لوٹن ہوائی اڈہ، جو مسافروں کی وجہ سے ہر وقت مصروف رہتا ہے کی کثیر المنزلہ کار پارکنگ ایریا میں زبردست میں آگ بھڑک اٹھی، جس کے نتیجے میں اس کا ڈھانچہ تباہ ہو گیا اور تمام پروازیں معطل ہو گئیں۔ اس دوران ائیرپورٹ پر بھگدڑ جیسی صورتحال دیکھنے کو ملی۔
کار پارکنگ میں آگ لگنے کا واقعہ
سوشل میڈیا پر گردش کرنے والی فوٹیج میں دیکھا جا سکتا ہے کہ کار پارک کی اوپری منزل کو آگ کے اٹھنے والے شدید شعلوں اور گہرے دھوئیں نے اپنی لپیٹ میں لے لیا، جس کی وجہ سے دھماکوں اور گاڑیوں کے الارم کی آوازیں بھی سنائی دینے لگیں۔ پارکنگ میں 1500 تک کاریں ہونے کا اندازہ ہے۔ حکام نے منگل کی رات 9.38 بجے ایک بڑا واقعہ قرار دیا کیونکہ کار پارک کا نصف حصہ آگ کی لپیٹ میں آگیا۔ ہوائی اڈے کی انتظامیہ کی جانب سے بتایا گیا ہے کہ آگ گاڑی میں آگ لگنے سے لگی جو ٹرمینل کار پارک 2 میں پھیل گئی۔
BREAKING
All flights have been suspended at Luton Airport London as massive fire has erupted in the terminal car parking. pic.twitter.com/HmmdbJpdf5— Truthseeker (@Xx17965797N) October 11, 2023
ہنگامی ردعمل
آگ پر فوری طور پر قابو پانے کیلئے بیڈفورڈ شائر فائر اینڈ ریسکیو سروس نے 15 فائر انجن اور 100 سے زیادہ فائر فائٹرز کو تعینات کیا۔ آگ کی شدت کے باعث ہوائی اڈے کو بند کر دیا گیا جس سے ہزاروں مسافر متاثر ہوئے۔
آگ کی شدت کی وجہ سے عمارت کا ڈھانچہ تباہی کا منظر پیش کرنے لگا جس سے تمام پروازیں سہ پہر 3 بجے تک معطل کر دی گئیں۔ ائیرپورٹ انتظامیہ کی جانب سے مسافروں کو مشورہ دیا کہ وہ محدود رسائی کی وجہ سے ہوائی اڈے کا سفر نہ کریں۔
لوٹن سے کام کرنے والی ایک بڑی ایئرلائن ایزی جیٹ نے کہا کہ ہوائی اڈے کی بندش کی وجہ سے وہ فی الحال منصوبہ بندی کے مطابق کام کرنے سے قاصر ہے۔ منسوخ شدہ پروازوں والے صارفین کو ری بُک کرنے یا رقم کی واپسی حاصل کرنے کا انتخاب پیش کیا گیا۔
