سوزوکی بھارت اور یورپ میں بہت جلد نئی بلینو پیش کرنے والا ہے جو ممکنہ طور پر ہائبرڈ گاڑی ہوگی۔ سوزوکی نے اعلان کیا تھا کہ نئی بلینو YRA طرز کی گاڑی ہوگی اور اسے نئے “لائٹ ویٹ” پلیٹ فارم پر تیار کیا جائے گا۔ ہمیں سوزوکی بلینو کی چند خفیہ تصاویر موصول ہوئیں جنہیں دیکھ کر اس کے مستقبل کا اندازہ لگایا جاسکتا ہے۔
سوزوکی بلینو میں 16 انچ پہیوں کے علاوہ ایل ای ڈی لائٹس قابل ذکر ہیں جو دھند میں بہتر روشنی کرتی ہیں۔ بلینو کے اندر ایک نیا انفوٹینمنٹ ڈسپلے لگایا گیا ہے۔ اس کے علاوہ گاڑی کے اندر درجہ حرارت کا خود کار نظام، اگلی نشستوں پر دو حفاظتی بیگز اور دیگر گاڑیوں کے مقابلے میں قدرے بہتر اور جدید چیزیں شامل ہیں۔ نئی بلینو کا انجن 1200 سی سی کے سیریز پیٹرول اور 1300 ڈیزل ہونے کی توقع ہے۔ اڑتی اڑتی خبر یہ بھی آئی ہے کہ دونوں انجن سوزوکی کے جدید اسمارٹ ہائبرڈ ویھائیکل سسٹم (ایس ایچ وی ایس) ٹیکنالوجی سے آراستہ ہوں گے جو اسے سب سے کفایتی گاڑی بنادے گا۔
سوزوکی بلینو کی آمدرواں سال نومبر میں متوقع ہے تاہم اس بات کی تصدیق نہیں ہوسکی کہ آیا سوزوکی پاکستان میں یہ گاڑی متعارف کروانے کا ارادہ رکھتی ہے یا نہیں۔
