میڈیا رپورٹس کے مطابق اورنچ لائن ٹرین کے علی ٹاؤن سٹیشن، ٹھوکر نیاز بیگ کے پاس ایک چھوٹا ڈرون طیارہ ٹکرایا ہے۔ رپورٹس میں بتایا گیا ہے کہ واقعے کے فورا بعد معاملے کی چھان بین کیلئے پولیس افسران اور بم سکواڈ جائے وقوعہ پر پہنچ گئے۔
رپورٹس میں مزید کہا گیا کہ بم اسکواڈ نے طیارے کے معائنے کے بعد کہا ہے کہ اس میں کوئی دھماکہ خیز مواد نہیں تھا۔ مزید یہ کہ پولیس کو ریموٹ کنٹرول ڈرون میں نصب ایک کیمرہ ملا ہے۔ سی سی پی او لاہور نے بھی نوٹس لیتے ہوئے ایس پی صدر کو واقعہ کی جانچ پڑتال کی ہدایت کر دی ہے۔
پولیس کا کہنا ہے کہ ڈرون کو قبضے میں لے لیا گیا ہے تاکہ اس بات کی تحقیقات کی جائیں کہ اس کا مقصد کیا تھا اور اس نے کہاں سے اڑان بھری۔ بم ڈسپوزل اور متعلقہ حکام نے واقعے کی مختلف پہلوؤں سے تفتیش شروع کردی ہے۔
