بالآخر ہونڈا اٹلس نے نئی ہونڈا سٹی کی پری بکنگ کا باقاعدہ آغاز کر دیا ہے۔ ایک پوسٹ میں کمپنی نے صارفین سے بکنگ اور مزید تفصیلات کے لیے قریبی ترین ہونڈا 3S ڈیلرشپ سے رابطہ کرنے کا کہا ہے۔
ہونڈا اٹلس کا کہنا ہے کہ “سٹی اسٹینڈرڈ ویرینٹ کی جزوی بکنگ رقم 10 لاکھ روپے اور ایسپائر ویرینٹس کی 12 لاکھ روپے ہے۔”
کیا آپ کو نئی ہونڈا سٹی بُک کروانی چاہیے؟
جیسا کہ ہم پہلے ہی اپنے قارئین پر زور دے چکے ہیں کہ بغیر دیکھے کوئی گاڑی بُک نہ کروائیں۔ ہونڈا اٹلس نے ہونڈا BR-V اور سوِک-X کی لانچ سے پہلے بھی یہی کیا تھا، یوں اربوں روپے پیشگی جمع کر لیے، وہ بھی بغیر تفصیلات، فیچرز اور حتمی قیمت ظاہر کیے۔ تو آخر بکنگ اور “مزید تفصیلات” باضابطہ طور پر ظاہر کیوں نہیں کی گئیں اور قیمت عوام کے سامنے کیوں نہیں لائی گئی؟
اس لیے ایک مرتبہ پھر یہیں کہیں گے کہ اپنی حق حلال کی محنت سے حاصل کی گئی کمائی “پری بکنگ” کے نام پر کسی کے ہاتھ پر نہ رکھیں۔ آسان الفاظ میں کہیں تو اگر گاڑی ریلیز ہو بھی جائے تو اسے تب تک بُک نہ کروائیں جب تک آپ اسے مجاز ڈیلرشپ پر دیکھ نہ لیں اور بذاتِ خود اس کا تجربہ نہ اٹھا لیں۔
بدقسمتی سے کوئی سرکاری ادارہ اور ریگولیٹر ایسا نہیں ہے جو ان معاملات کو دیکھ سکے اور افسوس کی بات یہ ہے کہ ہمارے لوگ خود اس مسئلے کا سبب ہیں۔
ڈیلرز نے ہونڈا سے پہلے بکنگ کا اعلان کر دیا:
اس خبر کا ایک پہلو یہ ہے کہ کار ڈیلرز نے ہونڈا سے بھی پہلے بکنگ کا اعلان کر دیا۔ ہمارے ذرائع کے مطابق مختلف ڈیلرز نے کمپنی کے اعلان سے بھی پہلے پری بکنگز لینا شروع کر دی تھیں۔ اور یہ مینوفیکچرر کے حق میں اچھی بات نہیں۔
ہونڈا اٹلس سے مطالبہ:
ہم ہونڈا اٹلس سے مطالبہ کرتے ہیں کہ تمام تفصیلات (قیمت، ویرینٹس، ڈلیوری کا وقت، بشمول ڈیلرز پر گاڑیوں کا ڈسپلے+ ٹیسٹ ڈرائیو) کسی بھی بکنگ سے پہلے سامنے لائے۔ معاملہ واضح ہونا چاہیے اور حقیقی صارفین کو پہلے فائدہ اٹھانے کا موقع ملنا چاہیے۔
مختصر یہ کہ گاڑی مارکیٹ میں وجود ہی نہیں رکھتی، لیکن اس کی بکنگ چل رہی ہے۔ اور ہم سمجھتے ہیں کہ اس رجحان کی حوصلہ افزائی نہیں کرنی چاہیے کیونکہ اس سے ‘آن منی’ کو فروغ ملے گا۔ کمپنی کو پہلے گاڑي لانچ کرنی چاہیے، عوام کے سامنے لانی چاہیے، اس کی تفصیلات اور فیچرز پیش کرنی چاہئیں اور پھر اس کی بکنگ کا آغاز ہونا چاہیے۔
