ہیونڈائی کی جانب سے پاکستان آمد کے باضابطہ اعلان اور سال 2018ء کی تیسری سہ ماہی میں گاڑیاں پیش کیے جانے کے بعد ہم نے فیصلہ کیا کہ اپنے قارئین کو ان گاڑیوں سے متعلق بتایا جانا چاہیے جنہیں ہیونڈائی یہاں متعارف کروا سکتا ہے۔ اس سلسلے کے دوسرے حصے میں ہم ہیونڈائی الینٹرا کا تعارف آپ کی خدمت میں پیش کر رہے ہیں۔
تاریخ
ہیونڈائی الینٹرا کو ایک فیملی سیڈان مانا جاتا ہے۔ اسے چند ممالک میں آوینتے کے نام سے بھی پیش کیا جاتا رہا ہے۔ اسے پہلی مرتبہ 1990 میں پیش کیا گیا تھا۔ اس وقت یہ ہونڈا سِوک اور ٹویوٹا کرولا کی براہ راست مقابل سمجھی جاتی تھی۔ اس وقت ہیونڈائی الینٹرا کی چھٹی جنریشن فروخت کی جارہی ہے جسے 2015ء میں متعارف کروایا گیا تھا۔
ڈیزائن
ماضی میں ہیونڈائی اپنی گاڑیوں کے ڈیزائن میں ہمیشہ انفرادیت قائم رکھنے کے لیے مشہور رہا ہے تاہم نئی گاڑیوں کے معاملے میں ایسا بالکل نہیں ہے۔ ہیونڈائی نے اس مرتبہ قدرے محفوظ راستہ اپناتے ہوئے اپنی گاڑیوں کو بہت زیادہ مختلف بنانے کے بجائے عمومی رجحان سے ہم آہنگ رکھا ہے۔ البتہ ہمیشہ کی طرح اس مرتبہ بھی انہوں نے خوبصورتی پر کوئی سمجھوتا نہیں کیا اور الینٹرا سمیت ان کی ہر گاڑیاں بہت جاذب نظر ہے۔ الینٹرا کی بات کریں تو اس کے اگلے حصے میں مسدسی (چھ کونوں والی) بڑی سی گرل موجود ہے جو اسے منفرد انداز دیتی ہے۔ اس میں ڈی آر ایلز پروجیکٹر ہیڈ لائٹس اور اسٹاپ لائٹس بھی دی گئی ہیں۔
اپنے حریفوں کے مقابلے میں ہیونڈائی الینٹرا کی پیمائش تھوڑی کم ہے۔ اس کی لمبائی 4570 ملی میٹر جبکہ چوڑائی 1800 ملی میٹر ہے۔ البتہ ویل بیس اس کا دیگر سیڈان جتنا یعنی 2700 ملی میٹر ہی ہے۔
انجن، ٹرانسمیشن و قوت
یہ جان کر آپ کو حیرت ہو گی کہ الینٹرا کئی نئے ٹربو چارجڈ انجن کے ساتھ پیش کی جارہی ہے جو اس کی انفرادیت میں مزید اضافہ کرتے ہیں۔ گو کہ اب تک باضابطہ طور پر یہ بات نہیں بتائی گئی کہ پاکستان میں الینٹرا کو کس انجن کے ساتھ پیش کیا جائے گا تاہم ہمارے خیال میں اسے 1400cc ٹربو اور 1600cc ایم پی آئی پیٹرول کے ساتھ پیش کیا جائے گا۔ گو کہ مذکورہ دونوں انجن 128 بریک ہارس پاور کی قوت فراہم کرتے ہیں تاہم ان میں بنیادی فرق ٹرانسمیشن کا ہے۔ 1600cc پیٹرول انجن کے ساتھ 6-اسپیڈ آٹو اور 1400cc ٹربو کے ساتھ ڈیول کلچ ٹرانسمیشن گاڑی کو برق رفتاری کے حصول میں مدد فراہم کرتے ہیں۔
خصوصیات
ہیونڈائی الینٹرا متعدد خصوصیات کے ساتھ پیش کی جارہی ہیں جن میں سے چند یہ ہیں:
- ٹریکشن کنٹرول
- اسٹیبلٹی کنٹرول
- اے بی ایس
- اینڈرائیڈ آٹو
- ایپل کار پلے
- ہیٹڈ سیٹس
- پچھلی نشستوں پر A/C
یہ یاد رہے کہ تمام خصوصیات صرف بہترین و مہنگے ماڈل میں ہی ہوں گی البتہ سادے ماڈل میں بھی اے بی ایس، ایئر بیگز، پاور اسٹیئرنگ جیسی خصوصیات شامل ہوں گی۔
حتمی رائے
الینٹرا بہترین خصوصیات سے لیس پسند کی جانے والی گاڑی ہے۔ اگر اس کی قیمت مناسب رکھی جائے تو یہ بلاشبہ ہونڈا سوک اور ٹویوٹا کرولا کو زبردست ٹکر دینے کی اہلیت رکھتی ہے۔ اگر ہیونڈائی واقعی کم وقت میں زیادہ سے زیادہ خریداروں کو اپنی طرف متوجہ کرنا چاہتا ہے تو اسے قیمت کے معاملے میں انتہائی محتاط رہنا پڑے گا۔ اور ہمارے خیال میں ہیونڈائی الینٹرا کے سادے ماڈل کی قیمت 18 لاکھ سے زیادہ نہیں ہونی چاہیے۔ چونکہ گاڑی کا انداز بہت مناسب ہے اور اگر اچھی قیمت میں اسے پیش کیا گیا تو یہ دیگر گاڑیوں کو ہلا کر رکھ دے گی اور پاکستان میں گاڑیوں کے شعبے میں زبردست ہلچل کا باعث بنے گی۔
