ملائیشیائی آٹومیکر پروٹون پاکستان میں اپنا پہلا جنوبی ایشیائی مینوفیکچرنگ پلانٹ بنائے گا
ملائیشیائی آٹومیکر پروٹون پاکستان میں جلد ہی اپنا مینوفیکچرنگ پلانٹ بنانے کے لیے تیارہے۔
میڈیا سے بات کرتے ہوئے پاکستان کے لیے ملائیشیائی ہائی کمشنر عزت مآب محمد ابراہیم نے کہا کہ آٹومیکر سمجھتا ہے کہ پاکستان میں ان کی گاڑیوں کے لیے زبردست امکانات موجود ہیں جس کی وجہ سے وہ الحاج آٹوموبائلز کے ساتھ مل کر کراچی میں اپنا پلانٹ قائم کرے گا۔
واضح رہے کہ الحاج آٹوموبائلز اور پروٹون کے درمیان دستخط کی تقریب بدھ 29 اگست 2018ء کو کوالالمپور میں پروٹون موٹرز کے صدر دفتر میں ہوئی تھی۔ معاہدے کے مطابق الحاج گروپ ملک میں ملائیشیائی آٹومیکر کی سیڈانز، کراس اوورز، SUVs، الیکٹرک گاڑیاں اور ہیچ بیکس کو فروخت اور اسمبل کرے گا۔
یہ شراکت داری پاکستان میں تقریباً 200 سے 300 ملین ڈالرز کی سرمایہ کاری لائے گی۔ کمپنی نے مبینہ طور پر پروٹون گاڑیوں کے لیے مینوفیکچرنگ پلانٹ بنانے کی خاطر کراچی میں زمین خرید لی ہے۔
پروٹون ساگا اور ایکسورا کو ملک میں تجرباتی مراحل کے دوران سڑکوں پر چلتے دیکھا گیا ہے اور معلوم ہوا کہ آٹومیکر ابتدائی مرحلے میں پاکستان میں یہ دو گاڑیاں لا سکتا ہے، البتہ اس ضمن میں جوائنٹ وینچر کی جانب سے کوئی تصدیق نہیں کی گئی۔
پروٹون ایکسورا ایک کومپیکٹ ملٹی پرپز وہیکل (MPV) ہے جو ملائیشیا، انڈونیشیا، تھائی لینڈ، سنگاپور، برونائی اور آسٹریلیا میں دستیاب ہے۔ اس نے 15 اپریل 2009ء کو آغاز لیا تھا اور تب سے اب تک متعدد بار بہتر بنائی گئی ہے۔ یہ MPV فرنٹ ویل ڈرائیو ہے اور ہونڈا BR-V کی طرح اس میں 7 نشستیں ہیں۔ یہ دو مختلف انجنوں اور تین مختلف ٹرانسمیشن آپشنز کے ساتھ آتی ہے۔ جہاں تک انجن آپشنز کا تعلق ہے یہ 1.6L CamPro CPS DOHC I4 انجن اور 1.6 L CamPro CFE DOHC I4 Turbo کے ساتھ آتی ہے۔
مزید برآں، یہ 5-اسپیڈ مینوئل، 4-اسپیڈ آٹو اور 6-اسپیڈ CVT آٹومیٹک کے ساتھ آتی ہے۔ مقامی مارکیٹ میں اس کی براہِ راست مقابل ہونڈا BR-V اور ٹویوٹا رَش ہیں۔
دوسری جانب پروٹون ساگا ایک سب کومپیکٹ سیڈان ہے جو مختلف ٹرانسمیشن اور انجن آپشنز کے ساتھ آتی ہے۔
دیکھتے ہیں کہ کون سی گاڑی پاکستان آتی ہے۔ تب تک تازہ ترین خبروں کے لیے PakWheels.com پر آتے رہیے۔
