گزشتہ ہفتے ہم نے ایک نئی ہیونڈائی گاڑی کی لانچ بارے سنا تھا۔ کمپنی نے ٹیسٹنگ اور ٹرائلز کیلئے ایم پی وی ہیونڈائی سٹاریا کے 4 یونٹس درآمد کیے ہیں لیکن ہمیں لگتا ہے کہ ہیونڈائی ایک بار پھر ایم پی ویز کی ریس میں اترتے ہوئے کِیا کارنیوال کو ٹکر دینے کیلئے تیار ہے۔ دونوں ایم پی ویز کِیا کارنیوال اور ہیونڈائی سٹاریا کا موازنہ ذیل میں تفصیل کے ساتھ درج ہے۔
پیمائش
آپ نے مقامی سڑکوں پر کِیا کارنیوال کو تو دیکھا ہی ہو گا۔ یہ ایک بڑی گاڑی ہے لیکن ہیونڈائی سٹاریا کارنیوال سے لمبائی میں 14 سنٹی میٹر جبکہ اونچائی میں 22 سنٹی میٹر بڑی ہے۔
سٹائلنگ
سٹائلنگ کی بات کی جائے تو کِیا کارنیوال ویگن، ایس یو وی اور ایم پی وی کا حسین امتزاج ہے لیکن کارنیوال کا ڈیزائن کسی حد تک ایس یو وی سے ملتا جلتا ہے۔
دوسری جانب سٹاریا ایک کمرشل وین کی طرح نظر آتی ہے۔ گاڑی کا فرنٹ پروفائل روبوکوپ کے ہیلمٹ سے مشابہ ہے جو کہ کارنیوال کے کافی مختلف ہے۔
انجن اور ٹرانسمشن
دونوں گاڑیوں میں 3470 سی سی انجن دیا گیا ہے۔ کارنیوال میں دیا گیا انجن 272 ہارس پاور اور 332Nm ٹارک پیدا کرنے کی صلاحیت رکھتا ہے جبکہ سٹاریا میں موجود انجن 268 ہارس پاور اور 331Nm ٹارک پیدا کرتا ہے۔ دونوں انجنز میں 8 سپیڈ آٹومیٹک ٹرانسمشن دی گئی ہے۔
کچھ انٹرنیشنل کار ریویوز کے مطابق کِیا کارنیوال میں دیا گئے انجن کی کارکردگی ہیونڈائی سے بہتر ہے لیکن ہم اس بارے کچھ بھی حتمی طور پر نہیں کہہ سکتے۔ ہم سٹاریا کی ڈرائیونگ کے تجربہ کے بعد ہی دونوں گاڑیوں کے انجن کی کارکردگی پر حتمی بات کریں گے۔
سیٹنگ سپیس
دونوں گاڑیاں 5 ڈور ایم پی ویز ہیں جن میں 8 مسافر آسانی سے بیٹھ سکتے ہیں۔ اسکے علاوہ سٹاریا میں کارنیوال کی نسبت ہیڈ روم زیادہ دیا گیا ہے۔
فیچرز
دونوں گاڑیوں میں بہت سے فیچرز دئیے گئے ہیں۔ دونوں گاڑیوں میں دئیے گئے فیچرز میں سب بڑا فرق یہ ہے کہ ہیونڈائی سٹاریا میں آل ویل ڈرائیو (AWD) کا آپشن دیا گیا ہے جبکہ کارنیوال میں صرف فرنٹ ویل ڈرائیو کا آپشن دیا گیا ہے۔
دونوں گاڑیوں میں 18 انچ الائے ویلز، لیدر سیٹس، LED ہیڈلائٹس، DRLs اور فوگ لائٹس جیسے فیچرز دئیے گئے ہیں۔ اس کے علاوہ کارنیوال میں ٹچ سکرینز سٹاریا کہ نسبت زیادہ بڑی ہیں۔ دونوں گاڑیوں میں ایپل کار پلے، اینڈرائیڈ آٹو اور ایک ہی وقت میں دو سمارٹ فونز پئیر کرنے کا آپشن بھی موجود ہے۔
سیفٹی
کِیا کارنیوال کو آسٹریلوی نیو کار اسسمنٹ پروگرام (ANCAP) میں فائیو اسٹار سیفٹی ریٹنگ حاصل ہے جب کہ ہیونڈائی سٹاریا نے ابھی تک کریش ٹیسٹ سے گزرنا ہے۔
دونوں گاڑیوں میں ایڈاپٹیو کروز کنٹرول، لین اسسٹ، لیڈ وہیکل ڈیپارٹ نوٹیفکیشن، آٹو ہائی بیم، بلائنڈ اسپاٹ، رئیر کراس ٹریفک مانیٹرنگ، فٹیگ الرٹ اور سپیڈ لِمٹ نوٹیفیکیشن جیسے سیفٹی فیچرز پائے جاتے ہیں۔ دونوں گاڑیوں میں کرٹین ایئر بیگز شامل ہیں جو مکمل طور پر تیسری قطار تک پھیلے ہوئے ہیں۔
پارکنگ کی بات جائے تو دونوں گاڑیوں میں پارکنگ کیلئے فرنٹ اور رئیر سینسرز اور کیمرے بھی دئیے گئے ہیں۔ یہاں سٹاریا میں 360 ڈگری مانیٹر بھی دیا گیا ہے۔
قیمت
ساؤتھ کورین مارکیٹ میں کِیا کارنیوال کی قیمت 27 ہزار ڈالر سے 35 ہزار ڈالر تک ہے جبکہ سٹاریا کی قیمت 25854 ڈالر ہے۔ یعنی ہم کہہ سکتے ہیں کہ کارنیوال اور سٹاریا بالکل سپورٹیج اور ٹوسان کی طرح ہیں۔
