موٹر سائیکل کے شوقین پاکستانیوں کا انتظار ختم ہونے کو ہے کیوں کہ اب انہیں 200cc موٹر سائیکل کے زمرے میں ایک نئی بائیک پیش کی جارہی ہے۔ یہ دلچسپ تحفہ ملک کے کسی معروف موٹرسائیکل ساز ادارے مثلاً ایٹلس ہونڈا یا پھر چینی موٹر سائیکل ساز کمپنی یونائیٹڈ موٹرسائیکل کی جانب سے نہیں پیش کیا جارہا بلکہ ایک نسبتاً غیر معروف اور چھوٹی کمپنی زمکو (ZXMCO) نے یہ اہم قدم اٹھایا ہے۔
ایک نجی پروگرام میں زمکو پاکستان نے “کروز” کے نام سے 200cc موٹر بائیک پاکستان میں متعارف کروائی ہے۔ فی الوقت موٹر سائیکل پیش کرنے والا ادارہ اس نئی بائیک کی تشہیری مہم میں مصروف ہے۔ امکان ظاہر کیا جارہا ہے کہ اس موٹر سائیکل کو جلد ہی ملک بھر میں فروخت کے لیے پیش کردیا جائے گا۔ پاک ویلز کو ذرائع سے حاصل ہونے والی معلومات کے مطابق زمکو کروز کی قیمت 2 سے ڈھائی لاکھ روپے کے درمیان رکھی جاسکتی ہے۔ اگر مارکیٹ میں موجود دیگر چینی موٹر سائیکلوں پر نظر ڈالی جائے تو یہ قیمت 200cc بائیک کے لیے خاصی کم معلوم ہوتی ہے۔
زمکو کروز 200cc موٹر سائیکل کی چیدہ خصوصیات یہ ہیں:
انجن: 198cc، 1-سلینڈ، 4-اسٹروک
بور: 65.5 ملی میٹر
اسٹروک: 58.8 ملی میٹر
کمپریشن ریشو: 11:1
زیادہ سے زیادہ رفتار: 8000 آر پی ایم پر 17 ہار س پاور
زیادہ سے زیادہ ٹارک: 6500 آر پی ایم پر 17 نیوٹن میٹر
ٹرانسمیشن: 6-اسپیڈ، ہینڈ کلچ
بریکس: ڈسک (آگے اور پیچھے)
پہیے: الائے
