آٹوموٹو انڈسٹری کو درپیش عالمی انوینٹری کی کمی کے مسائل کی وجہ سے، کار کمپنیاں یکے بعد دیگر اپنی پروڈکشن بند کرنے کا اعلان کر رہی ہیں۔ دیگر کار کمپنیز کی طرح پاک سوزوکی موٹر کمپنی (PSMC) بھی پیداوار میں کمی کا شکار ہے، یہی وجہ ہے کہ انوینٹری کی کمی کے باعث کمپنی کے کار پلانٹ کے بند ہونے کی مدت میں توسیع کی گئی ہے۔ کمپنی کی جانب سے جاری کیے گئے ںوٹیفکیشن کے مطابق 6 نومبر سے 8 نومبر تک پروڈکشن بند رہے گی جبکہ اس سے قبل پروڈکشن 30 اکتوبر سے 3 نومبر تک بند رکھی گئی تھی۔
گزشتہ ماہ پاک سوزوکی کی جانب سے مختلف ماڈلز کی قیمتوں میں کمی کے بارے میں افواہیں گردش کر رہی تھیں۔ تاہم پاک سوزوکی کے شعبہ تعلقات عامہ کے سربراہ شفیق احمد شیخ نے واضح کیا کہ قیمتوں میں ایسی کوئی کمی نہیں کی گئی۔
دوسری جانب ہنڈا نے بھی اپنے پلانٹ کی بندش کی مدت میں توسیع کا اعلان کیا ہے۔ کمپنی کے مطابق 1 نومبر سے 7 نومبر 2023 تک پروڈکشن سے متعلق تمام کارروائیاں معطل رہیں گی۔
پاک سوزوکی کے بعد ہنڈا کی جانب سے بھی پروڈکشن شٹ ڈاؤن کے فیصلے کی وجہ انوینٹری میں کمی ہے جس سے اس کے پروڈکشن آپریشنز بری طرح متاثر ہو رہے ہیں۔ دوسری جانب آٹوموبائل سیکٹر میں درپیش چیلنجز کے باوجود پاک سوزوکی نے اپنے موٹرسائیکل پلانٹ میں دوبارہ پیداوار شروع کرنے کا اعلان کیا ہے۔
چونکہ کار کمپنیز ان پیداواری چیلنجز کے مضمرات سے گزر رہی ہیں، لہذا گاڑیوں کی ڈیلیوریز میں بھی ممکنہ تاخیر کا سامنا کرنا پڑ سکتا ہے۔ قیمتوں میں کمی کی افواہوں نے صارفین کے لیے غیر یقینی صورتحال پیدا کر رکھی ہے جبکہ صارفین پہلے سے ہی پروڈکشن آپریشنز کے دوبارہ شروع ہونے اور قیمتوں کے معاملات کی وضاحت کے منتظر ہیں۔
ان غیر پیداواری دنوں کے بارے میں آپ کے کیا خیالات ہیں اور آپ کے خیال میں ان مسائل کو کیسے حل کیا جا سکتا ہے؟ کمنٹس سیکشن میں ہمیں بتائیں۔
