ملک کے سب سے بڑے کار ساز اداروں میں سے ایک کی حیثیت سے انڈس موٹرز کمپنی المعروف ٹویوٹا پاکستان نے ہمیشہ ہی گاڑیوں کے شوقین افراد کو نت نئی گاڑیوں سے بھرپور دلچسپی کا سامان پیش کیا ہے۔ اب وہ ایک مرتبہ پھر اپنی روایت کو دہراتے ہوئے ڈیزل انجن کی حامل ٹویوٹا فورچیونر متعارف کروانے جا رہا ہے۔ ٹویوٹا فورچیونر کا ڈیزل ماڈل کوئی نئی تخلیق نہیں بلکہ یہ بھارت، کولمبیا اور فلپائن میں پہلے ہی پیش کیا جاچکا ہے۔ البتہ اس بات کی تصدیق ہونا باقی ہے کہ فورچیونر میں شامل کیا جانے والا انجن کس قابلیت کا ہوگا۔
ڈاؤن لوڈ کریں: پاک ویلز موبائل ایپ
قوی امکان ہے کہ ٹویوٹا پاکستان ہائیلکس ریوُو آزمودہ 3000cc 1KD-FTV ہی فورچیونر میں بھی متعارف کروائے۔ البتہ یہ بھی ممکن ہے کہ فورچیونر کو ٹویوٹا کے نسبتاً نئے 2800cc انجن (1GD-FTV) سے آراستہ کیا جائے۔ یاد رہے کہ یہ انجن سال 2015ء ہی میں سامنے آیا تھا۔ یہاں یہ بات بھی قابل ذکر ہے کہ اول الذکر 3000cc انجن کے مقابلے میں موخرالذکر 2800cc انجن کا کمپریشن ریشو کم ہے۔ GD سیریز انجن کا کمپریشن ریشو 15.6 ہے جبکہ KD کا کمرپیشن ریشو 17.9 ہے۔ اس کے علاوہ GD کی ہارس پاور 3400 آر پی ایم پر 175 بتائی جاتی ہے جبکہ KD بھی یکساں آر پی ایم پر 172 فراہم کرسکتا ہے۔ ان دونوں انجن میں سب سے بڑا اور نمایاں فرق ٹارک کا ہے۔ GD انجن 1400 پر 450 نیوٹن میٹر جبکہ KD انجن 1400 پر 352 نیوٹن میٹر ٹارک فراہم کرنے کی اہلیت رکھتا ہے۔
ہمارے ذرائع کے مطابق ڈیزل انجن والی فورچیونر کو آئندہ چند ماہ میں فروخت کے لیے پیش کردیا جائے گا۔ فی الوقت پاکستان میں فورچیونر کو 2TR-FE پیٹرول انجن کے ساتھ پیش کیا جارہا ہے۔ ادارے کی جانب سے پیٹرول انجن والا ماڈل سال 2012 میں متعارف کروایا گیا تھا۔
موجودہ صورتحال کو دیکھتے ہوئے یہ کہا جاسکتا ہے کہ ڈیزل فورچیونر کی پیشکش کے پیچھے گاڑیوں کے شعبے میں ہونے والی تازہ پیش رفت ہے۔ بدتریج بہتر ہوتی صورتحال کے باعث نہ صرف گاڑیوں کی مانگ میں اضافہ ہوا ہے بلکہ مقامی کار ساز اداروں کو بھی 4×4 ڈیزل گاڑیوں کا خلا پر کرنے کا بہترین موقع میسر آیا ہے۔ مزید برآں پاک چین اقتصادی راہداری بھی زیر تعمیر ہے جس کی تکمیل کے بعد بذریعہ سڑک آمد و رفت او سامان کے نقل و حمل میں اضافہ بھی انجن بڑی اور طاقتور انجن والی گاڑیوں کی طلب میں اضافے کا باعث بنے گا۔
پاکستان میں نئی گاڑیوں کی منڈی میں انڈس موٹرز کا حصہ تقریباً 28 فیصد ہے۔ اب ڈیزل گاڑی کی شمولیت سے مقامی مارکیٹ میں ٹویوٹا پاکستان کی گرفت مضبوط سے مضبوط تر ہوجائے گی۔ دوسری طرف گاڑیوں کے شوقین پاکستانی بھی ڈیزل انجن چلانے کا لطف اٹھا سکیں گے۔
کیا آپ بھی ڈیزل گاڑیوں کی پیشکش کو مثبت سمجھتے ہیں؟ ہمیں اپنی رائے سے ضرور آگاہ کیجیے۔
