کاواساکی H2 سُپر بائیک پر کراچی کی سیر!

پاکستان میں گاڑیوں ہی کے نہیں موٹر سائیکلوں کے شوقین افراد کی بھی بڑی تعداد موجود ہے۔ پھر بات ہو سب سے بڑے شہر کراچی کی تو یہاں کی سڑکوں پر اکثر و بیشتر موٹر سائیکل پر کرتب دکھاتے نوجوانوں کے ٹولے نظر آتے ہی رہتے ہیں۔ موٹر سائیکلوں کا شوق کسی خاص طبقے تک محدود نہیں بلکہ یہاں ایسے شوقین افراد بھی موجود ہیں کہ جو بیرون ملک سے مہنگی سُپر بائیک درآمد کر کے اپنے جذبات کی تسکین کرتے ہیں۔ اتوار کی شام کراچی کی بڑی شاہراہوں پر گاڑیوں اور موٹر سائیکل کے شوقین افراد کا راج نظر آتا ہے۔ مجھے اب بھی وہ دن یاد ہے کہ جب صرف میری خواہش پر ایک نوجوان نے یاماہا V – میکس کی زبردست گھن گرج سنائی تھی۔

مہنگی سُپر بائیکس کا ذکر آئے تو سب سے پہلا نام مظہر شاہ کا ذہن میں آتا ہے۔ مظہر شاہ موٹر سائیکل کا شوق رکھنے والوں میں کافی شہرت رکھتے ہیں۔ حال ہی میں انہوں نے سُپر بائیک کاواساکی H2 منگوائی ہے۔ وہ اپنی سُپر بائیک پر گلشن اقبال سے لے کر ساحل سمندر تک پورے کراچی کا سفر بھی کرچکے ہیں۔ سب سے دلچسپ بات یہ ہے کہ اپنے مداحوں کی خواہش پر مظہر شاہ نے GoPro کے ذریعے نہ صرف مکمل سفر کو ریکارڈ کیا بلکہ فیس بک پر شایع کر کے تمام ہی شائقین کو لطف اندوز ہونے کا موقع بھی فراہم کیا۔ میرا مشورہ ہے کہ نیچے موجود ویڈیو چلانے سے پہلے اطمینان سے اپنی نشست سنبھالیں اور پھر شہر قائد میں اتوار کی خوبصورت شام کالطف اٹھائیں۔