فیلیسیٹی ایس نامی مال بردار جہاز بحر اوقیانوس میں ڈوب گیا ہے۔ اس جہاز میں 27 ارب روپے (155 ملین ڈالر) کی 4000 لگژری گاڑیاں تھیں جن میں پورش، بینٹلے اور لیمبورگینی شامل تھیں۔ میڈیا رپورٹس کے مطابق جہاز اس وقت ڈوب گیا جب ریسکیو ٹیم اسے کنارے لے جا رہی تھی۔
بینٹلے کمپنی کے مطابق ان کی 189 نئی کاریں جہاز پر موجود تھیں جبکہ اس پر 1100 پورش گاڑیاں بھی تھیں۔ ان گاڑیوں کو جرمنی سے امریکہ پہنچایا گیا تھا جہاں انہیں صارفین کے حوالے کیا جانا تھا۔ تاہم آگ لگنے کے بعد جہاز ڈوب گیا۔
ایک اچھی خبر
ان گاڑیوں کے خریداروں کے لیے ایک اچھی خبر ہے اور وہ یہ ہے کہ یہ تمام گاڑیاں انشورڈ تھیں۔ بین الاقوامی میڈیا ایجنسی رائٹرز کی رپورٹ کے مطابق ووکس ویگن نے تصدیق کی ہے کہ ان کی گاڑیوں کی انشورنس کی رقم 116 ملین پاؤنڈ ہے۔ اس دوران ایک خریدار نے میڈیا کو بتایا کہ وہ پہلے ہی اپنی گاڑی کو دوبارہ آرڈر کر چکا ہے۔
جہاز کیسے ڈوبا؟
16 فروری کو جہاز میں آگ بھڑک اٹھی جس کے بعد جہاز میں موجود عملے کو لائف بوٹس کی مدد سے بچا لیا گیا تھا۔ تاہم حکام کارگو جہاز کو بچانے میں ناکام رہے۔ اطلاعات کے مطابق یہ اس وقت سمندر میں 3500 میٹر کی گہرائی میں ہے۔
ابھی تک جہاز سے تیل کے اخراج کی کوئی اطلاع نہیں ہے تاہم حکام اس پر گہری نظر رکھے ہوئے ہیں۔
انٹرنیشنل آٹوموبائل مارکیٹ پہلے ہی کورونا اور سیمی کنڈکٹرز چپس کی کمی کی وجہ سے ایک مشکل وقت سے گزر رہی ہے۔ سیمی کنڈکٹرز چپس کی قلت کی وجہ سے دنیا بھر میں کاروں کی ترسیل میں مہینوں کی تاخیر ہوئی ہے۔ اور یہ واقعہ کار سازوں پر مزید دباؤ ڈالے گا۔
امید ہے کہ مستقبل قریب میں صورتحال بہتر ہو جائے گی کیونکہ وبا کے بعد حالات بہتر ہو رہے ہیں لیکن اس میں وقت لگے گا۔
اس واقعے کے بارے میں آپ کا کیا خیال ہے؟ آپ کے خیال میں اس کا کیا اثر ہوگا؟ نیچے دئیے گئے کمنٹس سیکشن میں اپنے خیالات کا اظہار کریں۔
