پاک سوزوکی کی تمام گاڑیوں پر نئی پرائس آفر

ایک طرف جبکہ ملک کے معاشی حالات خراب ہیں تو دوسری جانب پاکستان کی آٹو انڈسٹری گرتی ہوئی سیلز، پیداوار اور منافع کے کم ہوتے حجم سے متاثر ہو رہی ہے۔

معاملے کی سنگینی کو دیکھتے ہوئے، مقامی کار اسمبلرز خریداروں کی دلچسپی کو بحال کرنے کے لیے پرکشش آفرز لانے کی بھرپور کوشش کر رہے ہیں۔ کار کمپنیز اپنے مختلف ماڈلز کے لیے مختلف آفرز متعارف کروا رہی ہیں۔

پرائس لاک آفر

دلچسپ بات یہ ہے کہ پاکستان سوزوکی موٹر کمپنی نے یکے بعد دیگرے آفرز پیش کرنے کے سلسلے میں مارکیٹ کے تمام کھلاڑیوں کو پیچھے چھوڑ دیا ہے۔ ایک حالیہ سوشل میڈیا پوسٹ میں کمپنی نے ایک کے علاوہ اپنے تمام ماڈلز کے لیے ‘پرائس لاک’ پیشکش متعارف کرائی ہے۔

پوسٹ کے مطابق خریدار کلٹس وی ایکس آر پر اس پیشکش سے فائدہ نہیں اٹھا سکتے۔ یہ پرائس لاک آفر اگست کے اختتام تک کارآمد ہے اور کوئی بھی سوزوکی کے کسی بھی ماڈل کی بکنگ کے بعد اس آفر کو حاصل کر سکتا ہے۔ حیرت کی بات یہ ہے کہ گزشتہ چند دنوں میں یہ کمپنی کی تیسری پیشکش ہے۔ اس سے قبل پاک سوزوکی نے ویگن آر اور سوئفٹ پر دو مختلف آفرز کا اعلان کیا تھا۔

ویگن آر اور سوئفٹ پر آفرز

سوئفٹ

اگر آپ اپنی سواری کو بدل کر کوئی اچھی آپشن پر غور کر رہے ہیں تو شاید یہ بہترین وقت ہے۔ سوزوکی کمپنی ایک شاندار ڈیل پیش کر رہی ہے۔ جس کے تحت آپ اپنی پرانی کار کو تبدیل کرنے اور ستائلش سوزوکی سوئفٹ خریدنے پر مجموعی طور پر 150000 روپے ایکسچینج بونس کے طور پر وصول کر سکتے ہیں۔ یہ پیشکش اگست کے مہینے میں خصوصی طور پر دستیاب ہے، لہذا اس ناقابل یقین ڈیل سے فائدہ اٹھانے کا موقع ضائع نہ کریں۔

ویگن آر پر ایکسچینج آفر

اس پیشکش کے تحت اگر صارفین اپنی پرانی کار کو بالکل نئی ویگن آر سے تبدیل کرتے ہیں تو ان کو 100000 روپے بونس کے طور پر ملیں گے۔ تاہم، اعلان میں ایکسچینج کے لیے مخصوص کار ماڈلز کی وضاحت نہیں کی گئی ہے۔