دنیا کی دوسری سب سے بڑی سمارٹ فون بنانے والی کمپنی، شاؤمی کو اب الیکٹرک وہیکل (EV) مارکیٹ میں بھی داخل ہو چکی ہے۔ اہم ترین بات یہ ہے کہ کمپنی نے اپنی نئی الیکٹرک کار SU7 لانچ کی ہے اور ابتدائی آرڈرز کے پہلے 24 گھنٹوں کے اندر تقریباً 88898 پری آرڈرز حاصل کیے ہیں جو کہ الیکٹرک گاڑیوں کی انڈسٹری میں ایک اہم تبدیلی کا اشارہ ہے۔
تفصیلات
گاڑی کے سٹینڈرڈ ماڈل SU7 کی قیمت 215900 یوآن (29870 ڈالر) کی رکھی گئی ہے جو کہ اس طرز کی خوبصورت ڈیزائن والی گاڑی کیلئے کافی اچھی قیمت ہے جس کا موازنہ لگژری سپورٹ کار ماڈؒلز پورشے ٹائکن اور پینیمرہ سے بھی کیا جا سکتا ہے لیکن اس کی قیمت ان لگژری گاڑیوں سے کافی کم ہے۔
اگرچہ شاؤمی الیکٹرک کار مارکیٹ میں آنے والی نئی کمپنی ہے، اس کے باوجود کمپنی نے اپنی الیکٹرک کار SU7 کی قیمتیں کافی مناسب رکھی ہیں اور یوں شاؤمی صارفین کی توجہ اپنی جانب مبذول کروانے میں کامیاب بھی رہی ہے۔
گاڑی کے حد سے زیادہ آرڈرز موصول ہونے کی وجہ سے شاؤمی نے اعلان کیا ہے کہ خریداروں کو اپنے SU7 کی ڈیلیوری کے لیے چار سے سات ماہ کے انتظار کا سامنا کرنا پڑ سکتا ہے۔ سٹینڈرڈ ماڈل کی ڈیلیوری میں 18 سے 21 ہفتوں میں ہوگی جبکہ پرو ماڈل اور سب سے مہنگے ویرینٹ میں 30 ہفتے تک کا وقت لگ سکتا ہے۔
کمپنی کا سمارٹ فیچرز پر زور، جیسا کہ ایڈوانس ڈیش بورڈز، چینی صارفین کی ترجیحات کو ظاہر کرتا ہے اور مارکیٹ میں گاڑی کی مانگ کو مزید بڑھانے میں اہم کردار ادا کر رہا ہے۔
مزید برآں، شاؤمی کی جانب سے SU7 کی مناسب قیمت دیگر الیکٹرک کار کمپنیز کو اس بات پر مجبور کر سکتی ہے کہ وہ بھی اپنی گاڑیوں کی قیمتوں میں کمی کریں جبکہ ہواوے کی حمایت یافتہ Aito اور Xpeng جیسی کمپنیوں نے اپنے الیکٹرک SUV ماڈلز پر سبسڈی اور چھوٹ کا اعلان کیا ہے، جبکہ اب چیری بھی اپنی پٹرول انجن والی گاڑیوں پر مراعات دے رہی ہے۔
شاؤمی کی نئی کار کے بارے میں آپ کا کیا خیال ہے؟ کمنٹس سیکشن میں اپنے خیالات کا اظہار کریں۔
