمی نہیں کر رہا۔ اور جو تصاویر اوپر پیش کی جارہی ہیں وہ ہونڈا سِوک 1.8 ہی کے “متوقع” سادے (basic) ماڈل کی ہیں۔ ہونڈا ایٹلس کی فیکٹری میں موجود اس سادے ماڈل میں چند خصوصیات کے ساتھ قیمت بھی کم رکھے جانے کا امکان ہے۔ لیکن اس سادے ماڈل سے متعلق ہونڈا ایٹلس نے صارفین کو کیوں آگاہ نہیں کیا؟ اس سوال کا جواب تو ہونڈا پاکستان ہی سے لیا جاسکتا ہے۔
یہ پہلی بار نہیں کہ ہونڈا پاکستان اس حکمت عملی کو استعمال کر کے مزید خریداروں کو اپنی طرف متوجہ کرنے کی کوشش کر رہا ہے۔ سِوک کی گزشتہ تینوں جنریشن کے ساتھ ہونڈا ایٹلس نے اسی طریقہ کار کو انتہائی کامیابی سے استعمال کیا ہے۔
ہونڈا سِوک 1.8 اوریئل کی خفیہ تصاویر
ذیل میں موجود تصاویر سے بخوبی اندازہ لگایا جاسکتا ہے کہ ہونڈا سِوک 1.8 میں کیا کچھ پیش کیا جارہا ہے۔ علاوہ ازیں ان تصاویر سے اس بات کو بھی تقویت ملتی ہے کہ ہونڈا ایٹلس کے کارخانے میں دیکھی جانے والا سادہ ماڈل بالکل مختلف ہے۔
اگلی جانب کروم گِرل، دھند میں نظر آنے والی خصوصی روشنیاں (fog lights) اور چمکدار لائٹس (DRLs)
16 انچ کے الائے رمز اور 215/55 R16 ویلز
پچھلے شیشے پر اسٹیکر (جس سے ABS اور VSA کی تصدیق ہوتی ہے)
ہونڈا سِوک 1.8 اوریئل کے اندرونی حصے کی بات کریں تو اس میں درج ذیل سہولیات شامل ہیں:
٭ اسٹیئرنگ پر ملٹی میڈیا، کروز کنٹرول کے لیے بٹنز
٭ ڈیش بورڈ پر یک طرفہ A/C
٭ ڈیجیٹل اسپیڈومیٹر
٭ بٹن سے گاڑی اسٹارٹ کرنے کی سہولت
جبکہ درج ذیل خصوصیات شامل نہیں کی گئی ہیں:
٭ اسٹیئرنگ ویل پر چمڑے کا کوور
٭ اسٹیئرنگ ویل پر بلوٹوتھ کنٹرول
٭ ڈیش بورڈ پر دو طرفہ A/C
٭ رنگین اسپیڈومیٹر
٭ پیڈل شفٹرز (جو کہ سِوک 1.5 ٹربو میں شامل ہیں)
اس ویڈیو کے ذریعے بھی تصدیق کی جاسکتی ہے کہ ہونڈا سِوک 1.8 اریئل میں کیا کچھ شامل ہے۔ یاد رہے کہ یہ ویڈیو لاہور کے ایک ڈیلرشپ کو موصول ہونے والی سِوک 1.8 کی ہے۔
ہونڈا سِوک 1.8 اریئل کی مزید تصاویر
