پاکستان کی گرتی ہوئی معیشت کو سہارا دینے کے لیے موجودہ حکومت کی جانب سے مقامی کار ساز کمپنیوں کو گاڑیاں اور کاروں کے پارٹس برآمد کرنے پر زور دینے کے بعد اب کار کمپنیاں اس عمل کی پیروی کرنے کے لیے پرعزم دکھائی دیتی ہیں۔
چنگان پاکستان نے گزشتہ سال سے اس عمل کا آغاز کیا۔ اس کے بعد ملت ٹریکٹرز اور ٹویوٹا انڈس موٹرز (IMC) نے چنگان کی پیروی کرتے ہوئے اس معاملے کو آگے بڑھایا اور ایک حالیہ اپ ڈیٹ میں ایک اور مقامی آٹو کمپنی ہیونڈائی نشاط نے بھی کار پارٹس ایکسپورٹ کرنے کے عزم اظہار کرتے ہوئے اس عمل کی تیاری کرنے کی خبر دی ہے۔
ماہر اقتصادیات علی خضر نے اپنی ایک ٹویٹ میں ہمیں بتایا کہ ہیونڈائی نشاط موٹر ہمسایہ ممالک بنگلہ دیش اور سری لنکا کو آٹو پارٹس برآمد کرنے کے لیے تیار ہے۔ کمپنی کا یہ فیصلہ عالمی سطح پر پاکستان کی آٹوموٹو صلاحیتوں کی نمائش کے لیے ایک اہم قدم ہے۔
ٹویوٹا انڈس موٹرز 50 یونٹس برآمد کرے گی
اس سے قبل ٹویوٹا پاکستان نے بھی اپنے مقبول ماڈلز کے 50 یونٹس برآمد کرنے کے اپنے منصوبے کی خبر دی تھی جن میں فارچیونر، آئی ایم وی سیریز، اور کرولا کراس شامل ہیں۔ گاڑیوں کی برآمدات کے علاوہ کمپنی نے انسانی وسائل کی برآمد میں بھی نمایاں کامیابی حاصل کرنے کی بات کی تھی۔ ٹویوٹا موٹر کارپوریشن (TMC) کے ساتھ کام کرنے کے لیے 100 سے زیادہ ہنر مند پیشہ ور افراد کو جاپان بھیجا گیا ہے۔
رواں ماہ کے اوائل میں ہم نے اسی طرح کی ایک اور اپ ڈیٹ شئیر کی تھی جس میں بتایا گیا کہ ملت ٹریکٹر بھی ملک کی معیشت کو مسلسل چیلنجز سے نکالنے کے لیے کمر بستہ ہے۔ ماہر اقتصادیات عبدالرحمان نجم نے اپنے ٹویٹ میں ملک کی سب سے بڑی زرعی مشینری بنانے والی کمپنی “ملت ٹریکٹرز” کی جانب سے ایک خوش آئند اقدام کا انکشاف کیا تھا۔
انھوں نے اپنی ٹویٹ میں بتایا تھا کہ کمپنی مالی سال 24 میں تقریباً 3000 ٹریکٹر افریقہ، افغانستان، جنوبی امریکہ اور مشرق وسطیٰ جیسے ممالک کو برآمد کرنے کے لیے تیار ہے۔
دریں اثنا، چنگان پاکستان نے بھی اکتوبر 2023 میں کینیا اور تنزانیہ کی مارکیٹوں میں Oshan X7s کے 14 یونٹس پر مشتمل ایک کھیپ برآمد کی تھی۔
ہیوںڈائی پاکستان سے آنے والی حالیہ اپ ڈیٹ کے بارے میں آپ کا کیا خیال ہے؟ کمنٹس سیکشن میں اپنے خیالات کا اظہار کریں۔
