ٹویوٹا انڈس موٹر کمپنی (IMC) کے بعد اب پاکستان سوزوکی موٹر کمپنی لمیٹڈ نے بھی کراچی میں اپنے پلانٹ پر گاڑیوں کی پروڈکشن کو روک دیا ہے جس کی وجہ CKD کٹس کی کلیئرنس میں طویل تاخیر ہے۔
اس غیر متوقع بندش نے آٹوموٹو انڈسٹری میں پریشانی کی فضا پیدا کر دی ہے جس کے بعد پاکستان میں کار مینوفیکچررز کو درپیش چیلنجز بڑھ گئے ہیں۔
سی کے ڈی کٹس کی منظوری میں تاخیر نے پاکستان سوزوکی کو بھاری مالی نقصانات پہنچائے ہیں، جن میں بھاری ڈٹینشن اور ڈیمرج چارجز شامل ہیں۔ اس کے علاوہ، پیداوار کی معطلی اور سیلز میں کمی کی وجہ سے حکومت کی ٹیکسوں اور ڈیوٹیوں سے حاصل ہونے والی آمدنی بھی متاثر ہوئی ہے۔
ٹویوٹا انڈس کی پیداوار بھی بند
اس سے قبل ٹویوٹا انڈس موٹرز نے پچھلے 30 دنوں میں یکے بعد دیگرے دو بار پیداوار کی بندش کا اعلان کیا ہے۔ حالیہ اپ ڈیٹ میں، کمپنی نے 6 اگست 2024 سے 8 اگست 2024 (دونوں دن شامل ہیں) تک دوسری پیداوار میں کمی کا اعلان کیا ہے۔ اس سے پہلے، کمپنی نے 5 جولائی 2024 سے 22 جولائی 2024 تک اپنا پیداواری پلانٹ بند کیا تھا۔
پاکستان اسٹاک ایکسچینج (PSX) کو بھیجے گئے ایک بیان میں کمپنی نے بتایا کہ جاری سپلائی چین کے مسائل کی وجہ سے پرزوں اور اجزاء کی شدید قلت پیدا ہو گئی ہے۔ جس کی وجہ سے خام مال کے ذخیرے میں نمایاں کمی ہوئی ہے اور گاڑیوں کی پیداوار میں رکاوٹ آ رہی ہے۔
انڈسٹری کی ایسوسی ایشنز بشمول PAMA اور PAAPAMنے حکومت کی آٹو پالیسی پر عمل درآمد اور ایسی رکاوٹوں کے سرمایہ کاروں کے اعتماد پر منفی اثرات کے بارے میں خدشات کا اظہار کیا ہے۔
پاکستان کی آٹوموٹیو انڈسٹری پہلے ہی متعدد چیلنجز کا سامنا کر رہی ہے، جن میں ٹیکس کی بلند ترین سطح، سود کی شرحیں وغیرہ شامل ہیں۔ ان عوامل نے بہت سے مقامی پرزہ جات بنانے والی کمپنیز کو مزدوروں کو فارغ کرنے اور پیداوار کم کرنے پر مجبور کیا ہے۔ موجودہ بحران نے ان مسائل کو مزید بڑھا دیا ہے۔ پاک سوزوکی کی بندش سے 140-145 کے قریب وینڈرز متاثر ہوئے ہیں۔
ماہرین نے حکومت کی مداخلت کی فوری ضرورت پر زور دیا ہے تاکہ بنیادی مسائل کو حل کیا جا سکے۔ انھوں نے تجویز دی ہے کہ صنعتی ماہرین کو ان مسائل کا حل تلاش کرنے کے ساتھ ساتھ کسی بھی قسم کی بے ضابطگیوں کو فوری طور پر درست کیا جانا چاہیے۔
آپ پاک سوزوکی کے حالیہ پیداوار کی معطلی کے اعلان کے بارے میں کیا سوچتے ہیں؟ کمنٹس سیکشن میں اپنی رائے دیں۔
