اردو زبان کا مشہور محاورہ ہے کہ صبر کا پھل میٹھا ہوتا ہے لیکن ان لوگوں کا کیا ہوگا جو ایک لمبے عرصے سے MG3 کا انتظار کر رہے ہیں؟ ایسا لگتا ہے کہ جاوید آفریدی ایم جی تھری کے بارے میں ٹویٹ کر کے صرف لطف اندوز ہوتے ہیں کیوںکہ یہ ایک ایسی کار ہے جس کا ہم انتظار کر رہے ہیں۔ اگر ایم جی پاکستان اس کار کو لانچ کرنا چاہتا ہے تو کرے لیکن اس طرح بار بار ٹویٹس کر کے صارفین کے جذبات سے کھیلنا کوئی عام بات نہیں ہے۔
ایم جی تھری کے شائقین کے لیے ایک افسوسناک خبر ہے کیونکہ رپورٹس کے مطابق یہ سب کومپیکٹ ہیچ بیک عالمی سطح پر بند ہو رہی ہے۔ کافی افسوسناک بات ہے بہت سی ٹویٹس کے بعد بھی یہ کار پاکستان میں لانچ نہیں کی گئی۔ ہمیں اندازہ ہے کہ پاکستان میں ایم جی تھری کے کتنے پرستار اس وقت مایوسی کا شکار ہوں گے۔
حقیقت یہ ہے کہ ایم جی پاکستان نے کبھی بھی باضابطہ طور پر ایم جی 3 کے اجراء کا اعلان نہیں کیا، اور جاوید آفریدی کی طرف سے مسلسل ٹویٹس سامنے آنا شاید صرف ایک مارکیٹنگ کا حربہ تھا اور اب ہم شاید کبھی بھی اُن پریمیم خصوصیات کا تجربہ نہ کر پائیں جو اس کار میں پیش کی گئی تھیں۔
آفریدی نے ہمیں بتایا کہ ایم جی پاکستان MG3 20 لاکھ روپے سے کم قیمت میں یہ گاڑی لانچ کرے گا لیکن ملک اور آٹو انڈسٹری کی موجودہ صورتحال کو دیکھتے ہوئے مجھے نہیں لگتا کہ یہ ممکن ہے۔ یہ ایک معجزہ ہونے کا انتظار کرنے جیسا ہے۔
2021 میں ایم جی پاکستان نے اپنی مستقبل کی لائن اپ کے طور پر کچھ کاریں دکھائی تھیں، لیکن حیران کن طور پر ان میں شامل نہیں تھی۔ درحقیقت، ایم جی نے کبھی بھی باضابطہ طور پر یہ تسلیم نہیں کیا کہ وہ اس ہیچ بیک کو پاکستان میں لانچ کرنے کا منصوبہ بنا رہے ہیں۔ گو کہ جاوید آفریدی ایم جی پاکستان کے پوسٹر بوائے ہیں، ایسا لگتا ہے کہ ان کی اور کمپنی کی سمت بالکل مختلف ہے۔
