عالمی سطح پر پیٹرول کی قیمتوں میں بڑی کمی کے بعد حکومت نے عوام کو ریلیف دینے کیلئے پیٹرول کی قیمتوں میں کمی کر دی ہے۔ نوٹیفکیشن کے مطابق پیٹرول کی قیمت میں 18 روپے فی لیٹر جبکہ ڈیزل کی قیمت میں 40.54 روپے فی لیٹر کمی کی گئی ہے۔
اسی طرح کیروسین آئل کی قیمت میں 33.81 روپے فی لیٹر جبکہ لائٹ ڈیزل کی قیمت میں 34.71 روپے کمی کی گئی ہے۔
پیٹرول کی نئی قیمت
پیٹرول کی قیمت میں 248.74 روپے سے کم ہو کر 230.24 روپے ہو گئی ہے۔ اسی طرح ڈیزل کی نئی قیمت 236 روپے جبکہ پرانی قیمت 276.54 روپے تھی۔
اسی طرح کیروسین آئل کی قیمت میں 230.26 روپے سے کم ہو کر 196.45 روپے ہو گئی ہے۔ اسی طرح لائٹ ڈیزل آئل کی نئی قیمت 191.44 روپے جبکہ پرانی قیمت 226.15 روپے تھی۔
حکومت کا بیان
اس سے قبل آج وزیر خزانہ مفتاح اسماعیل نے کہا کہ پیٹرولیم کی قیمتوں میں کمی سے پاکستانی عوام کو ریلیف ملے گا کیونکہ عالمی قیمتوں میں کمی ہوئی ہے۔ انہوں نے کہا کہ عالمی مالیاتی فنڈ (آئی ایم ایف) کے ساتھ معاہدے تک پہنچنے کے بعد حکومت کا ہر فیصلہ لوگوں کی زندگیوں میں آسانی پیدا کرنے کی راہ ہموار کرے گا۔
اس سے قبل وزیر اعظم شہباز شریف کے ہیڈ آف سٹریٹجک ریفارمز سلمان صوفی نے کہا تھا کہ حکومت پیٹرول کی قیمتوں میں کمی کرنے جا رہی ہے۔ ایک ٹوئٹ میں سلمان صوفی نے کہا کہ وزیراعظم شہباز شریف نے ملک میں پیٹرولیم کی قیمتیں کم کرنے کی ہدایت کی ہے۔ انھوں نے مزید کہا کہ وزیراعظم نے متعلقہ وزارت کو ہدایت کی ہے کہ عالمی سطح پر تیل کی قیمتوں میں کمی کا پورا فائدہ عوام تک پہنچایا جائے۔
انہوں نے مزید کہا کہ قیمتوں میں کمی سے آئی ایم ایف کے جاری پروگرام پر کوئی اثر نہیں پڑے گا۔ اس کی وجہ بین الاقوامی مارکیٹ میں پیٹرولیم کی قیمتوں میں کمی ہے۔
اپریل 2022 میں اقتدار میں آنے کے بعد حکومت کی جانب سے قیمتوں میں یہ پہلی کمی ہے۔ اتحادی حکومت نے گزشتہ دو مہینوں میں پیٹرول کی قیمتوں میں چار بار اضافہ کیا ہے، جس سے پیٹرول کی قیمت میں 150 سے 250 روپے تک بڑھ گئی۔
پیٹرول کی قیمت میں کمی کے بارے میں آپ کا کیا خیال ہے؟ کیا آپ کو لگتا ہے کہ اس سے مہنگائی کو کم کرنے میں مدد ملے گی؟ کمنٹس سیکشن میں اپنے خیالات کا اظہار کریں۔
