پروٹون X70 اب پاکستان میں بھی تیار کی جائے گی

ملائیشین کار برانڈ پروٹون پاکستان دن بدن بہتری کی جانب گامزن ہے۔ کمپنی نے حال ہی میں کراچی میں اپنے پہلے وہیکل اسمبلی پلانٹ کا افتتاح کیا ہے اور پروٹون ساگا کے پہلے مقامی طور پر تیار شدہ یونٹ کو نمائش کیلئے پیش کیا۔ جس کے بعد اب صارفین کی نظریں پروٹون X70 پر ہیں اور جاننا چاہتے ہیں اس گاڑی کی مقامی طور پر تیاری کب شروع کی جائے گی۔ ذرائع کے مطابق رواں سال کے اواخر میں پروٹون X70 کی تیاری شروع کرد جائے گی۔

پروٹون X70 کے ملائیشین ساختہ CBU یونٹس

ملائیشین میڈیا کے مطابق 154 یونٹس پر مشتمل پروٹون   X70سی بی یو یونٹس کی آخری کھیپ ملائیشیا سے پاکستان بھیج دی گئی ہے۔ جس کے بعد امید ہے کہ X70 کے بُک کیے گئے CBU یونٹس کی ڈلیوری ایک ماہ یا اس سے زائد وقت کے اندر شروع کر دی جائے گی۔

پروٹون X70 کے مقامی طور پر تیار کردہ CKD یونٹس

اسی میڈیا آؤٹ لیٹ نے یہ خبر بھی شیئر کی کہ پروٹون پاکستان دسمبر میں X70  کی CKD کٹس درآمد کرنا شروع کردے گا۔ اب جبکہ پروٹون کی گرین فیلڈ فیکٹری کراچی میں چل رہی ہے، امید ہے کہ کٹس کے آتے ہی کمپنی گاڑی کی مقامی اسمبلی شروع کر دے گی۔

پروٹون پاکستان کا اصل منصوبہ 2020 کی پہلی سہ ماہی میں اپنی گاڑیوں کو مقامی طور پر تیارکرنا تھا لیکن کورونا کے باعث یہ ممکن نہ ہو سکا۔ ملائیشیا میں مہینوں طویل لاک ڈاؤن کی وجہ سے پاکستان میں سی بی یو یونٹس اور سی کے ڈی کٹس کی درآمد میں تاخیر ہوئی۔ ملائیشیا میں کورونا کی صورتحال بالآخر بہتر ہونے کے بعد اب نہ صرف ترسیل کا عمل اب دوبارہ شروع ہو گیا بلکہ پاکستان میں پروٹون کی مقامی سطح پر تیاری کا آغاز بھی ہو گیا ہے۔

پروٹون کے سی ای او روسلان کا کہنا تھا کہ کورونا کی وجہ سے پاکستان میں ہمارے پروجیکٹ کی ٹائم لائن کو بری طرح متاثر کرنے کے باوجود ملک میں  پروٹون ساگا اور X70 دونوں کی مانگ کافی زیادہ ہے۔ ان کا کہنا تھا کہ الحاج کو ساگا کے 2500 جبکہ X70 کے 2000 سے زائد آرڈرز موصول ہوئے ہیں۔ اس لیے ہم صارفین کا ہماری مصنوعات پر یقین رکھنے اور گاڑیوں کی ڈلیوریز میں تاخیر پر صبر کا مظاہرہ کرنے پر شکریہ ادا کرتے ہیں۔

X70 کے سی بی یو یونٹس کی آخری کھیپ اور دسمبر میں CKD کٹس کی درآمد دونوں ہی پاکستان میں X70 کے خریداروں اور چاہنے والوں کے لیے بڑی خوشخبری ہیں۔