پاک سوزوکی نے سوئفٹ پر نئی ‘بونس آفر’ لگا دی

گزشتہ سال 2023 پاکستان کی آٹو انڈسٹری کے لیے فروخت اور پیداوار کے لحاظ سے ایک بدترین سال رہا۔ نئے سال 2024 کے آغاز کے بعد مقامی کار ساز کم از کم پہلی ششماہی میں اپنے آپ کو بدحالی سے نکالنے کے لیے پرعزم ہیں۔

لوکل کار کمپنیز نے اپنی کاروں کے نمایاں ماڈلز پر آفرز لگانا شروع کر دی ہیں۔ کِیا لکی موٹرز اور ٹویوٹا پاکستان کے بعد اب پاکستان سوزوکی موٹرز کمپنی (PSMC) نے بھی ایک آفر کا اعلان کیا ہے۔ کمپنی نے سوزوکی سوئفٹ پر بونس آفر لگا دی ہے جس کے تحت گاڑی خریدنے والوں کو 100000 روپے کی چھوٹ دی جائے گی۔

ٹویوٹا کی آفر

ٹویوٹا پاکستان نے خود کو بحران کے بدترین دور سے نکالنے اور پاکستان میں حال ہی میں لانچ ہونے والی نئی کرولا کراس ہائبرڈ الیکٹرک کو کامیاب بنانے کے لیے ایک خصوصی آفر کا اعلان کیا ہے۔

کمپنی کی جانب سے شئیر کی گئی پوسٹ میں کہا گیا ہے کہ ‘اپنی کرولا کراس ہائبرڈ الیکٹرک بُک کروائیں اور مسابقتی مارک اپ، کم ترین بیمہ کی شرح، اور منتخب بینکوں کے ذریعے اپنے آرڈر پر فوری ڈیلیوری حاصل کریں۔

ٹویوٹا پاکستان کی سیلز کو گزشتہ سال زبردست دھچکا لگا، جس میں 63 فیصد کی کمی واقع ہوئی۔ اس عرصے میں، کرولا اور یارِس کی فروخت میں 70 فیصد کی حیران کن کمی نے کمپنی کی سیلز کو شدید متاثر کیا جبکہ فارچیونر اور آئی ایم ویز کے ساتھ بھی یہی صورتحال رہی۔

کِیا کی پیشکش؟

کِیا لکی موٹرز نے بھی ٹویوٹا کی طرح ایک دلکش آفر متعارف کروائی ہے۔ ایک سادہ کیش بیک آفر سپورٹیج کے تمام ویرینٹس جبکہ پکانٹو کے AT ویرینٹ پر لگائی گئی ہے۔

سوشل میڈیا پوسٹس کے مطابق کمپنی نے پکانٹو کے  ATویرینٹ پر 50000 روپے کی جبکہ سپورٹیج کے تمام ویرینٹس پر 150000 روپے آفر لگائی ہے۔ اس کے علاوہ کمپنی نے سورینٹو پر سود کے بغیر آسان آقساط جیسی آفر لگائی گئی ہے۔