ایم جی موٹرز کو پاکستان میں اپنی گاڑیاں اسمبل کرنے کے لیے گرین فیلڈ اسٹیٹس مل گیا

مورس گیراجز (MG) موٹرز گزشتہ سال پاکستان میں اپنے آغاز سے ہی گفتگو کا موضوع بنا ہوا ہے۔ اس کی پہلی SUV، یعنی MG HS، پہلے ہی سڑکوں پر موجود ہے اور کمپنی نے دو مزید SUVs (MG ZS اور MG ZS EV) کی جلد لانچ کا اشارہ دے دیا ہے۔ البتہ آٹومیکر ان گاڑیوں کے صرف CBU یونٹس بیچ رہا ہے، جو چین سے درآمد کیے گئے ہیں۔ اچھی خبر یہ ہے کہ MG موٹرز نے حال ہی میں آٹو ڈیولپمنٹ پالیسی ‏2016-21 کے تحت گرین فیلڈ اسٹیٹس حاصل کر لیا ہے۔ اس کا مطلب ہے کہ دوسرے انٹرنیشنل آٹومیکرز کی طرح اب  MG بھی پاکستان میں اپنی گاڑیوں کے مقامی طور پر اسمبل شدہ CKD یونٹس کی پروڈکشن شروع کرے گا۔

‏MG نے پچھلے سال اپنے اسمبلی پلانٹ کی تقریبِ سنگِ بنیاد کی تھی۔ یہ پلانٹ اس وقت لاہور میں زیر تعمیر ہے اور سالانہ 40,000 گاڑیوں کی پیداواری گنجائش رکھے گا۔

پاکستان میں گرین فیلڈ اسٹیٹس

آٹوموٹو ڈیولپمنٹ پالیسی (ADP) ‏2016-21 کے تحت گرین فیلڈ اسٹیٹس پاکستانی مارکیٹ میں داخل ہونے کے لیے انٹرنیشنل کار مینوفیکچررز کو دیا جاتا ہے۔ یہ گرین فیلڈ اسٹیٹس کمپنی کو ملک میں اپنا اسمبلی پلانٹ سیٹ اپ کرنے کی اجازت دیتا ہے۔ یہ آٹومیکرز کو ٹیکس پر کچھ رعایتیں بھی دیتا ہے۔

آٹو پالیسی ‏2016-21 کے تحت آٹومیکر ہر گاڑی کے 100 عدد CBU یونٹس کسٹمز ڈیوٹی پر 50 فیصد رعایت کے ساتھ درآمد کر سکتا ہے۔

کئی دوسرے آٹومیکرز پہلے ہی ADP 2016-21 کے تحت گرین فیلڈ اسٹیٹس حاصل کر چکے ہیں۔ جنوبی کوریا کی دو کمپنیاں، کِیا اور ہیونڈائی، ایک چینی آٹوموبائل مینوفیکچرر، چنگان اور ایک اور لوکل پاکستانی آٹو برانڈ، BAIC سب یہ اسٹیٹس رکھتے ہیں۔ اب وہ ملک میں اپنی گاڑیوں کی اسمبلنگ میں سرگرم ہیں۔ اور اب MG موٹرز بھی “گرین فیلڈ مینوفیکچررز” کے اس کلب میں شامل ہو چکا ہے۔

‏MG پاکستان  گزشتہ سال سے دو SUVs کی لانچ کے اشارے دے رہا ہے۔ اب جبکہ کمپنی کو ADP 2016-21 کے تحت گرین فیلڈ اسٹیٹس مل چکا ہے، اس لیے بلاشبہ وہ جون 2021 سے پہلے مارکیٹ میں یہ SUVs لائے گا (کیونکہ تب پالیسی ایکسپائر ہو جائے گی۔)

‏MG HS کو لوکل مارکیٹ میں پہلے ہی زبردست رسپانس مل چکا ہے۔ پاکستانیوں کو SUVs بہت پسند ہیں اور اب ان کی نظریں MG ZS اور MG ZS EV پر ہیں۔ گاڑیوں کی مقامی سطح پر اسمبلنگ کا موقع ملنے کے بعد MG موٹرز بلاشبہ پاکستانی آٹو مارکیٹ کے SUV سیگمنٹ میں اپنا نام بنائے گا۔