فٹ بال شائقین بخوبی جانتے ہوں گے کہ لیسٹر سٹی نے پہلی بار انگلش پریمیئر لیگ جیتنے کا اعزاز حاصل کیا ہے۔ یہ لیسٹر سٹی کلب فٹ بال کلب کی 132 سالہ تاریخ میں پہلا موقع ہے کہ جب وہ انگلش پریمیئر لیگ کا چیمپئن بنا ہو۔ سخت محنت کے نتیجے میں حاصل ہونے والی اس کامیابی کا جشن منانے کے لیے فٹ بال کلب کی انتظامیہ نے ٹیم میں شامل ہر کھلاڑی کو BMW i8گاڑی بطور انعام دینے کا اعلان کیا ہے۔
یہ بھی پڑھیں: شاہ بدر بن سعود – دنیاکی واحد بوگاتی وژن گراں تورزمو ہائپر کار کا نیا مالک!
لیسٹر سٹی کے 19 کھلاڑیوں کے لیے تیار کی جانے والی i8 ہائبرڈ گاڑیوں کو نیلے رنگ میں لپیٹا گیا ہے۔یہاں یہ بات قابل ذکر معلوم ہوتی ہے کہ اس وقت ایک BMW i8 کی قیمت تقریباً 1,40,000 ڈالر ہے جو پاکستانی روپے میں 1,46,47,500کی خطیر رقم بنتی ہے۔ یہ تو صرف ایک گاڑی کی قیمت ہے جبکہ پورے قافلے کی قیمت تقریباً 26.60 لاکھ امریکی ڈالر یعنی 2 ارب روپے سے بھی زائد بنتی ہے۔ لیسٹر سٹی فٹ بال کلب کے چیئرمین کا تعلق تھائی لینڈ سے ہے۔ وہ ایک ارب پتی ہونے کی وجہ سے نہ صرف تھائی لینڈ بلکہ دنیا بھر میں مشہورہیں۔ ان کے کل اثاثوں کی مالیت 3.2 ارب ڈالر ہے جس سے اندازہ لگایا جاسکتا ہے کہ 26 لاکھ ڈالر تو ان کے لیے واقعی کوئی بڑی بات نہیں ہوگی۔
فٹ بال بلاشبہ دنیا کا مقبول ترین کھیل ہے اور اسی لیے اس سے منسلک اداروں اور کھلاڑیوں کو مالی اعتبار سے بھی بھرپور فوائد حاصل ہوتے ہیں۔ البتہ لیسٹر سٹی فٹ بال کلب کے سربراہ کا تازہ اقدام اپنی مثال آپ ہے کہ جس میں انہوں نے حقیقی معنی میں ٹیم کی کامیابی کا سہرا کھلاڑیوں کے سر باندھ دیا ہے۔
