میڈیا رپورٹس کے مطابق نگران حکومت پیٹرولیم مصنوعات کی قیمتوں میں آج رات اضافہ کر سکتی ہے۔ جس کی وجہ عالمی منڈی میں تیل کی قیمتوں میں اضافہ ہے۔
رپورٹس کے مطابق پیٹرول کی قیمت میں تقریباً 2 فیصد یعنی 5 روپے فی لیٹر اضافہ ہو سکتا ہے۔ جس کے بعد پیٹرول کی قیمت 275.62روپے سے بڑھ کر 280.33 روپے فی لیٹر ہوجائے گی، جبکہ ہائی سپیڈ ڈیزل کی قیمت میں 2 روپے اضافی کیا جائے گا جس کے بعد ہائی سپیڈ ڈیزل کی قیمت بڑھ کر 277.62 روپے فی لیٹر ہو جائے گی۔
اس کے علاوہ لائٹ ڈیزل آئل کی قیمت 80 پیسے فی لیٹر اور مٹی کے تیل کی قیمت 70 پیسے فی لیٹر بڑھ سکتی ہے۔
پاکستان میں ہر 15 دن بعد عالمی منڈی میں تیل کی قیمتوں کے رجحان اور ڈالر کے مقابلے روپے کے شرح تبادلے کے مطابق پیٹرولیم مصنوعات کی قیمتوں میں ترمیم کی جاتی ہے۔
حکومت کی جانب سے آج رات جاری کردہ نئی قیمتیں 1 مارچ سے لاگو ہوں گی۔
حکومت اس سے قبل دو بار میں عالمی منڈی میں تیل کی قیمتوں میں اضافے کے بعد پیٹرول اور ڈیزل کی قیمتوں میں بالترتیب 8.37 روپے اور 2.73 روپے فی لیٹر کا اضافہ کر چکی ہے۔
2024ء کے ابتدائی دو مہینوں میں، مشرق وسطیٰ میں سیاسی کشیدگی اور سپلائی میں کمی کے خدشات نے خام تیل کی قیمت تقریباً 10 فیصد تک بڑھا دی ہے۔ اس خطے میں سپلائی کی مشکلات بھی ایک تشویش کا باعث ہیں۔
