لرنرز ڈرائیونگ لائسنس اب لاہور کے تمام تھانوں میں دستیاب ہوں گے

لرنرز لائسنس کے حصول کے عمل کو آسان اور سادہ بنانے کیلئے لاہور ٹریفک پولیس نے ایک اہم اقدام متعارف کرایا ہے، جس کا اطلاق 6 دسمبر 2023 سے ہوگا۔

لرنرز لائسنس اب لاہور بھر کے پولیس سٹیشنز کے فرنٹ ڈیسک پر آسانی سے دستیاب ہوں گے، جس کے بعد اب شہریوں کیلئے لائسنس کا حصول آسان ہو جائے گا۔

پنجاب کے انسپکٹر جنرل کی قیادت میں شروع کیے جانے والے اس اقدام کا عوام نے خیرمقدم کیا ہے جو لائسنسنگ کے عمل کو ہموار کرنے اور اسے مزید قابل رسائی بنانے کیلئے اٹھایا گیا ہے۔

آخری ڈیڈلائن

صوبائی حکومت نے ڈرائیونگ لائسنس حاصل کرنے کے لیے 31 دسمبر 2023 تک کا وقت دیا ہے۔ یعنی کہ 31 دسمبر 2023 آخری ڈیڈلائن ہے۔ اس کےعلاوہ حکومت نے 1 جنوری سے لائسنس کی فیس میں اضافے کا بھی اعلان کر رکھا ہے۔

یکم جنوری تک عوام کو مہلت دی گئی ہے کہ وہ اس موقع سے فائدہ اٹھائیں اور فیس میں اضافے کے لاگو ہونے سے پہلے اپنا لائسنس بنوا لیں۔

لائسنس فیس میں اضافہ

لاہور ٹریفک پولیس کی جانب سے حال ہی میں انکشاف کیا گیا ہے کہ صوبائی حکومت نے کاروں اور موٹر سائیکلوں دونوں کے لیے ڈرائیونگ لائسنس کی فیس میں خاطر خواہ اضافے کی منظوری دے دی ہے۔

ٹوئٹر ایکس پر ایک سرکاری اعلان کے مطابق نگران پنجاب حکومت نے فیس میں حیران کن طور پر 1566 فیصد اضافے کا فیصلہ کیا ہے، جو کہ اب 60 روپے سے بڑھا کر 1000 روپے کر دی گئی ہے۔

اس متنازعہ فیصلے نے سوشل میڈیا پر تنقید کا ایک طوفان برپا کر دیا ہے۔ بہت سے شہری اپنے عدم اطمینان کا اظہار کرتے ہوئے کہہ رہے ہیں کہ یہ فیصلہ عوام پر اضافی بوجھ ہے۔

دوسری جانب موٹروے پولیس نے بھی ٹریفک قوانین کی خلاف ورزی سے متعلق جرمانوں میں بڑا اضافہ کر دیا ہے۔