پچھلے کئی ماہ سے ہم سنتے آ رہے ہیں انڈس موٹر کمپنی المعروف ٹویوٹا پاکستان عنقریب کرولا XLi اور GLi کو خیرباد کہنے جا رہی ہے اور اس کی جگہ 1300cc انجن والی کوئی چھوٹی گاڑی متعارف کروائی جائے گی۔ ٹویوٹا کرولا کی جگہ لینے والی سب سے مضبوط امیدوار ٹویوٹا وائیوس بتائی جاتی ہے۔ پاک ویلز بلاگر نے بھی اپنے بلاگ میں یہ بات باور کروائی تھی کہ ٹویوٹا پاکستان بھی اب ہونڈا پاکستان کی حکمت عملی پر عمل پیرا ہے جس کے تحت دو مختلف مارکیٹوں کے لیے دو مختلف سیڈان (ہونڈا سِوک اور سِٹی) متعارف کروائی گئیں۔
پڑوسی ممالک سے موصول ہونے والی اطلاعات کے مطابق بھارت میں منعقد ہونے والے آٹو ایکسپو میں ٹویوٹا موٹرز کی جانب سے نئی یارس 2018 سیڈان کی پردہ کشائی کی جائے گی۔ یاد رہے کہ یارس اور وائیوس ایک ہی طرز کی گاڑیاں ہیں البتہ وائیوس کو انداز اور آسائش کے اعتبار سے یارس پر تھوڑی بہت برتری حاصل ہے۔ یہ خبر اس حوالے سے اہم ہے کہ ٹویوٹا جاپان کی جانب سے جنوبی ایشیا کے ممالک میں یارس سیڈان کی پیشکش کے بعد خطے کے دیگر ممالک میں بھی اس گاڑی کی پیشکش کے امکانات روشن ہوگئے ہیں۔
گو کہ پاکستان میں 1300cc انجن والی گاڑی کی پیش گوئی کی جا رہی ہے تاہم آئندہ آٹو ایکسپو میں پیش کی جانے والی ٹویوٹا یارس سیڈان میں 1500cc انجن شامل ہے۔ یہ انجن 110 بریک ہارس پاور فراہم کرنے کی سکت رکھتا ہے اور اس کے ساتھ 5-اسپیڈ مینوئل یا 7-اسٹیپ CVT گیئر باکس منسلک ہوسکتا ہے۔
جس طرح پاکستان میں انڈس موٹر کمپنی اپنی مضبوط حریف ہونڈا سٹی کو ٹکر دینے کی خواہشمند ہے، اسی طرح بھارت میں بھی نئی ٹویوٹا یارس مشہور و مقبول ہونڈا سٹی کے مقابل آئے گی۔ بھارت میں یارس کو رواں سال یعنی 2018ء کے آخر میں فروخت کے لیے پیش کردیا جائے گا جبکہ پاکستان میں نئی وائیوس آئندہ سال یعنی 2019ء کے اوائل میں پیش کیے جانے کا امکان ہے۔
