پاک سوزوکی اپنے صارفین کو بہلانے کا کوئی موقع ہاتھ سے جانے نہیں دیتا۔ اس مرتبہ بھی کمپنی نے مہران VX کا لمیٹڈ ایڈیشن جاری کرکے ایک انوکھا کام کیا ہے۔
کمپنی نے پاکستان بھر میں اپنی ڈیلرشپس کو ایک سرکلر بھیجا ہے جس میں اعلان کیا گیا ہے کہ وہ 8,25,000 روپے کی خوردہ قیمت پر AC فیچر کے ساتھ مہران VX لمیٹڈ ایڈیشن متعارف کرواتے ہوئے خوشی محسوس کر رہے ہیں۔ یہ گاڑی صرف سفید، سلور اور سرمئی رنگوں میں دستیاب ہے۔
سرکلر بتاتا ہے کہ اس ویرینٹ کا اسٹاک محدود ہے۔
واضح رہے کہ کمپنی کے پچھلے سرکلر کے مطابق مہران VXR کی پیداوار رواں سال اپریل میں بند کردی جائے گی۔ یاد رہے کہ جولائی 2018ء میں کمپنی نے نومبر 2018ء سے مہران VX ویرینٹ کا سلسلہ بند کرنے کے حوالے سے ایک نوٹیفکیشن جاری کیا تھا۔ ایسا لگتا ہے کہ کمپنی اس کار کو اب حتمی طور پر خیرباد کہہ دے گی کہ جس کی پیداوار 1988ء سے جاری تھی۔
مہران VX کا لمیٹڈ ایڈیشن متعارف کروانے کے علاوہ کمپنی آئندہ مہینوں میں آلٹو 660cc متعارف کروانے کے لیے بھی تیار ہے۔ آلٹو 2019ء کے تین ویرینٹس ہوں گے، جن میں ٹاپ آف دی لائن ماڈل آٹو گیئربکس کا حامل ہوگا، جبکہ مینوئل آلٹو بیس ماڈل اور ایک ہائیر اسپیک ماڈل میں دستیاب ہوگی۔ ایک اندازے کے مطابق اس گاڑی کی قیمت 8 سے 10 لاکھ روپے کے درمیان ہوگی۔
اپنے تبصرے ذیل میں پیش کیجیے۔
