کئی ہفتوں سے اپنے سوشل میڈیا ہینڈلز پر ہلکا پھلکا ذکر کرنے کے بعد بالآخر آؤڈی بھی پاکستان میں “ Electric has gone Audi” کے نعرے کے ساتھ الیکٹرک گاڑیوں کے میدان میں اُتر گیا ہے، اور اتوار 8 مارچ کو آؤڈی پاکستان کے کراچی شوروم میں ای-ٹرون کواٹرو SUV کی رونمائی کر دی۔
الیکٹرک کاروں کی دنیا میں آؤڈی کی آمد ایک فُل سائز لگژری SUV ای-ٹرون کے ساتھ ہوئی ہے کہ جو جیگوار آئی-پَیس، مرسڈیز EQC اور ٹیسلا ماڈل X کی مقابل ہے۔
آؤڈی کی پہلی مکمل الیکٹرک پیداوار SUV ای-ٹرون مکمل طور پر بیٹری پاور سے چلتی ہے، یعنی ایندھن جلانے کے عمل سے مکمل طور پر خالی ہے؛ یہ دو الیکٹرک موٹرز کی طاقت رکھتی ہے، ہر ایکسل میں ایک: دونوں مل کر کُل 402HP اور 561Nm کا ٹارک پیدا کرتے ہیں، نتیجتاً ای-ٹرون 0 سے 100 کلومیٹرز فی گھنٹہ کی رفتار محض 6.6 سیکنڈز میں حاصل کر لیتی ہے۔ یہ موٹرز 95.3 kWh لیتھیم-آیون بیٹری پیک کی طاقت سے چلتی ہیں کہ جو 417 کلومیٹرز کی WLTP ریٹڈ رینج دیتی ہیں۔
چارجنگ کے معاملے میں ای-ٹرون 150.0-Kw ڈی سی فاسٹ چارجرز کا استعمال کر سکتی ہیں کہ جو 10 منٹ میں تقریباً 80 کلومیٹرز اور 30 منٹ میں لگ بھگ 260 کلومیٹرز کی رینج دیتے ہیں۔ روایتی 240-وولٹ کے آؤٹ لیٹ کا استعمال کرنے والے ای-ٹرون کو تقریباً 9 گھنٹے میں مکمل چار ج کر سکتے ہیں۔
ای-ٹرون کی سب سے اثر انگیز ٹیکنالوجی اس کے الیکٹریفائیڈ سسٹمز ہیں، لیکن پانچ نشستوں کی یہ کراس اوور جدید اور انتہائی کارآمد کیبن بھی رکھتی ہے۔ اس کا ڈیش بورڈ کئی ہائی ریزولیوشن اسکرینیں رکھتا ہے کہ جن میں آؤڈی ڈجیٹل کلسٹر – جو ورچوئل کاک پِٹ کہلاتا ہے – اور درمیان میں دو فلش ماؤنٹڈٹچ اسکرینیں شامل ہیں۔ ایک ہیڈ اَپ ڈسپلے اور مساجنگ فرنٹ سیٹیں ای-ٹرون کے نفیس انٹیریئر کو مکمل کرتی ہیں۔ روایتی ڈرائیور شافٹ یا ٹرانسمیشن کی عدم موجودگی وسیع کیبن اور کارگو ایریا کے فوائد دیتی ہے، جو پچھلی قطار کے عقب میں 29 مکعب فٹ کا ہے اور ان سیٹوں کو تہہ کیا جائے تو 57 کا۔
جیسا کہ آپ اتنی شاندار کار سے توقع رکھ سکتے ہیں کہ ای-ٹرون جدید ترین ٹیکنالوجی اور فیچرز کے ساتھ آتی ہے: ای-ٹرون کا انفوٹینمنٹ سسٹم ڈوئل ٹچ اسکرینیں رکھتا ہے، ایک 10.1 انچ ڈسپلے اوپر اور ایک 8.8 انچ کا یونٹ نیچے؛ ایپل کار پلے اور اینڈرائیڈ آٹو آپشنل ہیں، اور بینگ اور اولوفسن آڈیو سسٹم بھی۔ یہ وائی-فائی ہاٹ اسپاٹ اور وائرلیس چارجنگ بھی رکھتی ہے۔
بے شمار سیفٹی اور ڈرائیور کی مدد کرنے والی ٹیکنالوجیز کے ساتھ آؤڈی ای-ٹرون نیشنل ہائی وے ٹریفک سیفٹی ایڈمنسٹریشن (NHTSA) کی جانب سے فائیو-اسٹار کریش-ٹیسٹ ریٹنگ رکھتی ہے، اور انشورنس انسٹیٹیوٹ فار ہائی وے سیفٹی (IHSA) کی جانب سے ٹاپ سیفٹی پِک+ قرار دی گئی۔ یہ نیم خود مختار ڈرائیونگ مدد کے ساتھ آتی ہے جیسا کہ ایڈاپٹِو کروز کنٹرول، سیلف پارکنگ اسسٹ، فارورڈ کولیژن وارننگ اور آٹومیٹڈ ایمرجنسی بریک، بلائنڈ اسپاٹ مانیٹرنگ، کراس ٹریفک الرٹ اور لین-ڈپارچر وارننگ۔
ای-ٹرون کواٹرو کی قیمت 1,55,00,000 روپے ہے، جو کئی لوگوں کی پہنچ سے تو باہر ہے لیکن اتنی جاندار آؤڈی SUV کے لیے متوقع ہے۔
آؤڈی کی اس الیکٹرک گاڑی کے بارے میں آپ کی رائے کیا ہے؟ ہمیشہ کی طرح نیچے تبصروں میں اپنے خیالات پیش کیجیے اور مزید خبروں کے لیے پاک ویلز پر آتے رہیے۔
