یونائیٹڈ موٹرز(پرائیوٹ) لمیٹڈ نے اپنی 800cc ہیچ بیک براوو میں نئے اور بہتر فیچرز متعارف کروا دیے ہیں اور ساتھ ہی 15 اکتوبر 2019ء سے اس کی قیمت میں 60,000 روپے کا اضافہ بھی کردیا ہے۔
تفصیلات کے مطابق یونائیٹڈ موٹرز اپنے صارفین کے لیے نئے فیچرز لایا ہے، لیکن یہ فیچرز قیمت میں اضافے کے ساتھ آئے ہیں۔ یونائیٹڈ براوو 800cc کی گاڑیوں میں ایک انقلابی ہیچ بیک تھی جس کی لانچ کا بہت شدت سے انتظار کیا گیا تھا۔ یہ تین دہائیوں تک بننے والی سوزوکی کی مشہورِ زمانہ مہران کے بعد اس کیٹیگری میں پہلی کار تھی۔ یونائیٹڈ موٹرز نے ملک بھر میں اپنے تمام مجاز ڈیلرز کو ایک نوٹیفکیشن جاری کیا ہے، جس میں پاکستان میں کمپنی کی پہلی کار میں نئے اور بہتر فیچرز کی رونمائی کی گئی ہے۔ یونائیٹڈ براوو کے نئے فیچرز میں شامل ہیں:
گاڑی کی رنگت کے سائیڈ ویو مررز
گاڑی کی رنگت کے ڈور ہینڈلز
سیٹوں پر نیا بہتر فیبرک
اسپیئر ویل
کار کے تین نئے رنگ
ہیچ بیک کو ابتداء میں بغیر اسپیئر ویل کے لانچ کیا گیا تھا۔ البتہ کمپنی نے اب متعدد دیگر فیچرز کے ساتھ اضافی ویل بھی فراہم کردیا ہے۔ ہیچ بیک پہلے تین رنگوں سفید، سلوَر میٹالک اور گرے میٹالک میں دستیاب تھی۔ اب براوو کے نئے رنگوں میں یہ شامل ہیں:
رائل بلو
بیج میٹالک
مرون میٹالک
صارفین کے پاس اب رنگوں کے انتخاب کے لیے مزید ورائٹی موجود ہے۔ مزید یہ کہ کمپنی نے 2,00,000 روپے کی ادائیگی پر براوو کی بکنگز بھی شروع کردی ہیں۔ یونائیٹڈ موٹرز کی ڈیلرشپ کے مطابق ہیچ بیک کی ڈلیوری کا وقت بکنگ کے بعد 20 سے 25 دن ہوگا۔ براوو کی قیمت میں 60,000 روپے کا اضافہ کیا گیا ہے اور اب نئی ایکس-فیکٹری قیمت 9,85,000 روپے ہے۔ واضح رہے کہ اس قیمت میں 2.5 فیصد فیڈرل ایکسائز ڈیوٹی (FED) شامل ہے کہ جو حکومت نے 1000cc اور اس سے کم کے انجن رکھنے والی گاڑیوں پر لگا رکھی ہے۔ البتہ دیگر چارجز جیسا کہ ایڈاونس ٹیکس اور کسی بھی مخصوص شہر کے لیے فریٹ چارجز اس قیمت کا حصہ نہیں ہیں۔ قیمت 15 اکتوبر سے بننے والی تمام کاروں پر لاگو ہوگی۔ مزید تفصیل کے لیے آٹومیکر کا یہ آفیشل سرکلر دیکھیں:
نوٹیفکیشن کے مطباق براوو کا نیا اسٹاک 20 اکتوبر 2019ء سے فراہم کیا جائے گا۔ ڈیلرشپ کے مطابق 800cc ہیچ بیک اس مہینے کی 25 تاریخ تک شورومز تک پہنچ جائے گی جہاں صارفین اس بہتر ماڈل کو دیکھ سکیں گے۔ کمپنی اس ہیچ بیک کے لیے مارکیٹنگ مہم بھی چلانے والی ہے۔ دوسری جانب صارفین کی جانب سے اس ہیچ بیک کی کوالٹی پر بہت تنقید کی گئی تھی جن کا سمجھنا ہے کہ اس میں استعمال ہونے والا مٹیریل اچھے معیار کا نہیں ہے۔ کمپنی نے صارفین کی شکایات پر ردعمل دکھایا اور اب لوکل سیکٹر میں اپنی واحد کار کے معیار کو بہتر بنانے کا کام کر رہی ہے۔
اس بارے میں اپنے خیالات نیچے تبصروں میں پیش کیجیے اور آٹوموبائل انڈسٹری کے بارے میں مزید معلومات کے لیے پاک ویلز پر آتے رہیے۔
